សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ តំបន់សមរភូមិក្ដៅមួយនៅក្នុងខេត្តពោធិ៍សាត់ និងជាតំបន់ដែលធ្លាប់មានទ័ពខ្មែរក្រហមឆ្លងកាត់ បាន និងកំពុងកែប្រែទៅជាតំបន់ឧស្សាហកម្មតំបន់សេដ្ឋកិច្ចពិសេស និងផ្ដល់ឱកាសការងារយ៉ាងច្រើនដល់ប្រជាពលរដ្ឋក្នុងប្រទេសកម្ពុជា តាមរយៈការបង្កើតរោងចក្រតម្លៃប្រមាណ៦៥០លានដុល្លារអាមេរិករបស់ក្រុមហ៊ុន មីនេបៀ របស់ជប៉ុន ។
យោងតាមឯកឧត្តម ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ ក្រុមប្រឹក្សាអភិវឌ្ឍន៍កម្ពុជា បានមានប្រសាសន៍ក្នុងពិធីបើកការដ្ឋានសាងសង់រោងចក្រ មីនេបៀ នៅខេត្តពោធិ៍សាត់ កាលពីចុងសប្ដាហ៍កន្លងទៅនេះឱ្យដឹងថា តំបន់ដែលក្រុមហ៊ុន មីនេបៀ បានជ្រើសរើសធ្វើជារោងចក្រផលិតសម្ភារអេឡិចត្រូនិកនៅក្នុងខេត្តពោធិ៍សាត់នេះ ពីមុនគឺជាតំបន់ដែលខ្មែរក្រហមឆ្លងកាត់ និងជាតំបន់ស្ងប់ស្ងាត់មិនមានសកម្មភាពសេដ្ឋកិច្ចនោះទេ ប៉ុន្តែពេលនេះ តំបន់ដែលធ្លាប់តែស្ងប់ស្ងាត់ និងអសុវត្ថិភាព ក៏បានក្លាយជាតំបន់រោងចក្រឧស្សាហកម្ម រោងចក្រផលិតគ្រឿងអេឡិចត្រូនិករបស់ក្រុមហ៊ុន មីនេបៀ និងបានផ្ដល់ឱកាសការងារដល់ពលរដ្ឋរាប់ពាន់នាក់ ជាមួយនឹងប្រាក់ចំណូលសម្រាប់ផ្គត់ផ្គង់ជីវភាពគ្រួសារ ។
ឯកឧត្តមបានបន្តថា ៖
«ចក្ខុវិស័យរបស់រាជរដ្ឋាភិបាលកម្ពុជា នឹងក្លាយជាប្រទេសមានប្រាក់ចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសមានប្រាក់ចំណូលខ្ពស់នៅឆ្នាំ២០៥០ ហើយបើសិនជាកម្ពុជានៅតែបន្តពឹងលើវិស័យវាយនភណ្ឌកាត់ដេរសម្លៀកបំពាក់ នោះកម្ពុជនឹងមិនអាចសម្រេចបានតាមផែនការនោះទេ ។ ការវិនិយោគលើរោងចក្រ មីនេបៀ នៅក្នុងប្រទេសកម្ពុជា ក៏ជាការរួមចំណែកមួយដល់ការសម្រេចបាននូវផែនការចក្ខុវិស័យរបស់រាជរដ្ឋាភិបាល ពីព្រោះថារហូតមកដល់បច្ចុប្បន្ននេះ រោងចក្ររបស់ក្រុមហ៊ុន មីនេបៀ បានផ្ដល់ឱកាសការងារដល់បុគ្គលិកកម្មកររហូតដល់ជាង៨ពាន់នាក់ហើយ និងសុទ្ធតែជាបុគ្គលជំនាញ» ។
ឯកឧត្តម កែវ រតនៈ រដ្ឋមន្ត្រីក្រសួងរ៉ែ និងថាមពល ក៏បានបញ្ជាក់ផងដែរថា ក្នុងរយៈពេលប៉ុន្មានឆ្នាំចុងក្រោយនេះ ខេត្តពោធិ៍សាត់ ទទួលបានការវិនិយោគជាបន្តបន្ទាប់ ដោយសារកត្តាមួយចំនួន ក្នុងនោះមានកត្តាសុខសន្តិភាព កត្តាផ្លូវ និងភ្លើង ជាពិសេសខេត្តនេះ ជាទីតាំងផលិតផលថាមពលស្អាតនៅក្នុងប្រទេសកម្ពុជាផងដែរ ។ នៅពេលណាតំបន់មួយដែលមានផ្លូវ ភ្លើង នឹងមានមនុស្សចូលមករស់នៅ ហើយបើសិនជាមានការវិនិយោគ មានរោងចក្រ មានតំបន់សេដ្ឋកិច្ចពិសេសទៀតនោះ នឹងធ្វើឱ្យមានមនុស្សមករស់នៅកាន់តែច្រើនបន្ថែមទៀត ។
គួរបញ្ជក់ថា រហូតមកដល់នេះ ខេត្តពោធិ៍សាត់មានរោងចក្រធំៗចំនួន៣ហើយដែលបានដាក់ទីតាំងដំណើរការខ្សែច្រវាក់ផលិតកម្ម ដោយក្នុងនោះមានរោងចក្រដំឡើងរថយន្តម៉ាកហ្វដ របស់ក្រុមហ៊ុន អ អិម អេ ខេមបូឌា កំពុងដំណើរការ, រោងចក្រដំឡើងរថយន្តដឹកទំនិញដើរដោយថាមពលអគ្គិសនីរបស់ក្រុមហ៊ុន ហ្សូម៉ូទ័រ និង រោងចក្រផលិតគ្រឿងបង្គុំអេឡិចត្រូនិករបស់ក្រុមហ៊ុន មីនេបៀ ដែលទើបបានបើកការដ្ឋានសាងសង់រោងចក្រកាលពីសប្ដាហ៍មុន ។
បើតាមអ្នកជំនាញនៃវិស័យអចលនទ្រព្យបានបង្ហាញពីការយល់ឃើញថា តំបន់នៅតាមបណ្ដោយផ្លូវជាតិលេខ៥ ជាពិសេសក្នុងខេត្តពោធិ៍សាត់ នឹងទទួលបានការវិនិយោគលើវិស័យឧស្សាហកម្មច្រើន ដែលនឹងធ្វើឱ្យតម្រូវការដីធ្លីសម្រាប់ប្រើប្រាស់ក្នុងវិស័យនេះក៏មានកំណើនខ្ពស់ ពីព្រោះថា ទីតាំងតាមបណ្ដោយផ្លូវជាតិលេខ៥ ជាទីតាំងដែលមានភាពងាយស្រួលដឹកជញ្ជូនទំនិញចូលរោងចក្រផលិត និងដឹកទំនិញចេញទៅកាន់ទីផ្សារអន្តរជាតិវិញ ៕
Account
Security
Favourite Content