សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ធ្លាប់តែឮគេនិយាយថា ប្លង់រឹង ប្លង់ទន់ ហើយពេលទិញដី ឬទិញផ្ទះពីទីណាមួយគេតែងតែសួរថា តើដី ឬផ្ទះជាប្រភេទប្លង់រឹង ឬប្លង់ទន់ ។ តើប្លង់រឹង និងប្លង់ទន់ មានភាពខុសគ្នាដូចម្ដេច ហើយអ្នកកាន់ប្លង់រឹង និងប្លង់ទន់មានតម្លៃខុសគ្នាយ៉ាងណាដែរ ។ ថ្ងៃនេះ AMS Economy នឹងបង្ហាញពីភាពខុសគ្នារវាងប្លង់រឹង និងប្លង់ទន់ឱ្យបានដឹងកាន់តែច្បាស់ ។
ប្លង់ទន់ គឺជាប្រភេទលិខិតផ្ទេរសិទ្ធិកាន់កាប់ ដោយមានការចុះហត្ថលេខា និងបោះត្រាទទួលស្គាល់ដោយអាជ្ញាធរមូលដ្ឋាន រួមមានមេភូមិ មេឃុំ/ចៅសង្កាត់ អភិបាលស្រុក ខណ្ឌ ឬអភិបាលក្រុង ឬហៅកាត់យ៉ាងខ្លីថា «លិខិតផ្ទេរសិទ្ធិកាន់កាប់អចលនទ្រព្យដែលមិនទាន់ចុះបញ្ជី» ។ អ្នកកាន់កាប់លើអចលនទ្រព្យដែលមានប្លង់ទន់ ត្រូវបានទទួលស្គាល់ថា ជាអ្នកមានសិទ្ធិរស់នៅ និងចាត់ចែងលើទីតាំងអចលនវត្ថុ តែពុំទាន់ក្លាយជាកម្មសិទ្ធិស្របច្បាប់លើអចលនវត្ថុនោះនៅឡើយទេ ។ ដូច្នេះ ដើម្បីឱ្យក្លាយជាម្ចាស់កម្មសិទ្ធិ តម្រូវឱ្យមានការវិនិច្ឆ័យ និងការបញ្ជាក់តាមផ្លូវច្បាប់ថាម្ចាស់ទីតាំងនោះជាភាគីដែលបំពេញលក្ខខ័ណ្ឌគតិយុត្តិសម្រាប់ការទទួលបានសិទ្ធិភោគ ឬហៅថាសិទ្ធិជាម្ចាស់ទ្រព្យ និងកម្មសិទ្ធិជាស្ថាពរ ។ ការបញ្ជាក់នេះ ត្រូវបានគ្រប់គ្នាស្គាល់ថា កាត់ប្លង់រឹង ។
អចលនវត្ថុដែលមានប្លង់ទន់ ប្រឈមនឹងហានិភ័យមួយចំនួនដូចជា ការទាមទារពីសំណាក់ភាគីផ្សេង បូករួមនឹងរដ្ឋផងដែរ ដោយសារការកាន់កាប់លើដីរបស់រដ្ឋ ឬដីដែលមានម្ចាស់ហើយ ព្រោះមិនច្បាស់លាស់ ដែលនាំឱ្យមានជម្លោះដណ្ដើមព្រំដីគ្នាជាដើម ។
ចំណែកប្លង់រឹង ជាប្រភេទប័ណ្ណកម្មសិទ្ធិដែលរឹងទាំងក្រដាស និងមានភាពរឹងមាំទាំងប្រសិទ្ធភាពផ្លូវច្បាប់ ហើយសម្រាប់អ្នកកាន់កាប់អចលនទ្រព្យដែលមានប្លង់រឹងបានបញ្ជាក់ពីការបានចុះបញ្ជីត្រឹមត្រូវនៅក្នុងរដ្ឋបាលសុរិយោដី ឬក៏ហៅកាត់ថា «វិញ្ញាបនបត្រសម្គាល់ម្ចាស់អចលនវត្ថុ» ។
ការចុះបញ្ជីប្លង់រឹងអាចធ្វើទៅបានតាមដំណើរការ២ផ្សេងគ្នា គឺការចុះបញ្ជីដាច់ដោយដុំ និងការចុះបញ្ជីមានលក្ខណៈជាប្រព័ន្ធ។ ប្លង់រឹង ដែលបានមកពីការចុះបញ្ជីដាច់ដោយដុំ ជាប័ណ្ណកម្មសិទ្ធិដែលសម្គាល់ដោយសិទ្ធិភោគ ឬសិទ្ធិជាម្ចាស់ទ្រព្យ ដែលជាទូទៅត្រូវបានចេញដោយអាជ្ញាធរភូមិបាលស្របតាមនីតិវិធីនៃការចុះបញ្ជីដាច់ដោយដុំ ដែលធ្វើឡើងយោងតាមការស្នើសុំរបស់សាម៉ីខ្លួនដែលជាម្ចាស់ទ្រព្យ ។
ប្លង់រឹងដែលបានមកពីការចុះបញ្ជីជាប្រព័ន្ធ ជាប័ណ្ណកម្មសិទ្ធិ ដែលចេញជូនបន្ទាប់ពីបញ្ចប់ដំណើរការចុះបញ្ជីជាប្រព័ន្ធ ដែលផ្ដួចផ្ដើមឡើងដោយក្រសួងរៀបចំដែនដី នគរូបនីយកម្មនិងសំណង់ នៅតាមតំបន់វិនិច្ឆ័យនានាជាកំណត់ ។ ប័ណ្ណនេះមិនមានការជំទាស់ពីភាគីណាមួយទាក់ទងនឹងសិទ្ធិទំហំ ឬព្រំប្រទល់អ្វីទៀតឡើយ ព្រោះវាត្រូវបានជូនដំណឹងជាសាធារណៈពីការចុះវាស់វែង ព្រមជាមួយការកំណត់ទីតាំងតាមនិយាមកាមច្បាស់លាស់ដោយប្រព័ន្ធ GPS ពេលដែលប្លង់ចេញជាស្ថាពរជូនដល់ម្ចាស់កម្មសិទ្ធិនីមួយៗ ។
ក្រសួងរៀបចំដែនដី នគរូបនីយកម្ម និងសំណង់ បាន និងកំពុងជំរុញឱ្យមានការចុះបញ្ជីដីធ្លី ឱ្យបានចប់សព្វគ្រប់នៅពេលឆាប់ៗដែលសំដៅទៅដល់គ្រប់ដីធ្លីទាំងអស់ត្រូវមានប្លង់រឹងមិនថាជាដីរបស់រដ្ឋ ឬជាដីរបស់ឯកជន ។ ការចុះបញ្ជីដីធ្លីនេះដែរ ក៏នឹងបញ្ចប់ករណីវិវាទីដីធ្លី រវាងរដ្ឋ និងឯកជន និងរវាងឯកជន និងឯកជនផងដែរ ៕
Account
Security
Favourite Content