សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ មន្ត្រីជាន់ខ្ពស់ក្រសួងពាណិជ្ជកម្មបានថ្លែងឱ្យដឹងថា ក្នុងរយៈពេលពីរខែដើមឆ្នាំ២០២៣ ទំហំពាណិជ្ជកម្មសរុបទ្វេភាគីកម្ពុជា-អង់គ្លេស គឺមានចំនួនប្រមាណ ១២១ លានដុល្លារអាមេរិក ដែលនេះជាភស្តុតាងបង្ហាញថា ទំនាក់ទំនងរវាងប្រទេសទាំងពីរ បាន និងកំពុងបន្តជំរុញកិច្ចសហប្រតិបត្តិការវិស័យពាណិជ្ជកម្មជាមួយគ្នាកាន់តែល្អ ក៏ដូចជាដើម្បីពង្រឹងទំនាក់ទំនងទ្វេភាគីរវាងកម្ពុជា និងចក្រភពអង់គ្លេសឱ្យកាន់តែរឹងមាំថែមទៀត។
ឯកឧត្តម សំហេង បូរ៉ា រដ្ឋលេខាធិការក្រសួងពាណិជ្ជកម្ម បានឱ្យដឹងថា ក្នុងឆ្នាំ២០២២ ទំហំពាណិជ្ជកម្មសរុបកម្ពុជា-ចក្រភពអង់គ្លេសមានចំនួនប្រមាណ ៩៧៧ លានដុល្លារ កើនឡើង ២៣,៩៨ ភាគរយ ធៀបនឹងឆ្នាំ២០២១ ដែលមានចំនួនត្រឹមតែជាង ៧៨៨ លានដុល្លារអាមេរិក។ ដោយឡែក សម្រាប់រយៈពេលពីរខែដើមឆ្នាំ២០២៣ ទំហំពាណិជ្ជកម្មសរុបទ្វេភាគីកម្ពុជា-អង់គ្លេស គឺមានចំនួនប្រមាណ ១២១ លានដុល្លារអាមេរិក។
ជាមួយគ្នានេះ ឯកឧត្តមក៏បានលើកឡើងពីការថ្លែងអំណរគុណរបស់រាជរដ្ឋាភិបាលកម្ពុជាចំពោះរដ្ឋាភិបាលអង់គ្លេស ដែលបានបន្តនូវការគាំទ្រដល់កម្ពុជា ដោយរក្សាការផ្តល់នូវប្រព័ន្ធអនុគ្រោះពាណិជ្ជកម្ម បើទោះបីជាប្រទេសអង់គ្លេសចាកចេញពីសហភាពអឺរ៉ុបក៏ដោយ ហើយចំពោះប្រព័ន្ធអនុគ្រោះពាណិជ្ជកម្មរបស់ចក្រភពអង់គ្លេសសម្រាប់ប្រទេសកំពុងអភិវឌ្ឍន៍ថ្មីនេះ កម្ពុជានៅតែទទួលផលប្រយោជន៍ និងអាចនាំចេញទៅទីផ្សារចក្រភពអង់គ្លេសដោយទទួលបានអត្រាអនុគ្រោះពន្ធ។
ទន្ទឹមនឹងនេះ ឯកឧត្តមរដ្ឋលេខាធិការ បានបង្ហាញនូវជំនឿយ៉ាងមុតមាំថា ប្រព័ន្ធអនុគ្រោះពាណិជ្ជកម្មថ្មីនេះ នឹងជួយជំរុញកំណើនពាណិជ្ជកម្មទ្វេភាគី និងបង្កើននូវទំនិញមានគុណភាពពីកម្ពុជាទៅកាន់ទីផ្សារចក្រភពអង់គ្លេស។
សូមបញ្ជាក់ថា ប្រព័ន្ធអនុគ្រោះពន្ធពាណិជ្ជកម្មថ្មីនេះ គឺមានលក្ខណៈ និងអត្ថប្រយោជន៍ស្រដៀងគ្នាទៅនឹងប្រព័ន្ធអនុពន្ធគ្រោះ GSP ។ Generalized System of Preferences (GSP) របស់ប្រទេសអង់គ្លេសសម្រាប់ផ្តល់ឱ្យប្រទេសកំពុងអភិវឌ្ឍន៍ ដែលត្រូវបានប្តូរឈ្មោះជាប្រព័ន្ធអនុគ្រោះពន្ធពាណិជ្ជកម្ម Developing Countries Trading Scheme (DCTS) ហើយកម្ពុជា គឺស្ថិតក្នុងបញ្ជីដោយស្វ័យប្រវត្តិក្នុងចំណោមប្រទេសដែលទទួលបានផលពីប្រព័ន្ធអនុគ្រោះ DCTS ។
សូមបញ្ជាក់ថា នៅឆ្នាំ២០២២ កម្ពុជាបាននាំចេញ ចំនួនប្រមាណ ៨៨៦ លានដុល្លារ និងបាននាំចូលចំនួនប្រមាណ ៩១ លានដុល្លារ។ ចំណែក ផលិតផលនាំចេញសំខាន់ៗរបស់កម្ពុជានាំទៅទីផ្សាររួមមាន សម្លៀកបំពាក់ វាយនភណ្ឌ ស្បែកជើង កង់ និងកសិផលមួយចំនួន ខណៈនាំចូលពីចក្រភពអង់គ្លេសមកនូវផលិតផលដូចជា រថយន្ត ចំណីសត្វ ភេសជ្ជៈ ជាដើម។ល។៕
Account
Security
Favourite Content