សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ស្ថាប័នពាក់ព័ន្ធធំៗចំនួន៤ ដែលរួមមានសមាគមចុងភៅកម្ពុជា សមាគមភោជនីយដ្ឋានកម្ពុជា សមាគមសណ្ឋាគារកម្ពុជា និងសហព័ន្ធទេសចរណ៍កម្ពុជា នឹងយកកសិផលកម្ពុជាចំនួន៤មុខ រួមមានស្វាយកែវរមៀត ស្វាយចន្ទី ម្រេចកំពត និងអង្ករក្រអូប ទៅដាក់ឱ្យចុងភៅជំនាញធ្វើការប្រកួតប្រជែងកែច្នៃជាមុខម្ហូបថ្មី ហើយប្រសិនបើជាចុងភៅរូបណាអាចធ្វើម្ហូបបានល្អ និងមានរសជាតិឆ្ងាញ់ជាងគេ នឹងត្រូវយកមុខម្ហូបនោះដាក់បញ្ចូលជាមុខម្ហូបជាតិ។
ឧកញ៉ា លូ ម៉េង ដែលគេស្គាល់ថាជាចុងភៅឆ្នើមមួយរូបនៅកម្ពុជាបានមានប្រសាសន៍ថា ការយកកសិផលទាំង ៤ របស់កម្ពុជាទៅដាក់កែច្នៃនេះនឹងធ្វើឡើងក្នុងព្រឹត្តិការណ៍ពិព័រណ៍វិស័យផ្គត់ផ្គង់ម្ហូបអាហារ សណ្ឋាគារ និងបដិសណ្ឋារកិច្ច ដែលនឹងរៀបចំធ្វើឡើងនៅថ្ងៃទី៦ ដល់ថ្ងៃទី៨ ខែវិច្ឆិកា ឆ្នាំ២០២៤ ខាងមុខនេះ ។
លោកឧកញ៉ាបានបន្តថា ធនធានរបស់កម្ពុជាមានសក្ដានុពលខ្ពស់ដែលអាចយកមកកែច្នៃបាន ជាក់ស្ដែងកសិផលទាំង៤មុខនេះ អាចយកមកកែច្នៃជាមុខម្ហូបបានច្រើនមុខ ដូច្នេះ បើសិនជាចុងភៅរូបណាអាចកែច្នៃម្ហូបបានឈ្នះពីការប្រកួត នឹងត្រូវយកមុខម្ហូបនោះដាក់ក្នុងម្ហូបជាតិ និងផ្សព្វផ្សាយឱ្យប្រើប្រាស់នៅតាមភោជនីយដ្ឋាននានាសម្រាប់ឱ្យភ្ញៀវជាតិ និងអន្តរជាតិបានទទួលទានមុខម្ហូបថ្មីរបស់កម្ពុជា ។
លោកឧកញ៉ាបន្តថា ៖
«យើងព្យាយាមបង្កើតមុខម្ហូបថ្មីៗ ដើម្បីផ្ដល់ជូនភ្ញៀវជាតិ និងអន្តរជាតិ ដែលនឹងអាចទាក់ទាញភ្ញៀវទេសចរអន្តរជាតិមកទស្សនា និងកម្សាន្តនៅក្នុងប្រទេសកម្ពុជាបានកាន់តែច្រើនថែមទៀតតាមរយៈម្ហូបអាហារដ៏សម្បូរបែបរបស់កម្ពុជា ។ ម្យ៉ាងទៀត នៅពេលយើងកែច្នៃម្ហូបចេញពីកសិផលទាំង៤នេះបានហើយ វាក៏នឹងជំរុញទីផ្សារកសិផលទាំង៤មុខនេះបានមួយកម្រិតទៀតផងដែរ»។
អ្នកស្រី ឆវត្តី រ៉ាន់ឌីយ៉ា ម្ចាស់ចំការស្វាយមួយរូបនៅខេត្តកំពង់ស្ពឺ បានមានថ្លែងប្រាប់ AMS ឱ្យដឹងថា ព្រឹត្តិការណ៍នេះពិតជាគួរឱ្យចាប់អារម្មណ៍ ដែលវានឹងជួយឱ្យកសិផលរបស់ខ្មែរ ជាពិសេសផ្លែស្វាយរបស់កសិករកម្ពុជាកាន់តែមានទីផ្សារថែមទៀត ។
អ្នកស្រីបន្តថា បច្ចុប្បន្ននេះទីផ្សារស្វាយកែវរមៀត បានចាប់ផ្ដើមល្អប្រសើរបន្តិចហើយ ជាក់ស្ដែងនៅក្នុងតំបន់របស់អ្នកស្រីក្នុងទឹកខេត្តកំពង់ស្ពឺ មិនពិបាករកទីផ្សារទេ ពីព្រោះតំបន់នេះមានរោងចក្រកែច្នៃស្វាយកែវរមៀតធ្វើជាដំណាប់ស្វាយ ហើយរៀងរាល់ថ្ងៃ រោងចក្រក៏ត្រូវការស្វាយជាច្រើនផងដែរ ដើម្បីបំពេញតម្រូវការខ្សែច្រវាក់ផ្គត់ផ្គង់ក្នុងរោងចក្រ ។ យ៉ាងណាក្ដី តំបន់មួយចំនួនក៏មិនដឹងថាមានទីផ្សារដូចនៅក្នុងខេត្តកំពង់ស្ពឺ ឬអត់នោះទេ ប៉ុន្តែការយកស្វាយកែវរមៀតមកកែច្នៃធ្វើជាមុខម្ហូបរបស់ខ្មែរ នឹងអាចជួយជំរុញទីផ្សារផលិតផលបានមួយកម្រិតទៀត ដោយអ្នកស្រីបញ្ជាក់ថា អ្នកស្រីនឹងចូលរួមក្នុងការកែច្នៃមុខម្ហូបនេះនៅដើមខែវិច្ឆិកាខាងមុខ ។
លោក ឌិន សុមេធារិទ្ធ ប្រធានសហព័ន្ធទេសចរណ៍កម្ពុជា បានប្រាប់ AMS ឱ្យដឹងផងដែរថា ការបង្កើតមុខម្ហូបថ្មីៗ គឺការបង្កើតសេវាកម្មទេសចរណ៍ថ្មីៗផងដែរ ។ ទេសចរបរទេសដែលមកលេងកម្ពុជានឹងទទួលបាននូវម្ហូបថ្មីៗប្លែកៗរបស់កម្ពុជា ដែលកន្លងមកកម្ពុជានៅខ្វះខាតនៅឡើយ ដូចជាម្ហូបហាឡាល់ជាដើម ខណៈប្រទេសជិតខាងបានរៀបចំលើម្ហូបហាឡាល់ក្នុងការទាក់ទាញទេសចរមកពីតំបន់មជ្ឈិមបូព៌ាដែលជាទេសចរសំបូរលុយចាយ ។
Account
Security
Favourite Content