សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ គិតមកត្រឹមបច្ចុប្បន្ន មានក្រុមហ៊ុនចំនួន ២៥ក្រុមហ៊ុនដែលបានចុះបញ្ជីលក់ទាំងមូលបត្រកម្មសិទ្ធិ និងមូលបត្របំណុល ដោយក្រុមហ៊ុនទាំងអស់នោះបានកៀរគរប្រមូលទុនបានប្រមាណ៦៤៨ លានដុល្លារអាម៉េរិក ហើយប្រសិនបើបូកបញ្ចូលទាំងក្រុមហ៊ុន ពីកាសូ ទៀត នឹងទទួលបានប្រមាណ ៦៦០លានដុល្លារអាម៉េរិក។
ឯកឧត្តម ហុង សុហួរ ប្រតិភូរាជរដ្ឋាភិបាល ទទួលបន្ទុកជាអគ្គនាយកនៃផ្សារមូលបត្រកម្ពុជា បានថ្លែងឱ្យដឹងដូច្នេះនៅក្នុង កម្មពិធី រ៉ូដសូ ស្តីពីការបោះផ្សាយលក់មូលបត្រកម្មសិទ្ធិជាសាធារណៈលើកដំបូងរបស់ ក្រុមហ៊ុន ពីកាសូ ស៊ីធី ហ្គាដិន ឌីវេឡុបមិន ម.ក” នៅផ្សារមូលបត្រកម្ពុជា (ផមក)នាព្រឹកថ្ងៃទី១៤ ខែតុលា ឆ្នាំ២០២៥ ។
ឯកឧត្តម ហុង សុហួរ បានមានប្រសាសន៍ថា៖
« យើងរំពឹងថា នៅត្រឹមចុងឆ្នាំនេះ យើងនឹងទទួលបានក្រុមហ៊ុនចុះបញ្ជីលក់មូលបត្របំណុលមួយបន្ថែមទៀតជាមួយទឹកប្រាក់ប្រមាណ៤០លានដុល្លារអាម៉េរិក។ ដូច្នេះ គិតត្រឹមចុងឆ្នាំ២០២៥នេះ យើងរំពឹងថាទឹកប្រាក់ដែលក្រុមហ៊ុនកៀរគរសរុបនឹងកើនឡើងដល់ ៧០០លានដុល្លារអាមេរិក»។
ឯកឧត្តមអគ្គនាយកផ្សារមូលបត្រកម្ពុជា បានឱ្យដឹងថា៖ ក្រុមហ៊ុន ពីកាសូ គ្រោងនឹងកៀរគរទឹកប្រាក់សរុបចំនួន ១២លានដុល្លារអាម៉េរិក ជាមួយចំនួនភាគហ៊ុនបោះផ្សាយសរុប ១០លានភាគហ៊ុន និងថ្លៃបោះផ្សាយ ៤.៨០០រៀលក្នុងមួយភាគហ៊ុន។ ជាមួយនឹងភាពទាក់ទាញ ក្រុមហ៊ុនបានផ្តល់ភាគលាភធានាអប្បបរមាចំនួន ៧%សម្រាប់រយៈពេល ៥ឆ្នាំ បន្ទាប់ពីចុះបញ្ជី។
គួរជម្រាបថា ក្រុមហ៊ុន ពីកាសូ ស៊ីធី ហ្គាឌិន ឌីវេឡុបម៉ិន ម.ក (PCG) បានចាប់ផ្តើមយុទ្ធនាការជាផ្លូវការរបស់ខ្លួនសម្រាប់កម្មវិធីរ៉ូដសូជាលក្ខណ:អន្តរជាតិ បន្ទាប់ពីកម្មវិធីរ៉ូដសូលើកដំបូងជាផ្លូវការរបស់ខ្លួនទទួលបានជោគជ័យនៅទីក្រុងភ្នំពេញ។ ក្រុមហ៊ុន ពីកាសូ មានសកម្មភាពអាជីវកម្មចម្បងគឺអភិវឌ្ឍន៍អចលនទ្រព្យលំដាប់ខ្ពស់ ដោយរួមបញ្ចូលនូវសិល្បៈរបស់វិចិត្រករដ៏ល្បីល្បាញ លោក Pablo Picasso ជាមួយនឹងទស្សនវិស័យវែងឆ្ងាយ។
ឯកឧត្តមបណ្ឌិត ហេង វុទ្ធី ប្រធានសមាគមវិនិយោគចិននៅកម្ពុជា និងទីប្រឹក្សាសេដ្ឋកិច្ចសម្តេចធិបតី ហ៊ុន ម៉ាណែតនាយករដ្ឋមន្ត្រីនៃព្រះរាជាណាចក្រកម្ពុជា បានថ្លែងថា៖ ការចុះបញ្ជីនេះ នឹងធ្វើឱ្យក្រុមហ៊ុន Picasso City Garden ក្លាយជាក្រុមហ៊ុនអចលនទ្រព្យទី១ដែលធ្វើការបោះផ្សាយលក់មូលបត្រកម្មសិទ្ធិលើកដំបូងជាសាធារណៈក្នុងឆ្នាំ២០២៥ និងជាក្រុមហ៊ុនទី១២ដែលបានចុះបញ្ជីក្នុងផ្សារមូលបត្រកម្ពុជា។ ការចូលរួមនេះមិនត្រឹមតែជួយពង្រឹងទំនុកចិត្តរបស់វិនិយោគិនទេ ប៉ុន្តែថែមទាំងជួយបង្កើនលំហូរសាច់ប្រាក់ និងសកម្មភាពពាណិជ្ជកម្មក្នុងទីផ្សារមូលធន បង្កើតឱកាសវិនិយោគថ្មីៗ និងជំរុញឱ្យមានការចូលរួមកាន់តែច្រើនពីវិស័យឯកជន។
ឯកឧត្តម សៀង ធីរិទ្ធ អគ្គនាយករងនៃនិយ័តករមូលបត្រកម្ពុជា(ន.ម.គ) បានមានប្រសាសន៍ថា៖ ក្រុមហ៊ុនពីកាសូបានដាក់ពាក្យស្នើសុំបោះផ្សាយលក់មូលបត្រកម្មសិទ្ធិមក ន.ម.ក.និងទទួលបានការអនុញ្ញាតឱ្យធ្វើការបោះផ្សាយលក់មូលបត្រកម្មសិទ្ធិជាសាធារណៈពីក្រុមប្រឹក្សាអាជ្ញាធរសេវាហិរញ្ញវត្ថុមិនមែនធនាគារ កាលពីថ្ងៃទី៣ ខែតុលា ឆ្នាំ២០២៥ កន្លងទៅនេះ។ ក្រុមហ៊ុនចាប់ផ្តើមធ្វើបរិវិសកម្មមូលបត្រកម្មសិទ្ធិ ចាប់ពីថ្ងៃទី១៣-២៤ ខែតុលា ឆ្នាំ២០២៥ ហើយនាថ្ងៃ១៤តុលានេះ ក្រុមហ៊ុនបានបន្តនីតិវិធីនៃការបោះផ្សាយរបស់ខ្លួនតាមរយៈ ការធ្វើរ៉ូដសូ។
ឯកឧត្តម សៀង ធីរិទ្ធ បានបន្តថា៖ ទន្ទឹមនឹងនេះ គិតមកដល់ពេលនេះក្រុមហ៊ុនដែលបានបោះផ្សាយ និងចុះបញ្ជីលក់មូលបត្រនៅផ្សារ មូលបត្រកម្ពុជា បានប្រមូលសាច់ប្រាក់ពីទីផ្សារក្នុងរង្វង់៦៥០លានដុល្លារអាម៉េរិក ដោយក្នុងនោះ មានក្រុមហ៊ុនចុះ បញ្ជីលក់មូលបត្រកម្មសិទ្ធិចំនួន ១១ (ទាំងក្នុងទីផ្សារគោល (៩) និងទីផ្សារកំណើន (២)) និងក្រុមហ៊ុនចុះបញ្ជីលក់ មូលបត្របំណុលចំនួន ១៤ ដោយរួមបញ្ចូលទាំងសញ្ញាបណ្ណបៃតង និងសញ្ញាបណ្ណចីរភាព ។
លោក Teng, Cheng-Yueh ប្រធានក្រុមប្រឹក្សាភិបាលនៃក្រុមហ៊ុន ខេមបូឌា ស៊ីឃ្យូរឹធី បានថ្លែងថា៖ ខេមបូឌា ស៊ីឃ្យូរឹធីមិនត្រឹមផ្តោតលើការលើកកម្ពស់និងបង្កើនទីផ្សារមូលធនក្នុងស្រុកទេ គឺបានខិតខំប្រឹងប្រែងពង្រីកខ្លួនទៅដល់បណ្តាប្រទេសជាច្រើននៅអាស៊ី និងបានណែនាំឱកាសកម្ពុជាទៅស្ថាប័នអន្តរជាតិ។លោកសង្ឃឹមថា៖ទីផ្សារមូលធនរបស់កម្ពុជានឹងកាន់តែមានសក្តានុពល៕
Account
Security
Favourite Content