កំពត ៖ ក្រុមហ៊ុន សុខា អូតែល ដែលមាន អ្នកឧកញ៉ាបណ្ឌិត សុខ គង់ ជាប្រធាន និងជាពុទ្ធសានិកមួយរូបផងដែរនោះ បានទទួលការអនុញ្ញាតពីរាជរដ្ឋាភិបាលកម្ពុជាឱ្យសាងសង់ព្រះពុទ្ធបដិមាកម្ពស់១០៨ម៉ែត្រនៅលើខ្នងភ្នំបូកគោ ទ្រង់គង់ព្រះភ្នែនលើបល្ល័ង្ក បែរព្រះភក្ត្រទៅទិសខាងកើត ស្ថិតក្នុងភូមិសាស្ត្រវាលស្រែ៥០០។

ព្រះពុទ្ធបដិមាដ៏ធំ និងមានកម្ពស់ខ្ពស់បំផុតក្នុងចំណោមពុទ្ធបដិមាខ្ពស់ៗនៅលើពិភពលោក សាងសង់តាមរចនាប័ទ្មខ្មែរក្នុងទម្រង់ព្រះពុទ្ធមារវិជ័យ(ផ្ចាញ់មារ)នៃរចនាប័ទ្មបាយ័នជារចនាប័ទ្មកំពូលនៃព្រះពុទ្ធសាសនាក្នុងរជ្ជកាលព្រះបាទជ័យវ័រ្មនទី៧ នាសតវត្សរ៍ទី១៣ និងសាងសង់ពីបេតុងអាម៉េ ពណ៌មាស បែរព្រះភក្ត្រទៅទិសខាងកើត។ លើសពីនេះក៏នឹងសាងសង់ព្រះពុទ្ធរូប៧អង្គ និងព្រះសាវ័ក៥អង្គផ្សេងទៀតគង់ក្នុងបុស្បុក តម្កល់ជុំវិញព្រះពុទ្ធបដិមាអង្គធំ។ គម្រោងនេះនឹងចំណាយពេលវេលាសាងសង់៤ឆ្នាំ និងថវិកាប្រមាណ ៦០លានដុល្លារសហរដ្ឋអាមេរិក។ ការសាងសង់នេះ គឺជាការរក្សានូវអត្តសញ្ញាណជាតិនៃវប្បធម៌សាសនា និងសម្រាប់ជាទី សក្ការៈដ៏ឧត្តុង្គឧត្តមរបស់ពុទ្ធសាសនិកជនជាតិ-អន្តរជាតិ។ចំពោះខឿនផ្ទាល់ដីមានបណ្តោយ២៤៨ម៉ែត្រ ទទឹង១៨៦ម៉ែត្រ មានជណ្តើរធំចំនួន៤ អមដោយបង្កាន់ដៃនាគតំណាងឱ្យទិសធំៗទាំង៤យក តាមលំនាំរចនាប័ទ្មអង្គរវត្ដក្នុងរជ្ជកាល ព្រះបាទ សូរ្យវរ្ម័ន ទី២ នាសតវត្សរ៍ ទី១២។

ក្នុងពិធីជួបសំណេះសំណាលជាមួយអ្នកសារព័ត៌មានក្នុងពេលក្លិបអ្នកកាសែតកម្ពុជាដឹកនាំមកបំពេញទស្សនកិច្ច ដើម្បីផ្សព្វផ្សាយទ្រង់ទ្រាយធំពីសក្តានុពលនៃការអភិវឌ្ឍន៍ក្រុងបូកគោ​ កាលពីសប្ដាហ៍កន្លងទៅនេះ អ្នកឧញ៉ាបណ្ឌិត សុខ គង់ បានមានប្រសាសន៍ថា ទីតាំងនេះនឹងក្លាយជាគោលដៅទេសចរណ៍វប្បធម៌ជាតិដ៏សំខាន់សម្រាប់ទាក់ទាញភ្ញៀវទេសចរ ជាពិសេស​ រូបព្រះពុទ្ធបដិមាដែលមានកម្ពស់ខ្ពស់ជាងគេនៅតំបន់អាស៊ី និងមានតំបន់តាំងសមាធិមួយចំនួនទៀតស្ថិតនៅលើឧទ្យាជាតិព្រះមុនីវង្សបូកគោ។

លោក ប្រិញ សាវុធ ប្រធាន​ផ្នែក​ទំនាក់ទំនង​ ​តំណាង​ឧកញ៉ា​ សុខ ចន្ធី ​បាន​ឲ្យ​ដឹង​ថា ការ​​សាងសង់​ព្រះ​ពុទ្ធ​បដិមា​ដ៏​​ខ្ពស់​បំផុត​នៅអាស៊ីអាគ្នេយ៍​នេះ បាន​ចាប់ផ្តើម​នៅ​ខែ​កញ្ញា​ ឆ្នាំ ២០២៣ ​ដែលរហូត​ដល់ពេល​នេះ ​វឌ្ឍនភាព​សម្រេច​បាន​ជាង ៣០%​។ ព្រះពុទ្ធបដិមាកម្ពស់ជាង១០០ម៉ែត្រនេះ សាងសង់​នៅលើ​ផ្ទៃដីទំហំ​ជិត ១០០ ហិកតា​ ក្នុងនោះ​មាន​រៀបចំជា​មជ្ឍមណ្ឌល​ពុទ្ធសាសនា​ ដែល​​មាន​រៀបរាប់​បង្ហាញ​ពី​ប្រវត្តិ​របស់​ព្រះពុទ្ធ​តាំង​ពី​ចាប់​បដិសន្ធិ ត្រាស់ដឹង ​រហូត​ដល់​ចូល​បរិនិព្វាន។

លោក ប្រិញ សាវុធ បាន​បញ្ជាក់​ថា ​ការងារ​​ទាំងមូល​​គ្រោង​​​ចំណាយ​ថវិកា​​សរុប​ជាង ៦០ លាន​ដុល្លារ ហើយ​តម្លៃ​អាច​កើន​ឡើងថែមទៀត​​បើមាន​​ការ​រៀបចំបន្ថែម​លើបរិវេណ​ជុំវិញទីតាំង​សាងសង់ព្រះពុទ្ធ​បដិមា។ គម្រោង​សាងសង់​​ព្រះពុទ្ធ​បដិមា​ដ៏​ខ្ពស់​មួយ​នេះ អនុញ្ញាតឲ្យ​ពុទ្ធ​បរិស័ទ និងប្រជាជន​ទូទៅ​អាច​ចូលរួមតាម​សុទ្ធា មាន​ន័យ​ថា ​អាច​​ជួយ​ជា​បច្ច័យ​កសាង​ព្រះអង្គ​ធំ ឬ​ជាវ​ព្រះអង្គ​​តូច​ដែល​មាន​ជាង ៨ ម៉ឺន ៤ ពាន់អង្គ ហើយអាចឆ្លាក់​ឈ្មោះដើម្បី​ភ្ជាប់និស្ស័យជាមួយ​ព្រះពុទ្ធសាសនា ឬព្រះពុទ​បដិមា។

បើតាម លោក ប្រិញ សាវុធ គម្រោង​សាងសង់​ព្រះពុទ្ធ​បដិមា​ដ៏​ខ្ពស់នេះ​ ​ក៏​​ទទួល​បាន​ការ​ចូលរួមពី​ពុទ្ធសាសនិក​ពី​ប្រទេស​មួយ​ចំនួន​ដូចជា ជប៉ុន ថៃ វៀតណាម ដែល​បាន​ជាវ​ព្រះអង្គ​សម្រាប់​ដាក់​តម្កល់​នៅ​ក្រោម​ខឿន​ព្រះអង្គ​ធំកម្ពស់​ ១០៨ ម៉ែត្រ។

លោក ប្រិញ សាវុធ បន្ត​ថា​ តាម​រយៈ​គម្រោង​សាងសង់ព្រះពុទ្ធ​បដិមា​ដ៏​ខ្ពស់​បំផុតនេះ​ ក៏​​នឹងជួយ​លើកស្ទួយ​វិស័យទេសចរណ៍ក្នុងប្រទេស​កម្ពុជាតាម​រយៈ​ទេសចរ​សាសនា ខណៈ​ដែល​ប្រទេស​ជិត​ខាង​មួយ​ចំនួន​ដូចជា​​ ថៃ និង​ភូមា បាន​​យក​ទីអារាម និងទីសក្ការៈបូ​​​ជា​ ​ជួយ​ទាក់ទាញ​ទេសចរ​មក​កម្សាន្ត​​។

លោកបានលើកឡើងថា ៖ ព្រះពុទ្ធបដិមាស្ថិតនៅលើខ្នងភ្នំបូកគោ​ និងតំបន់ទេសចរណ៍ជាច្រើនទៀតនៅតំបន់បូកគោនេះ ត្រូវបានរំពឹងថា នឹងទាក់ទាញ អ្នកទេសចរជាតិ និងអន្តរជាតិបានច្រើន។ គួរបញ្ជាក់ថា គោលបំណងនៃការសាងសង់ព្រះពុទ្ធបដិមាដ៏ធំនៅលើភ្នំបូកគោនេះ គឺដើម្បីជាទីសក្ការៈបូជា សម្រាប់ប្រជាពលរដ្ឋខ្មែរ ក៏ដូចជាឧទ្ទិសនូវសេចក្តីសុខ សេចក្តីចម្រើន រុងរឿង និងសុខសន្តិភាពជានិច្ចនិរន្តរ៍ដល់ប្រជាពលរដ្ឋទាំងអស់៕