ភ្នំពេញ៖ រាជរដ្ឋាភិបាល ដែលមានក្រសួងកសិកម្ម រុក្ខាប្រមាញ់ និងនេសាទ ជាសេនាធិការ បានណែនាំឱ្យប្រជាកសិករដាំដំណាំស្រូវពូជជាតិ ដែលជាពូជអាចលក់បានតម្លៃខ្ពស់។ ការជំរុញរបស់រាជរដ្ឋាភិបាលយ៉ាងដូច្នេះគឺដើម្បីលើកកម្ពស់ជីវភាពប្រជាកសិករដែលដាំដុះដំណាំស្រូវឱ្យកាន់តែប្រសើរជាងមុន ខណៈដែលស្រូវប្រភេទពូជជាតិកំពុងមានតម្រូវការទីផ្សារនាំចេញ។

យោងតាមក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា តម្លៃស្រូវដែលប្រមូលនៅដើមដៃនេះ គឺពូជស្រូវសែនក្រអូប ជាស្រូវរបស់ខ្មែរមានតម្លៃល្អ (ជាមធ្យម ១៤០០ រៀលក្នុងមួយគីឡូ) ខ្ពស់ជាងឆ្នាំកន្លងមក ហើយមានតម្រូវវការច្រើនសម្រាប់ការកែច្នៃជាអង្ករនាំចេញ។ ចំណែកឯប្រភេទស្រូវស្រងែ (ជាមធ្យមតម្លៃ ១២៨០ រៀលក្នុងមួយគីឡូក្រាម) ដែលជាពូជស្រូវក្នុងស្រុក ក៏មានតម្លៃខ្ពស់គួរសម បើធៀបទៅឆ្នាំកន្លងទៅ ប៉ុន្តែសម្រាប់តម្រូវការទីផ្សារជាក់ស្ដែងគឺនៅទាបជាងប្រភេទស្រូវសែនក្រអូប។

តាមរយៈក្រសួងកសិកម្មដដែលបានឱ្យដឹងទៀតថា តម្លៃស្រូវពូជ OM5451 ( ជាមធ្យមតម្លៃ ៩៥០ រៀលមួយគីឡូក្រាម) ប៉ុន្តែជាតម្លៃខ្ពស់ជាងឆ្នាំ២០២៣ , និងឆ្នាំ២០២១ (ធ្លាប់ធ្លាក់ដល់ជាមធ្យម ៧៧០ រៀលមួយគីឡូក្រាម) នៅឆ្នាំ២០២២ ហើយតម្រូវការក្នុងស្រុកតិចជាងស្រូវសែនក្រអូប និងស្រងែ ហើយភាគច្រើនស្រូវនេះនាំទៅប្រភេទវៀតណាម។

ចំពោះស្រូវក្រអូបប្រកាន់រដូវ ដែលនឹងប្រមូលផលនៅខែវិច្ឆិកា និងខែធ្នូខាងមុខនេះ ដូចជា ពូជស្រូវផ្ការរំដួល ដែលធ្លាប់ឈ្នះបានពានរង្វាន់ក្នុងនាមជាអង្ករល្អដាច់គេលើពិភពលោកចំនួន៥ដង ក៏មានទីផ្សារកាន់តែល្អ និងតម្លៃខ្ពស់ដែរ។ ម្យ៉ាងទៀត ចំពោះពូជស្រូវដែលគេអាចយកទៅធ្វើជាគុយទាវ នំបញ្ចុកបានល្អ ដូចជាប្រភេទពូជក្រសាំង​ទាប និង ឆ្មាព្រំ ក៏មានទីផ្សារ និងតម្លៃល្អដែរ។

លោកជំទាវ អ៊ឹម រចនា អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ បានលើកឡើងថា កន្លងមកក្រសួងបានលើកទឹកចិត្តដល់ប្រជាកសិករឱ្យងាកទៅដាំដុះពូជស្រូវជាតិ ដូចជា ផ្ការំដួល និងសែនក្រអូប០១ជាដើម ដែលពូជស្រូវទាំងនេះមានទីផ្សារល្អ ហើយរោងម៉ាស៊ីនកិនស្រូវមួយចំនួនធំ ក៏បានព្រមព្រៀងទទួលទិញស្រូវពីប្រជាកសិករផងដែរ។

លោកជំទាវ អ៊ឹម រចនា  បានបញ្ជាក់យ៉ាងដូច្នេះថា ៖

«ពូជស្រូវសែនក្រអូប ជាពូជស្រូវស្រាល ដែលក្រសួងកសិកម្ម រុក្ខាប្រមាញ់ និងនេសាទ បានចរចាជាមួយម៉ាស៊ីនកិន និងសមាជិកសហព័ន្ធស្រូវអង្ករកម្ពុជា ធ្វើយ៉ាងណាឱ្យទិញពូជស្រូវសែនក្រអូបពីប្រជាកសិករនៅក្នុងតម្លៃថ្លៃជាងពូជស្រូវដែលនាំចូលពីបរទេស ហើយរោងម៉ាស៊ីនកិនស្រូវទាំងនោះ ក៏ធានាទិញស្រូវពីកសិ​កររហូតដល់តម្លៃ ១,៤០០ រៀលក្នុងមួយគីឡូក្រាម»។

បន្ថែមពីលើពូជស្រូវទាំងពីរខាងលើនេះ ឯកឧត្តម ឃឹម ហ្វីណង់ អនុរដ្ឋលេខាក្រសួងកសិកម្ម រុក្ខាប្រមាញ់ និងនេសាទ ក៏បានលើកឡើងដែរថា ផ្អែកតាមតម្រូវការទីផ្សារបច្ចុប្បន្ន ក៏ដូចជាបន្តទៅថ្ងៃខាងមុខនេះនេះ កសិករខ្មែរគួរពិចារណាងាកមកប្រើប្រាស់ពូជក្នុងស្រុករបស់យើងវិញទើបប្រសើរជាង ព្រោះមានទាំងទីផ្សារ បានទាំងតម្លៃល្អ ហើយប្រសិនបើមានបញ្ហារឿងថ្លៃ រដ្ឋាភិបាល ដែលមានក្រសួងកសិកម្មជាសេនាធិការ មានយន្តការអាចជួយអន្តរាគមន៍បានភ្លាមៗ។