សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ គិតត្រឹមចុងខែមីនា ឆ្នាំ២០២៥នេះ គម្រោងសាងសង់កំណាត់ផ្លូវជាតិលេខ៧ ពីរង្វង់មូលស្គន់ទៅដល់គល់ស្ពានគីហ្សូណា ក្រុងកំពង់ចាម ខេត្តកំពង់ចាម ប្រវែង៤៥,៥គីឡូម៉ែត្រ សម្រេចបានសមិទ្ធផលប្រមាណ៤៣ភាគរយហើយ ដោយនឹងបញ្ចប់ទាំងស្រុងនៅអំឡុងឆ្នាំ ២០២៦ខាងមុខនេះហើយ ។
យោងតាមសេចក្ដីប្រកាសព័ត៌មានរបស់ក្រសួងសាធារណការ និងដឹកជញ្ជូន បានឱ្យដឹងថា ផ្អែកតាមសន្ទុះល្បឿន និងភាពមមាញឹកនៃការដ្ឋាន កំណាត់ផ្លូវដ៏សំខាន់នេះ នឹងសម្រេចវឌ្ឍនភាពក្នុងអំឡុងឆ្នាំ២០២៦ ខាងមុខ លឿនជាងផែនការដែលបានគ្រោងទុក ។
ក្រសួងសាធារណការ និងដឹកជញ្ជូនឱ្យដឹងថា គិតត្រឹមដើមសប្ដាហ៍ទី៣ នៃខែមីនា ឆ្នាំ២០២៥ គម្រោងពង្រីក និងលើកកម្រិតផ្លូវជាតិលេខ៧ជាបួនគន្លង (ស្គន់-កំពង់ចាម)ប្រវែងសរុប ៤៥,៥០ គីឡូម៉ែត្រ (PK000+000 – PK45+502.84) ចាប់ផ្តើមពីស្រុកជើងព្រៃ ខេត្តកំពង់ចាម រហូតដល់ ក្រុងកំពង់ចាម ខេត្តកំពង់ចាម ការអនុវត្តគម្រោងសម្រេចបានលទ្ធផលជារួម ៤៣ភាគរយហើយ ។ គម្រោងពង្រីក និងលើកកម្រិតផ្លូវជាតិលេខ៧ ត្រូវធ្វើឡើងជាប្រភេទAC(Asphalt concrete) កម្រាស់៩សង់ទីម៉ែត្រ ទទឹងផ្លូវ ២៤,៥ម៉ែត្រ(៤គន្លង) ដោយត្រូវសាងសង់ស្ពានថ្មីតូច-ធំ ចំនួន៨(ស្មើប្រវែងសរុប ១៥៦ម៉ែត្រ) ជួសជុលស្ពានតូច-ធំ(ចាស់)ចំនួន៧ស្ពាន(ស្មើប្រវែងសរុប ១១៦ម៉ែត្រ) លូរំដោះទឹកភ្លៀង លូរំដោះទឹកកខ្វក់ និងជាបរិក្ខារចរាចរណ៍នានា។
ផ្លូវជាតិលេខ៧ គឺជាខ្សែផ្លូវយ៉ាងសំខាន់ និងជាសរសៃឈាមសេដ្ឋកិច្ចដ៏មានសក្ដានុពល ដើម្បីជួយសម្រួលការធ្វើដំណើរ ការដឹកជញ្ជូនផលិតផលកសិកម្ម កសិឧស្សាហកម្ម ព្រមទាំងលើកកម្ពស់ការអភិវឌ្ឍ និងសកម្មភាពសេដ្ឋកិច្ច-សង្គមជាតិ។ ខ្សែផ្លូវនេះតភ្ជាប់ជាមួយផ្លូវជាតិលេខ៦ ពីរង្វង់មូលស្គន់ ឆ្ពោះទៅទិសដៅរាជធានីភ្នំពេញ និងជាទិសដៅទៅខេត្តកំពង់ធំ សៀមរាប និងតភ្ជាប់ទៅតាមបណ្ដាញផ្លូវសំខាន់ៗផ្សេងៗទៀត។
កំណាត់ផ្លូវជាតិនេះ ក៏តភ្ជាប់ជាមួយផ្លូវជាតិលេខ៨ និងផ្លូវជាតិលេខ១១ ឆ្ពោះទៅកាន់ខេត្តព្រៃវែង និងតភ្ជាប់ជាមួយផ្លូវ ៧១C,ផ្លូវជាតិលេខ៧៣ ឆ្ពោះទៅកាន់ខេត្តត្បូងឃ្មុំ និងផ្លូវជាតិលេខ៧៦ ផ្លូវជាតិលេខ៧៨ ឆ្ពោះទៅកាន់ខេត្តស្ថិតនៅភូមិភាគឦសាន រួមមាន ខេត្តក្រចេះ ស្ទឹងត្រែង មណ្ឌលគិរី និងខេត្តរតនគិរី និងភ្ជាប់ជាមួយបណ្តាញខ្សែផ្លូវរបស់បណ្តាប្រទេស នៃមហាអនុតំបន់មេគង្គ(GMS)ផងដែរ ។
បើតាមឯកឧត្តម លឹម ស៊ីដេនីន រដ្ឋលេខាធិការក្រសួងសាធារណការ និងដឹកជញ្ជូនបានមានប្រសាសន៍ថា ចាប់ពីដើមខែមេសា ឆ្នាំ២០២៥នេះ ប្រជាពលរដ្ឋអាចធ្វើដំណើរបានស្រួលជាងមុន ដោយគម្រោងបានសម្រេចនូវការក្រាលថ្ម និងចាក់កៅស៊ូបានបណ្ដើរៗហើយ ហើយក៏បានរៀបចំសួនច្បារកណ្ដាលផ្លូវជាបន្តបន្ទាប់ ប៉ុន្តែខណៈដែលការដ្ឋានកំពុងមមាញឹកខ្លាំង សូមអំពាវនាវដល់អ្នកប្រើប្រាស់កំណាត់ផ្លូវជាតិលេខ៧(ស្គន់-កំពង់ចាម)មេត្តាប្រុងប្រយ័ត្នខ្ពស់ ដោយត្រូវបើកបរក្នុងល្បឿនមួយអាចគ្រប់គ្រងបាន ដើម្បីធានាសុវត្ថិភាពខ្លួនឯង និងអ្នកដទៃ និងបើកបរក្នុងល្បឿនសមល្មមដែលជាផ្នែកមួយជួយកាត់បន្ថយការហុយធូលីលើបងប្អូនប្រជាពលរដ្ឋនៅតាមដងផ្លូវ ។
ភ្នាក់ងារអចលនវត្ថុមួយរូបប្រចាំខេត្តកំពង់ចាម លោកស្រី ក្រី ម៉ាយ៉ាន បានលើកឡើងថា គម្រោងផ្លូវជាតិលេខ៧ អាចនឹងធ្វើឱ្យមានការទាក់ទាញការវិនិយោគតាមបណ្ដោយផ្លូវជាតិនេះបន្ថែម ជាពិសេសគម្រោងវិនិយោគលើរោងចក្រ និងឃ្លាំងស្តុកទំនិញ ។ តាមរយៈនេះដែរ ក៏នឹងជំរុញឱ្យតម្លៃដីធ្លីនៅតាមបណ្ដោយផ្លូវមួយនេះមានសន្ទុះមួយកម្រិតផងដែរ ប៉ុន្តែស្របនឹងបច្ចុប្បន្ននេះ ស្ថានភាពអចលនទ្រព្យនៅមិនទាន់ប្រសើរទូទាំងប្រទេស ក៏ដូចជាស្ថានភាពសេដ្ឋកិច្ចពិភពលោកនៅមិនទាន់ប្រសើរនោះ ការទិញលក់ក៏ដូចជាការវិនិយោគលើអចលនទ្រព្យតាមបណ្ដោយផ្លូវជាតិលេខ៧ ក៏ដូចជាកំពង់ចាមទាំងមូលនៅតែមិនទាន់មានសកម្មភាពកើនឡើងខ្លាំងនៅឡើយទេ ៕
Account
Security
Favourite Content