សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស ៖ យោងតាមប្រភពពីរ៉យទ័រ បានរាយការណ៍ថា សហភាពអឺរ៉ុបកំពុងពិចារណាលើការដាក់ពន្ធលើទំនិញដែលនាំចូលពីរុស្ស៊ីមានតម្លៃរហូតដល់ ៤២ ពាន់លានអឺរ៉ូ (៤៦ ពាន់លានដុល្លារ) កំណត់គោលដៅលើការនាំចូលស្បៀងអាហារ ថាមពលនុយក្លេអ៊ែរ និងថ្នាំពេទ្យ។
ទោះបីជាពាណិជ្ជកម្មសហភាពអឺរ៉ុបភាគច្រើនជាមួយរុស្ស៊ីត្រូវបានបញ្ឈប់ដោយសារជម្លោះអ៊ុយក្រែន ប៉ុន្តែការនាំចូលមួយចំនួននៅតែត្រូវបានអនុញ្ញាត ដោយសារតែមិនមានការផ្គត់ផ្គង់ជំនួស ឬដោយសារការព្រួយបារម្ភអំពីការរំខានទីផ្សារពិភពលោក។
កាលពីថ្ងៃព្រហស្បតិ៍ សប្ដាហ៍កន្លងទៅ រដ្ឋមន្ត្រីពាណិជ្ជកម្មសហភាពអឺរ៉ុប បានស្នើឲ្យគណៈកម្មការអឺរ៉ុបបង្កើតផែនការដើម្បីដាក់ពន្ធលើការនាំចូលអាហារ ឥន្ធនៈ នុយក្លេអ៊ែរ និងថ្នាំពេទ្យ ខណៈដែល លោក Valdis Dombrovskis ស្នងការពាណិជ្ជកម្មរបស់សហភាពអឺរ៉ុប បានលើកឡើងថា គំនិតផ្តួចផ្តើមស្តីពីការប្រើប្រាស់ពន្ធឲ្យកាន់តែទូលំទូលាយត្រូវបានដាក់ចេញដោយស៊ុយអែត ហើយខាងគណៈកម្មការអឺរ៉ុបនឹងវាយតម្លៃរឿងនេះ និងផ្តល់ជម្រើសដល់រដ្ឋជាសមាជិក។
រដ្ឋមន្ត្រីពាណិជ្ជកម្មស៊ុយអែត លោក Johan Forssell បានលើកឡើងថា វាមានសារៈសំខាន់ណាស់ក្នុងការកាត់បន្ថយប្រាក់ចំណូលរបស់រុស្ស៊ី ហើយប្រាក់ចំណូលពីពន្ធគយទាំងនេះអាចនឹងត្រូវចំណាយដើម្បីជួយអ៊ុយក្រែន។ លោកបានអំពាវនាវឱ្យមានការប្រើប្រាស់ពន្ធទូលំទូលាយលើពាណិជ្ជកម្មទាំងអស់នោះ ប៉ុន្តែវាមានភាពរសើបនៅក្នុងតំបន់មួយចំនួន។
កាលពីថ្ងៃព្រហស្បតិ៍ សប្ដាហ៍កន្លងទៅ រដ្ឋមន្ត្រីសហភាពអឺរ៉ុបបានអនុម័តបទប្បញ្ញត្តិដំឡើងពន្ធលើការនាំចូលគ្រាប់ធញ្ញជាតិរុស្ស៊ី និងបេឡារុស។ ពន្ធហាមឃាត់នេះនឹងចូលជាធរមាននៅថ្ងៃទី ១ ខែកក្កដា ដែលនឹងអនុវត្តចំពោះគ្រាប់ធញ្ញជាតិ ប្រេង និងគ្រាប់សណ្តែកពីប្រទេសទាំងពីរ។ យោងតាមប្រភពដដែលបានឲ្យដឹងថា សហភាពអឺរ៉ុបបានកំណត់ពន្ធមានតម្លៃខ្ពស់ ៩៥ អឺរ៉ូក្នុងមួយតោន (១០០ ដុល្លារអាម៉េរិក) ដែលជាការអនុវត្តលើការហាមឃាត់ឲ្យមានប្រសិទ្ធភាព។
ទន្ទឹមនឹងនេះ អ្នកនាំពាក្យវិមានក្រឹមឡាំង លោក Dmitry Peskov បានលើកឡើងថា ការដាក់ពន្ធលើគ្រាប់ធញ្ញជាតិរុស្ស៊ី គឺជាឧទាហរណ៍មួយនៃការប្រកួតប្រជែងអយុត្តិធម៌។ មិនត្រឹមតែប៉ុណ្ណោះ វិធានការនេះនឹងប៉ះពាល់ដល់អ្នកប្រើប្រាស់របស់សហភាពអឺរ៉ុប ។ គួរឲ្យបញ្ជាក់ដែរថា រុស្ស៊ីគឺជាប្រទេសនាំចេញគ្រាប់ធញ្ញជាតិដ៏ធំបំផុតរបស់ពិភពលោក ដោយបានលក់គ្រាប់ធញ្ញជាតិចំនួន ៦០ លានតោនក្នុងឆ្នាំ២០២២-២០២៣។ កាលពីឆ្នាំមុន រុស្ស៊ីបាននាំចេញគ្រាប់ធញ្ញជាតិ និងផលិតផល ៤,២ លានតោនទៅកាន់សហភាពអឺរ៉ុប ដែលមានតម្លៃ ១,៣ ពាន់លានអឺរ៉ូ ខណៈដែលបេឡារុសបានផ្គត់ផ្គង់ប្រហែល ៦១០ ០០០ តោន មានតម្លៃ ២៤៦ លានអឺរ៉ូ។
ទោះជាយ៉ាងណាក្តី សហភាពអឺរ៉ុបមានបំណងអនុម័តទណ្ឌកម្មជុំថ្មីមុនខែកក្កដា ហើយទីក្រុងប្រ៊ូសែលកំពុងអនុម័តទណ្ឌកម្មជុំទី ១៣ នៃការរឹតបន្តឹងប្រឆាំងនឹងទីក្រុងម៉ូស្គូ។ វិធានការនេះមានគោលបំណងបិទចន្លោះប្រហោង ដើម្បីកុំឲ្យរុស្ស៊ីគេចផុតពីការរឹតបន្តឹងតាមរយៈប្រទេសទី៣ ។ លើសពីនេះ ប្រទេសសមាជិកសហភាពអឺរ៉ុបមួយចំនួនក៏បានស្នើឱ្យបន្តដាក់ទណ្ឌកម្មផងដែរ ដើម្បីរួមបញ្ចូលឥន្ធនៈនុយក្លេអ៊ែរដែលលក់ដោយទីក្រុងម៉ូស្គូ។ ទោះបីជាយ៉ាងណាក្តី ប្រធានទីភ្នាក់ងារថាមពលបរមាណូអន្តរជាតិ (IAEA) បានព្រមានថា មិនមានមធ្យោបាយណាមួយក្នុងការផ្លាស់ប្តូរឆ្ងាយពីឥន្ធនៈនុយក្លេអ៊ែររបស់រុស្ស៊ីឲ្យបានលឿននោះទេ ហើយថា ការផ្តាច់ទំនាក់ទំនងឆាប់ពេកនឹងធ្វើឱ្យប៉ះពាល់ដល់ទីផ្សារថាមពលពិភពលោក៕
Account
Security
Favourite Content