សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ប៉ារីស ៖ ប្រធានាធិបតីនៃសាធារណរដ្ឋបារាំង ក្នុងឱកាសអញ្ជើញស្វាគមន៍សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងធ្វើសេចក្តីប្រកាសព័ត៌មានរួមគ្នា Press Statemant នៅវិមានប្រធានាធិបតី អេលីហ្សេ (Palais de L’ ‘Elys’ee) ទីក្រុងប៉ារីស សាធារណរដ្ឋបារាំង បានប្រកាសសន្យាផ្តល់កញ្ចប់ថវិកា២០០លានអឺរ៉ូ ដល់ប្រទេសកម្ពុជា សម្រាប់ជួយវិស័យថាមពល បណ្តុះបណ្តាលវិជ្ជាជីវៈ និងប្រព្រឹត្តកម្មទឹកស្អាត។
ឯកឧត្តម Emmanuel Macron ប្រធានាធិបតីបារាំង បានចាត់ទុកថា ទស្សនកិច្ចរបស់សម្តេចធិបតី ហ៊ុន ម៉ាណែត ជាឱកាសមួយសម្រាប់បង្កើតគម្រោងថ្មីៗជាមួយក្រុមហ៊ុនរបស់បារាំង ហើយសម្តេចបានជួបផ្លាស់ប្តូរយោបល់ជាមួយក្រុមហ៊ុនជាច្រើន ជាពិសេសក្រុមហ៊ុនថាមពល ដឹកជញ្ជូន និងហេដ្ឋារចនាសម្ព័ន្ធ។
ឯកឧត្តម Macron បានបញ្ជាក់ថា ៖
«យើងនឹងជជែកគ្នាអំពីអាទិភាពរបស់សម្តេច ដើម្បីផ្តល់ជូនសម្តេចនូវមធ្យោបាយ និងជំនាញចាំបាច់នានា ដោយមានការជួយជ្រោមជ្រែងពីភ្នាក់ងារអភិវឌ្ឍន៍បារាំង ដែលសប្តាហ៍នេះ សន្យាផ្តល់កញ្ចប់ថវិកា២០០លានអឺរ៉ូ ក្នុងវិស័យបណ្តុះបណ្តាលវិជ្ជាជីវៈ ថាមពល និងប្រព្រឹត្តកម្មទឹកស្អាត»។
ឯកឧត្តម ប្រធានាធិបតីបារាំង បានថ្លែងអំណរគុណកម្ពុជា ចំពោះកិច្ចសហប្រតិបត្តិការល្អកន្លងមក និងបានកោតសរសើរអំពីជំហរកម្ពុជា ដោយចូលរួមក្នុងសេចក្តីថ្លែងការណ៍អង្គការសហប្រជាជាតិ ថ្កោលទោសប្រទេសរុស្ស៊ី ដែលបានឈ្លានពានទៅប្រទេសអ៊ុយក្រែនផងដែរ។ ការប្ដេជ្ញារបស់ប្រទេសរបស់សម្ដេចនៅចំពោះមុខតុលាការអន្តរជាតិ ជាគោលជំហរប្រកាន់ភ្ជាប់ការគោរពច្បាប់សេរីភាពដែលដកបទពិសោធន៍ចេញពីប្រវត្តិសាស្រ្ត ប្រកបដោយសោកនាដកម្ម នៅតែជារឿងសំខាន់នៅក្នុងសកម្មភាពរបស់សម្ដេច។
សម្តេចធិបតី ហ៊ុន ម៉ាណែត បានគូសបញ្ជាក់ថា ៖
«ក្នុងនាមប្រមុខរាជរដ្ឋាភិបាលថ្មីនៃព្រះរាជាណាចក្រកម្ពុជា ខ្ញុំសូមបញ្ជាក់នូវជំហរដ៏ច្បាស់លាស់របស់កម្ពុជានៅក្នុងការពូនជ្រំ នឹងបន្តពង្រឹង និងពង្រីកនូវទំនាក់ទំនងសហប្រតិបត្តិការរវាងកម្ពុជា និងបារាំង ។ ខ្ញុំសង្ឃឹមថា តាមរយៈទស្សនកិច្ចផ្លូវការរបស់ខ្ញុំនៅពេលនេះ អាចនឹងជជែកគ្នានៅក្នុងការពង្រឹងនិងពង្រីកនូវទំនាក់ទំនងប្រទេសយើង អាចពិនិត្យលទ្ធភាពនៅក្នុងការលើកតម្កើងកម្រិតនៃសហប្រតិបត្តិការ រវាងដៃគូរបស់យើងក្នុងប្រទេសយើងទាំងពីរ ពិសេសទំនាក់ទំនង ដែលកំពុងរីកចម្រើនក្នុងវិស័យវិនិយោគ និងពាណិជ្ជកម្ម»។
សម្ដេចធិបតី បានលើកឡើងដែរថា នេះបង្ហាញឱ្យឃើញអំពីភាពស៊ីជម្រៅ និងចំណងមិត្តភាពរបស់កម្ពុជា និងបារាំង។ កម្ពុជាចងចាំជានិច្ចនៅតួនាទីរបស់ប្រទេសបារាំងនៅក្នុងនាមជាស្ថាបនិក និងជាសហប្រធានសន្និសីទ ទីក្រុងប៉ារីសស្ដីពីកម្ពុជា ដែលនាំទៅដល់ការសម្រេចបាននូវកិច្ចព្រមព្រៀងទីក្រុងប៉ារីសនៅឆ្នាំ១៩៩១ ដែលជាការរួមចំណែក ដ៏សំខាន់របស់បារាំងនៅក្នុងការស្ដារនិងអភិវឌ្ឍន៍ សេដ្ឋកិច្ចជាតិតាំងពីពេលនោះមកតាមរយៈទីភ្នាក់ងារបារាំងសម្រាប់អភិវឌ្ឍន៍ ដែលបានធ្វើឱ្យកម្ពុជាក្លាយជា ប្រទេសមានចំណូលមធ្យមកម្រិតទាបនៅឆ្នាំ២០១៥ និងស្ថិតនៅលើមាគ៌ាឆ្ពោះទៅប្រទេស មានចំណូលខ្ពស់នៅឆ្នាំ២០៥០៕
Account
Security
Favourite Content