សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា បានឱ្យដឹងថា ការប្រើប្រាស់ថាមពលអគ្គិសនីនៅទូទាំងប្រទេសឆ្នាំ២០២៤នេះ បានកើនឡើង១៥.៥៦ភាគរយ បើធៀបនឹងការប្រើប្រាស់ថាមពលនៅឆ្នាំ២០២៣។ សម្តេចធិបតី បានលើកឡើងបែបនេះក្នុងឱកាសសម្ដេចធិបតីបានអញ្ជើញបិទសន្និបាតបូកសរុបលទ្ធផលការងារឆ្នាំ២០២៣ និងឆ្នាំ២០២៤ និងទិសដៅការងារឆ្នាំ២០២៥ របស់ក្រសួងរ៉ែ និងថាមពល កាលពីរសៀលថ្ងៃទី២១ ខែវិច្ឆិកា ឆ្នាំ២០២៤។
សម្តេចធិបតី ហ៊ុន ម៉ាណែត បានថ្លែងថា ៖ បច្ចុប្បន្ននេះការប្រើប្រាស់ថាមពលអគ្គិសនីទូទាំងប្រទេសក្នុងឆ្នាំ២០២៤នេះ បានកើនឡើង១៥,៥៦ភាគរយ ធៀបទៅនឹងការប្រើប្រាស់នៅឆ្នាំ២០២៣ ក្នុងនោះ៨៦.៦៧ភាគរយ ជាបរិមាណថាមពលដែលផលិតក្នុងស្រុក និងចំនួន១៣.៣ភាគរយជាបរិមាណនាំចូលពីប្រទេសជិតខាង។ ចំណុចសំខាន់ៗក្នុងវិស័យថាមពលរួមមាន ការបន្ដកិច្ចខិតខំប្រឹងប្រែង ដើម្បីឱ្យការផ្គត់ផ្គង់វិស័យថាមពលមានគ្រប់គ្រាន់ និងគ្រប់ទីកន្លែង ខណៈដែលព្រះរាជាណាចក្រកម្ពុជា កំពុងមានស្ថេរភាពនយោបាយ-សេដ្ឋកិច្ច និងកម្រិតជីវភាពរបស់ប្រជាពលរដ្ឋ កាន់តែល្អប្រសើរឡើង សេចក្ដីត្រូវការ និងភាពចាំបាច់នៃការប្រើប្រាស់ថាមពល កាន់តែកើនឡើងជាលំដាប់។
សម្តេចធិបតី ហ៊ុន ម៉ាណែត បានគូសបញ្ជាក់ថា ៖
«ជាមួយគ្នានេះ ការខិតខំប្រឹងប្រែងអភិវឌ្ឍន៍ខ្សែបណ្ដាញផ្គត់ផ្គង់គ្រប់កម្រិតរហូតដល់ចុងឆ្នាំ២០២៤នេះ បានធ្វើឱ្យវិសាលភាពនៃការផ្គត់ផ្គង់អគ្គិសនីពីប្រព័ន្ធបណ្ដាញជាតិ បានគ្រប់ដណ្ដប់លើភូមិចំនួន៩៩.១៥ភាគរយ នៃចំនួនភូមិទូទាំងប្រទេស ក្នុងនោះការភ្ជាប់បណ្តាញឱ្យទីតាំងអ្នកប្រើប្រាស់គ្រប់ប្រភេទនៅចុងឆ្នាំ២០២៤ បានឡើងដល់ចំនួន ៣,៨៦លានទីតាំង គឺកើនឡើងប្រមាណ៤ភាគរយ ធៀបទៅនឹងឆ្នាំ២០២៣ ដែលជាសមិទ្ធផលធំមួយរបស់វិស័យថាមពលជួយបំពេញតម្រូវការប្រើប្រាស់របស់ប្រជាពលរដ្ឋជាក់ស្ដែង»។
យោងតាមរបាយការណ៍របស់ ឯកឧត្តម កែវ រតនៈ រដ្ឋមន្ត្រីក្រសួងរ៉ែ និងថាមពល បានឱ្យដឹងថា គិតត្រឹមខែកញ្ញា ឆ្នាំ២០២៤ ចំនួនអនុស្ថានីយ៍កើនឡើងរហូតដល់ ៧០កន្លែង និងបច្ចុប្បន្នប្រព័ន្ធបណ្តាញជាតិ បានគ្របដណ្តប់ ៩៩.១៥% នៃចំនួនភូមិទូទាំងប្រទេស និងភ្ជាប់ចរន្តឱ្យលំនៅឋានប្រជាពលរដ្ឋរហូតដល់ ៩៧.៨២% នៃលំនៅដ្ឋានទូទាំងប្រទេស ធ្វើឱ្យអ្នកប្រើប្រាស់ទទួលបានការផ្តល់សេវាផ្គត់ផ្គង់អគ្គិសនីស្មើភាពគ្នា ទាំងថ្លៃ ទាំងគុណភាព ទាំងការភ្ជាប់ចរន្ត និងទាំងសេវាផ្សេងៗទៀត ហើយក៏កំពុងដាក់ចេញនូវកម្មវិធី «គីឡូម៉ែត្រចុងក្រោយ The Last Mile» ធ្វើឱ្យកម្ពុជាឆ្ពោះទៅមានអគ្គិសនីប្រើប្រាស់ ១០០ភាគរយ។
ឯកឧត្តម កែវ រតនៈបានបញ្ជាក់ថា៖ លទ្ធផលនៃការអភិវឌ្ឍប្រព័ន្ធបណ្តាញបញ្ជូនតង់ស្យុងខ្ពស់ និងអនុស្ថានីយ៍ជាបន្តបន្ទាប់ បានធ្វើឱ្យខ្សែបណ្តាញបញ្ជូនអគ្គិសនីតង់ស្យុងខ្ពស់កម្ពុជា កើនឡើងពី ៣៧០៨,៥៦គីឡូម៉ែត្រ នៅឆ្នាំ២០២៣ រហូតដល់ ៣៨៩០.៦៥៧គីឡូម៉ែត្រ និងធ្វើឱ្យចំនួនអនុស្ថានីយ៍កើនពី៦៨កន្លែងនៅឆ្នាំ២០២៣ រហូតដល់ ៧០កន្លែង គិតត្រឹមខែកញ្ញា ឆ្នាំ២០២៤។
ឯកឧត្តម កែវ រតនៈ បានបញ្ជាក់ថា ដើម្បីបង្កើនការផ្គត់ផ្គង់ប្រកបដោយសមធម៌រវាងទីក្រុង និងជនបទ ក្រសួងនឹងបន្តធ្វើការអភិវឌ្ឍហេដ្ឋារចនាសម្ព័ន្ធបញ្ជូនរង និងចែកចាយ ដើម្បីពង្រីកវិសាលភាព និងសមត្ថភាពផ្គត់ផ្គង់ឱ្យបានដល់គ្រប់ទីកន្លែង៕
Account
Security
Favourite Content