ភ្នំពេញ៖ រាជរដ្ឋាភិបាលកម្ពុជា កាលពីថ្ងៃទី២៤ ខែមេសា បានប្រកាសថា ខ្លួនកំពុងរៀបចំសេចក្តីព្រាងនីតិវិធីពិសេសថ្មីមួយ ដើម្បីត្រួតពិនិត្យការអនុវត្តតម្លាភាពពាណិជ្ជកម្ម ដោយអនុលោមតាមវិធាននៃប្រភពដើម ដែល​មានតម្លៃជាង ១០ ពាន់លានដុល្លារជារៀងរាល់ឆ្នាំ ដើម្បីទទួលបានការបន្តចូលទៅកាន់ទីផ្សារសហរដ្ឋអាមេរិក ។

ដោយរងផលប៉ះពាល់ពីការដាក់ពន្ធគយពីរដ្ឋបាលអាមេរិកកាលពីពេលមុន និងពេលបច្ចុប្បន្នក្នុងរយៈពេលតិចជាងមួយខែ ក្រសួងពាណិជ្ជកម្ម បានចេញសេចក្តីប្រកាសព័ត៌មានជូនដំណឹងដល់អ្នកផលិត និងអ្នកនាំចេញទាំងអស់ទៅកាន់ទីផ្សារអាមេរិកអំពីគោលនយោបាយពាណិជ្ជកម្មនាពេលខាងមុខ។

សេចក្តីប្រកាសព័ត៌មាននេះត្រូវបានបង្ហោះឡើងវិញ ដោយលោកនាយករដ្ឋមន្ត្រី ហ៊ុន ម៉ាណែត នៅលើបណ្តាញសង្គមផ្លូវការរបស់លោក រួមជាមួយនឹងចំណងជើងថា “សេចក្តីជូនដំណឹងស្ដីពីការរៀបចំនីតិវិធីពិសេសបន្ថែមសម្រាប់ការនាំចេញទំនិញទៅកាន់ទីផ្សារសហរដ្ឋអាមេរិក។ ព័ត៌មានបន្ថែមអំពីនីតិវិធីពិ​សេ​សនេះនឹងត្រូវបានជម្រាបជូនដល់សាធារណជនក្នុងពេលឆាប់ៗនេះ”។

សេចក្តីប្រកាសព័ត៌មានបានបន្ថែមថា កម្ពុជាបានអនុម័តច្បាប់ស្តីពីវិធានដើមកំណើតទំនិញ នៅខែកក្កដា ឆ្នាំ២០២៣ ក្នុងគោលបំណងជំរុញ និងសម្រួលពាណិជ្ជកម្មដែលទទួលបានផលប្រយោជន៍ពីការអនុគ្រោះពាណិជ្ជកម្ម ការអនុវត្តក្រៅប្រព័ន្ធ អនុគ្រោះពាណិជ្ជកម្ម ព្រមទាំងទប់ស្កាត់ការក្លែងបន្លំទាក់ទងនឹងប្រភពដើមនៃទំនិញ។

ដើម្បីការពារផលប្រយោជន៍របស់អ្នកផលិត និងអ្នកនាំចេញនៅក្នុងព្រះរាជាណាចក្រកម្ពុជា ក្រសួងពាណិជ្ជកម្ម បាន និងកំពុងសហការជាមួយក្រសួង និងស្ថាប័នពាក់ព័ន្ធ រៀបចំនីតិវិធីពិសេសបន្ថែមសម្រាប់ការនាំចេញទំនិញទៅកាន់ទីផ្សារសហរដ្ឋអាមេរិក។

យោងតាមសេចក្តីប្រកាសព័ត៌មានរបស់ក្រសួងពាណិជ្ជកម្ម បានបញ្ជាក់ថា រាជរដ្ឋាភិបាលបានអនុវត្តយ៉ាងខ្ជាប់ខ្ជួននូវវិធានពាណិជ្ជកម្មអន្តរជាតិ បទប្បញ្ញត្តិ កាតព្វកិច្ច និងការសន្យាពេលចូលជាសមាជិករបស់អង្គការពាណិជ្ជកម្មពិភពលោក (WTO) របស់កម្ពុជា ។

ក្របខ័ណ្ឌពាណិជ្ជកម្មពិសេសនេះផ្តោតលើការពង្រឹងយន្តការដើម្បីត្រួតពិនិត្យការប្រើប្រាស់វត្ថុធាតុដើម និងតម្លៃបន្ថែមក្នុងស្រុក ដើម្បីធានាបាននូវតម្លាភាព និងអនុលោមភាពតាមបទប្បញ្ញត្តិនៃច្បាប់ស្តីពីវិធានដើមកំណើតទំនិញដែលបានព្រមព្រៀងដោយប្រទេសទាំងពីរ។

ក្នុងន័យនេះ រាជរដ្ឋាភិបាលបានជំរុញឱ្យអ្នកផលិត និងអ្នកនាំចេញទៅកាន់ទីផ្សារសហរដ្ឋអាមេរិកទាំងអស់ មេត្តាជ្រាបជាព័ត៌មាន និងចូលរួមអនុវត្តឱ្យបានខ្ជាប់ខ្ជួន។

ផ្អែកលើរបាយការណ៍ប្រចាំឆ្នាំរបស់អគ្គនាយកដ្ឋានគយ និងរដ្ឋាករ ដែលបានចេញផ្សាយនៅថ្ងៃទី១០ ខែមករា សហរដ្ឋអាមេរិកនៅតែជាទីផ្សារនាំចេញដ៏ធំបំផុតរបស់កម្ពុជា ដោយទំហំពាណិជ្ជកម្មទ្វេភាគីឈានដល់ជិត ១១ ពាន់លានដុល្លារ កើនឡើង ១១ ភាគរយ ធៀបនឹងរយៈពេលមួយឆ្នាំ ដោយក្នុងនោះ ការនាំចេញរបស់កម្ពុជាទៅកាន់សហរដ្ឋអាមេរិកមានចំនួន ១០ ពាន់លានដុល្លារ ដែលឆ្លុះបញ្ចាំងពីការកើនឡើងចំនួន ១១.៤ ភាគរយធៀបនឹងឆ្នាំមុន ខណៈដែលការនាំចូលពីសហរដ្ឋអាមេរិកមានទំហំ ២៦៥ លានដុល្លារ កើនឡើង ២.៧ ភាគរយ៕