ភ្នំពេញ ៖ កាលពីថ្ងៃដើមសប្ដាហ៍កន្លងទៅនេះ ក្រុមប្រឹក្សាអភិវឌ្ឍន៍កម្ពុជា (CDC) រួមជាមួយនឹងអន្តរក្រសួង-ស្ថាប័ន ពាក់ព័ន្ធ បានជួបប្រជុំគ្នាដើម្បីពិភាក្សាអំពីការធ្វើឱ្យប្រសើរឡើង និងជួយសម្រួលដល់ការវិនិយោគ តាមរយៈ​ធ្វើសន្ធានកម្មតភ្ជាប់ប្រព័ន្ធ​ចែករំលែកទិន្នន័យទៅវិញទៅមក រួមមានក្រសួងពាណិជ្ជកម្ម អគ្គនាយកដ្ឋានពន្ធដារ អគ្គនាយកដ្ឋានគយ​ និងរដ្ឋាករកម្ពុជា ក្រសួងរៀបចំដែនដី ព្រមទាំងអគ្គនាយកដ្ឋាន​បច្ចេកវិទ្យា​ឌីជីថល និងផ្សព្វផ្សាយអប់រំនៃក្រសួង​មហាផ្ទៃផងដែរ។

បើតាមការចុះផ្សាយរបស់ក្រុមប្រឹក្សាអភិវឌ្ឍន៍កម្ពុជា (CDC) បានឱ្យដឹងថា កិច្ចប្រជុំនេះត្រូវបានរៀបចំឡើង​ក្នុងគោលបំណងដើម្បីពិភាក្សា និងពិនិត្យលទ្ធភាពបង្កើ​នភាពងាយ​ស្រួលជូនដល់វិនិយោគិន​ដែលមាន​បំណងមកបណ្តាក់ទុនវិនិយោគនៅកម្ពុជា ជាពិសេស ផ្តល់ភាពងាយ​ស្រួលដល់ក្រសួង-ស្ថាប័នសាម៉ី ក្នុងការគ្រប់គ្រង និងបង្កើនប្រសិទ្ធភាពធ្វើបច្ចុប្បន្នភាពទិន្នន័យ​ទាក់ទងនឹងកិច្ចកា​រ​វិនិយោគ តាមរយៈការធ្វើសន្ធានកម្មតភ្ជាប់ប្រព័ន្ធចែករំលែក​ទិន្នន័យទៅវិញ​ទៅមក រវាងប្រព័ន្ធរបស់​ក្រុមប្រឹក្សាអភិវឌ្ឍន៍កម្ពុជា ជាមួយប្រព័ន្ធរបស់អន្តរក្រសួង-ស្ថាប័ន​ដែលពាក់ព័ន្ធ។

ទាក់ទិននឹងកិច្ចសហការរវាងក្រសួង-ស្ថាប័ន និងក្រុមប្រឹក្សាអភិវឌ្ឍន៍កម្ពុជានេះ លោកបណ្ឌិត ហុង វណ្ណៈ អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជាបានបង្ហាញការយល់ឃើញថា កិច្ចការនេះ​នឹង​រួមចំណែកក្នុងការចែករំលែកព័ត៌មានទាក់ទងនឹងសភាពការណ៍នៃការវិនិយោគ​​នៅកម្ពុជាទៅដល់​ស្ថាប័ននានា ដើម្បីជាការជំនួយស្មារតីដល់ភាគីពាក់ព័ន្ធឱ្យបានយល់អំពី​បរិយាកាសវិនិយោគនៅកម្ពុជា។

លោកបណ្ឌិតបានបន្តថា ៖

«ទិន្នន័យទាំងនោះអាចឱ្យក្រសួង-ស្ថាប័ន​ស្វែងយល់ពី​លក្ខខណ្ឌ​វិនិយោគផ្សេងៗ ក៏ដូចជាឱកាស​នៃការ​វិនិយោគថ្មីៗ ការពេញចិត្តនានារបស់វិនិយោគិនចាស់ៗនៅកម្ពុជា ដើម្បីជាមូលដ្ឋានគំនិតក្នុងការទាក់ទាញវិនិយោគថ្មីៗទៅតាមវិស័យ និងស្របតាមស្ថាប័នដែលពួកគាត់​ទទួលខុសត្រូវ»។

លោកបណ្ឌិតបានយល់ឃើញផងដែរថា កិច្ចសហការនេះជាការផ្សព្វផ្សាយព័ត៌មានអំពីការវិនិយោគឱ្យបានកាន់តែទូលំទូលាយថែមទៀត ដោយហេតុថាព័ត៌មានទាំងនេះមិនមានអ្វីត្រូវលាក់​លៀមនោះទេ ពោលគឺរាល់ការវិនិយោគទាំងអស់ត្រូវតែផ្សព្វផ្សាយ ត្រូវផ្ដល់ជូនទៅដល់ស្ថាប័នមុខការ​របស់រាជរដ្ឋាភិបាលទាំងអស់ ដើម្បីជា​ប្រយោជន៍​ក្នុងការអភិវឌ្ឍសេដ្ឋកិច្ចកម្ពុជាទាំងមូល។

ក្រៅពីប្រយោជន៍ដោយផ្ទាល់ទៅលើការវិនិយោគនៅកម្ពុជា លោកបណ្ឌិត ហុង វណ្ណៈ ក៏បានគូសបញ្ជាក់ផងដែរថា ការផ្លាស់ប្ដូរទិន្នន័យគ្នានេះក៏នឹងត្រូវធ្វើឡើងតាមរយៈថ្នាលឌីជីថល ដែលគ្រប់ក្រសួង-ស្ថាប័នដែលពាក់ព័ន្ធ អាចចូលមើលបាន ដូច្នេះ ចង់ ឬមិនចង់ វានឹងរួមចំណែកក្នុងការជំរុញនូវគោលនយោបាយរដ្ឋាភិបាលឌីជីថលរបស់កម្ពុជា។

គួររំលឹកផងដែរថា គោលនយោបាយឌីជីថល គឺជាកម្មវិធីមួយដែលស្ថិតក្នុងយុទ្ធសាស្ត្របញ្ចកោណ ហើយគោលនយោបាយនេះមានគោលបំណងកសាងរដ្ឋាភិបាលវៃឆ្លាត (រដ្ឋាភិបាលឌីជីថល) ដោយឈរ​លើមូលដ្ឋាន​នៃការ​ប្រើប្រាស់ហេដ្ឋារចនាសម្ព័ន្ធ និងបច្ចេកវិទ្យាឌីជីថលជាប្រព័ន្ធអេកូឡូស៊ី សម្រាប់​ការធ្វើ​ទំនើប​កម្ម​ប្រព័ន្ធអភិបាលកិច្ច និងការកែទម្រង់លើគ្រប់វិស័យប្រកបដោយតម្លាភាព និងការជឿ​ទុកចិត្ត៕