សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
សំណល់ប្លាស្ទីក គឺជាប្រភេទកាកសំណល់ដែលមិនងាយរលាយ ហើយអាចផ្ដល់នូវផលប៉ះពាល់ដល់បរិស្ថាន ព្រមទាំងសុខមាលភាពមនុស្សជាតិផងដែរ។ ដូច្នេះ ដើម្បីចៀសវាងការផលិតកាន់តែច្រើននៃប្លាស្ទីក ពិភពលោកកំពុងមាននិន្នាការកែច្នៃប្លាស្ទីកប្រើប្រាស់ឡើងវិញ។
នៅកម្ពុជា និយាយដោយឡែក ការកែច្នៃប្លាស្ទីកដើម្បីប្រើប្រាស់ឡើងវិញ គឺនៅមានកម្រិតតិចតួចនៅឡើយ។ ម្លោះហើយ គេត្រូវការការចូលរួមឱ្យបានច្រើនបន្ថែមទៀតពីប្រជាពលរដ្ឋគ្រប់រូប ដើម្បីគោលបំណងរួមមួយ គឺបង្កើតបរិស្ថានដែលស្រស់់ស្អាត និងមិនមានការបំពុល។ ក្នុងចំណោមសិប្បកម្មកែច្នៃសំណល់ប្លាស្ទីកនៅកម្ពុជា មានសិប្បកម្មមួយដែលជ្រើសរើសយកការបំប្លែងសំណល់ប្លាស្ទីកទៅជាសម្ភារៈប្រើប្រាស់យ៉ាងទាក់ទាញ។
អ្នកនាង Alix Langlois ជាម្ចាស់សិប្បកម្មកែច្នៃប្លាស្ទីកជនជាតិបារាំង ដែលចាប់ផ្ដើមការកែច្នៃរបស់ខ្លួននៅកម្ពុជាក្នុងអំឡុងឆ្នាំ២០១៨។ សិប្បកម្មនេះមានឈ្មោះថា Trash is nice ជាសិប្បកម្មតូចល្មម ដែលមានទីតាំងនៅតំបន់កោះពេជ្រ។
បើតាមម្ចាស់សិប្បកម្មរូបនេះ ក្នុងមួយខែខ្លួនប្រមូលបានសំណល់ប្លាស្ទីកត្រឹមតែប្រមាណ ១០០គីឡូ ប៉ុណ្ណោះសម្រាប់យកទៅកែច្នៃ ហើយដែលសំណល់ទាំងនោះភាគច្រើនបានមកពីក្រុមហ៊ុន ឬបុគ្គលផ្ទាល់ជាអ្នកយកទៅឱ្យខ្លួនដល់សិប្បកម្មតែម្ដង។
យ៉ាងណាក៏ដោយ បើទោះបីជាផលិតផលប្លាស្ទីកចម្រុះពណ៍ដ៏ស្រស់ស្អាត និងច្រើនម៉ូត ច្រើនទម្រង់ ដែលត្រូវបានសាធារណៈជនកោតសរសើរក្ដី ក៏ម្ចាស់សិប្បកម្មរូបនេះនៅតែរក្សាទំហំផលិតឱ្យនៅដដែល។
កាត់សក់ខ្លី ពាក់អាវពណ៍ទឹកប៊ិកក្រម៉ៅ អ្នកនាង Alix Langlois ដែលកំពុងឈរនៅខាងមុខរោងសិប្បកម្មកែច្នៃប្លាស្ទីករបស់ខ្លួនបានរៀបរាប់ប្រាប់ AMS Economy ថា៖
«ទំហំនៃការកែច្នៃរបស់យើងបច្ចុប្បន្នមានទំហំតូចនៅឡើយ ប៉ុន្តែគោលបំណងរបស់យើងក៏មិនមែនចង់កែច្នៃសំណល់ប្លាស្ទីកនៅទូទាំងប្រទេសនោះទេ យើងគ្រាន់តែចង់បង្ហាញប្រាប់អ្នកប្រើប្រាស់ថា ពួកគេគួរតែកែច្នៃប្លាស្ទីកដែលប្រើប្រាស់រួច ដើម្បីប្រើប្រាស់ឡើងវិញ»។
ដើម្បីឱ្យការងារនេះកាន់តែរលូន អ្នកនាង Alix Langlois និងក្រុមការងារ តែងឆ្លៀតបើកវគ្គបណ្ដុះ បណ្ដាលទៅកាន់យុវជន ជាពិសេសសិស្ស និស្សិតឱ្យយល់ពីសារៈសំខាន់នៃការកែច្នៃសំណល់ប្លាស្ទីក ក៏ដូចជាវិធីមួយចំនួនដែលពួកគេអាចប្រើដើម្បីកែច្នៃប្លាស្ទីកដោយខ្លួនឯងបាន។
អ្នកនាង Alix Langlois បានបន្តឱ្យដឹងថា ៖
«យើងចង់ឃើញប្រជាជនកម្ពុជាបានយល់ដឹងកាន់តែច្បាស់ពីផលប៉ះពាល់ដែលប្លាស្ទីកបានជះឥទ្ធិពលដល់ការរស់នៅរបស់ពួកគេ ហើយមិនមែនសម្រាប់តែអ្នករស់នៅក្នុងទីក្រុងភ្នំពេញប៉ុណ្ណោះទេ ពោលគឺសម្រាប់ប្រជាជនទូទាំងប្រទេសតែម្ដង»។
គួរបញ្ជាក់ថា សិប្បកម្ម Trash is nice បច្ចុប្បន្ននេះ បានកែច្នៃសំណល់ប្លាស្ទីកទៅជាសម្ភារៈប្រើប្រាស់ឡើងវិញជាច្រើនប្រភេទ ដូចជា ទម្រកែវ ក្រាស់សិតសក់ បន្តោងសោរ ថូ និងកាបូបតូចៗសម្រាប់ដាក់នាមបណ្ណជាដើម៕
Account
Security
Favourite Content