សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ បើទោះបីជាបានជួបបញ្ហាប្រឈមមួយចំនួនទាំងខាងក្នុងនិងខាងក្រៅក្តី កំណើនសេដ្ឋកិច្ចកម្ពុជាឆ្នាំ២០២៥ កន្លងទៅនេះសម្រេចបាន៥,២% ហើយឆ្នាំ២០២៦នេះ រំពឹងថានឹងកើនឡើងប្រមាណ៥% ។ នេះបើតាមឯកបណ្ឌិតសភាចារ្យ ផាន់ ផល្លា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ ថ្លែងក្នុងវេទិកាសាធារណៈមួយនៅសណ្ឋាគារសូហ្វីតែលភ្នំពេញភូគីត្រា កាលពីព្រឹកថ្ងៃទី០២ ខែកុម្ភៈ ឆ្នាំ២០២៦ ។
ឯកឧត្តមបណ្ឌិត សភាចារ្យ ផាន់ ផល្លា បានមានប្រសាសន៍ថា សេដ្ឋកិច្ចកម្ពុជាក្នុងឆ្នាំ២០២៥ បានជួបបញ្ហាប្រឈមធំៗ គឺការដាក់ពន្ធបដិកាពីសហរដ្ឋអាម៉េរិកកាលពីខែមេសា ឆ្នាំ២០២៥ ដោយកាលនោះអាម៉េរិកបានដាក់ពន្ធលើទំនិញនាំចូលពីកម្ពុជាក្នុងអត្រា៤៩% ប៉ុន្តែក្រោយពេលដែលកម្ពុជាបានចរចា អាម៉េរិកក៏បានបន្ថយពី៤៩%មកនៅត្រឹម១៩% ។
ឯកឧត្តមបន្តថា ៖
«នៅពេលអាម៉េរិកបានប្រកាសដាក់ពន្ធលើកម្ពុជា ៤៩% ដោយទុកពេល ៣ខែឱ្យចរចា និងអនុវត្ត ពេលនោះបណ្ដាអ្នកផលិត និងនាំចេញទៅកាន់ទីផ្សារអាម៉េរិកបានសម្រុកផលិត និងនាំចេញទៅកាន់អាម៉េរិកឱ្យបានមុនពេលការដាក់ពន្ធ ទើបធ្វើឱ្យកំណើននៃការនាំចេញទៅកាន់អាម៉េរិកកើនឡើងខ្ពស់ដោយសម្រេចបានរហូតដល់១២,៧ពាន់លានដុល្លារ។ ទន្ទឹមនឹងការដាក់ពន្ធបដិកាពីអាម៉េរិក សេដ្ឋកិច្ចកម្ពុជាក៏បានប្រឈមនឹងបញ្ហាមួយទៀត គឺសង្គ្រាមរវាងកម្ពុជាជាមួយថៃ ដែលធ្វើឱ្យការនាំចេញនាំចូលធ្លាក់ចុះច្រើន ។ ប៉ុន្តែអ្វីដែលល្អពីសង្គ្រាមរវាងកម្ពុជា និងថៃ គឺការងាកមកគាំទ្រផលិតផលជាតិធ្វើឱ្យអ្នកផលិតក្នុងស្រុកបង្កើនការផលិតដើម្បីផ្គត់ផ្គង់តម្រូវការជាក់ស្ដែង»។
ដោយឡែកសម្រាប់ស្ថានភាព សេដ្ឋកិច្ចកម្ពុជាឆ្នាំ ២០២៦នេះ ឯកឧត្តមបណ្ឌិតសចារ្យ ផាន់ ផល្លា បានមានប្រសាសន៍ថា នៅតែមានភាពមិនច្បាស់លាស់ច្រើន ប៉ុន្តែសម្រាប់វិស័យធំៗដែលគាំទ្រដល់កំណើនសេដ្ឋកិច្ចកម្ពុជា ដូចជា វិស័យកាត់ដេរ សម្លៀកបំពាក់ ស្បែកជើង និងផលិតផលធ្វើដំណើរការ នឹងនៅតែមានសញ្ញាវិជ្ជមាន ដោយការបញ្ជាទិញមានលក្ខណៈល្អប្រសើរ ។
ជាមួយគ្នានេះ ដើម្បីគាំទ្រដល់កំណើនសេដ្ឋកិច្ចឆ្នាំ២០២៦ឱ្យនៅតែមានលក្ខណៈប្រសើរ រាជរដ្ឋាភិបាលបានដាក់ចេញនូវកម្មវិធីជួយដល់អតីតពលករដែលទើបត្រលប់មកពីប្រទេសថៃវិញ ដោយជួយស្វែងរកការងារធ្វើ និងបណ្ដុះបណ្ដាលជំនាញ។ ទន្ទឹមនេះដែរ រាជរដ្ឋាភិបាលក៏បានគិតគូរពីការជំរុញការផលិតនូវផលិតផលក្នុងស្រុក ដោយលើកទឹកចិត្តដល់អ្នកផលិតផលផ្នែកពន្ធ និងគាំទ្រហិរញ្ញវត្ថុ។ អ្វីដែលពិសេស យុទ្ធនាការបង្ក្រាបបទល្មើសអនឡាញ (Scam Online ) ក៏ជាបច្ច័យដ៏ល្អសម្រាប់វិនិយោគិន និងទេសចរ នៅកម្ពុជាក្នុងរយៈពេលមធ្យម និងរយៈពេលវែង ៕
Account
Security
Favourite Content