បរទេស៖ យោងទៅតាមប្រភពពី Business Insider Africa បានបង្ហាញថា ផលិតកម្មកាកាវនៅទ្វីបអាហ្វ្រិកមានចំនួនប្រហែល ៤,៩ លានតោននៅចន្លោះឆ្នាំ ២០២១ និង ២០២២ ដែលធ្វើឲ្យទ្វីបនេះក្លាយជាអ្នកនាំចេញកាកាវកំពូលមួយរបស់ពិភពលោកក្នុងចំណោមអ្នកនាំចេញផ្សេងៗទៀត។

តាមការប៉ាន់ស្មានប្រមាណ ២ភាគ៣ នៃផលិតកម្មកាកាវសរុបរបស់ពិភពលោកគឺមកពីអាហ្វ្រិកខាងលិច ដោយប្រទេសកូតឌីវ័រ (Ivory Coast) បាននាំមុខគេក្នុងការផលិតជាង ២,២លានតោន និងប្រទេសផ្សេងៗទៀតដូចជា ហ្គាណា នីហ្សេរីយ៉ា កាមេរូន និង តង់ហ្គោបានផលិតសរុបប្រហែល ១,៥៥ លានតោន។ យ៉ាងណាក៏ដោយ ទោះបីជាគ្រាប់កាកាវមានប្រភពមកពីអាមេរិកខាងត្បូងក៏ដោយ ប៉ុន្តែផលិតកម្មគ្រាប់កាកាវនៅទ្វីបអាហ្រ្វិកមានកម្រិតខ្ពស់ជាង។ ​នេះ​គឺជា​ប្រទេស​ផលិត​កាកាវ​កំពូល​ទាំង ៥ នៅក្នុងទ្វីប​អាហ្រ្វិក៖

កូតឌីវ័រ (Ivory Coast) គឺជាប្រទេសមានទីតាំងនៅអាហ្រ្វិកខាងលិច ហើយក៏ជាអ្នកផលិតកាកាវធំជាងគេនៅទូទាំងពិភពលោក ដែលផលិតបានប្រហែល ២,២ លានតោនកាកាវក្នុងមួយឆ្នាំៗ ឬ ប្រហែល ៤៥ ភាគរយនៃផលិតផលកាកាវសរុបរបស់ពិភពលោក ។ កាលពីឆ្នាំ ១៩៧៨ កូតឌីវ័របានវ៉ាដាច់ហ្គាណាជាអ្នកផលិតគ្រាប់កាកាវឈានមុខគេរបស់ពិភពលោក ហើយបច្ចុប្បន្នប្រទេសនេះពឹងផ្អែកខ្លាំងលើដំណាំកាកាវដែលមានចំណែក ៤០ ភាគរយនៃប្រាក់ចំណូលនាំចេញរបស់ជាតិ។

ហ្គាណា (Ghana) គឺ​ជា​ប្រទេស​នាំចេញ​កាកាវ​ធំ​ទី​ពីរ​ក្នុង​ពិភពលោក​បន្ទាប់​ពី​ប្រទេស​កូតឌីវ័រ។ នៅកំឡុងឆ្នាំ ២០២០ និង ២០២១ ហ្គាណាត្រូវបានគេប៉ាន់ប្រមាណថាផលិតគ្រាប់កាកាវបានប្រហែល ១ លានតោន ដែលជាចំនួនច្រើនបំផុតមិនធ្លាប់មាននៅក្នុងប្រទេស។

នីហ្សេរីយ៉ា (Nigeria) បានជាប់ចំណាត់ថ្នាក់ជាអ្នកផលិតធំជាងគេទី ៤ នៅលើពិភពលោកបន្ទាប់ពី កូតឌីវ័រ ហ្គាណា និងឥណ្ឌូនេស៊ី។ លើសពីនេះដែរ កាកាវគឺជាដំណាំសំខាន់របស់ប្រទេសនីហ្សេរីយ៉ាក្នុងការរកចំណូល ហើយភាគច្រើនត្រូវបានផលិតដោយកសិករខ្នាតតូចនៅក្នុងតំបន់ភាគនិរតីរបស់ប្រទេស។ ទោះបីជាមានកំណើនយ៉ាងឆាប់រហ័សក្នុងផលិតកម្ម និងផលប៉ះពាល់ជាវិជ្ជមានលើសេដ្ឋកិច្ចរបស់ប្រទេសក៏ដោយ ការផលិតកាកាវបាន និងកំពុងធ្លាក់ចុះយ៉ាងខ្លាំងបើប្រៀបធៀបនឹងភាគរយនៃការងារខាងប្រេងឆៅ។

កាមេរូន (Cameroon) គឺជាប្រទេសផលិតកាកាវធំជាងគេទី ៥ នៅលើពិភពលោក ដែលមានកម្រិតផលិតកម្មកាកាវប្រហែល ២៣០ ០០០ ទៅ ២៩០ ០០០ តោនក្នុងមួយឆ្នាំៗ។ ការនាំចេញគ្រប់កាកាវប្រហែល ៧៥ ភាគរយគឹមានទម្រង់ជា គ្រាប់កាកាវឆៅ ដែលត្រូវបានដាំជាដំណាំចម្បងដោយកសិករខ្នាតតូចដែលមានទីតាំងនៅតំបន់ព្រៃឈើ និង តំបន់ savannah ។ កាកាវគឺជាប្រភពចំណូលដ៏សំខាន់របស់ជាតិ និង ជួយសកម្មភាពសេដ្ឋកិច្ចនៅតំបន់ជនបទ។

អ៊ូហ្គង់ដា (Uganda) បានផលិតគ្រាប់កាកាវជាង ៣០ ០០០ តោនក្នុងមួយឆ្នាំ ព្រមទាំងបានកើនឡើងជាលំដាប់ក្នុងរយៈពេលប៉ុន្មានឆ្នាំចុងក្រោយនេះ ហើយកាកាវគឺជាការនាំចេញទំនិញធំជាងគេទី៤ របស់អ៊ូហ្គង់ដាបន្ទាប់ពីកាហ្វេ តែ និងត្រី។ ដោយផ្អែកលើតម្រូវការដ៏ពេញនិយម គ្រាប់កាកាវរបស់ប្រទេសអ៊ូហ្គង់ដាមានការប្រកួតប្រជែងនៅលើទីផ្សារអន្តរជាតិ ព្រោះវាមានលក្ខណៈសរីរាង្គ និងមានរសជាតិឆ្ងាញ់ដែលល្អសម្រាប់ការធ្វើសូកូឡាដ៏ល្អបំផុតនៅកន្លែងមួយចំនួននៅក្នុងពិភពលោក។

ទោះជាយ៉ាងណាក្តី ប្រទេសនាំចូលដូចជាខាងទ្វីបអឺរ៉ុបទទួលបានផលចំណេញខ្លាំងដោយសារពួកគេចេះច្នៃប្រឌិតខាងសូកូឡា និងជាប្លុកផលិតកម្មសុកូឡាដ៏ធំបំផុតរបស់ពិភពលោក ខណៈដែលប្រទេសនៅទ្វីបអាហ្រ្វិកទាំងនេះទទួលប្រាក់ចំណេញទាប​ ទាំងដែលពួកគេគឺជាជាអ្នកនាំចេញធំៗរបស់ពិភពលោកក៏ដោយ។ យោងទៅតាម Weforum បានបង្ហាញថា កសិករ​ដាំ​កាកាវ​រាប់​លាន​នាក់​ក្នុង​ប្រទេសកូតឌីវ័រ (Ivory Coast) ​ទទួលបានប្រាក់កម្រៃជា​មធ្យម​ត្រឹម​តែ ០,៧៨ ដុល្លារ​ប៉ុណ្ណោះក្នុង​មួយ​ថ្ងៃ។ ដូច្នោះហើយ រដ្ឋាភិបាលនានានៅក្នុងទ្វីបអាហ្វ្រិកគួរមានយុទ្ធសាស្ត្រក្នុងការជំរុញវិស័យកែច្នៃគ្រាប់កាកាវ ដែលអាចផ្តល់ឱ្យប្រទេសនូវផលចំណេញកាន់តែច្រើន និង មានស្ថិរភាពនៃផលិតកម្មគ្រប់កាកាវ៕