សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
. សេដ្ឋកិច្ចពិភពលោកបន្តកំណើនយឺតយ៉ាវក្នុងឆ្នាំ២០២៤គឺជាតួលេខធ្លាក់ចុះ៣ឆ្នាំជាប់គ្នាមកហើយ
. វិបត្តិសកលដែលរួមមានទាំងជម្លោះអ៊ីស្រាអ៊ែល-ហាម៉ាស និងអ៊ុយក្រែន-រុស្សី គឺជាបញ្ហាឬសគល់ដែលធ្វើឲ្យកំណើនសេដ្ឋកិច្ចថយចុះខ្លាំង
. សហរដ្ឋអាមេរិករំពឹងទទួលបានកំណើនត្រឹមតែ១,៦ភាគរយ ខណៈដែលកាលពីឆ្នាំ២០២៣ទទួលបានដល់ទៅ២,៥ភាគរយ
ធនាគារពិភពលោក (World Bank) នៅក្នុងរបាយការណ៍ស្រាវជ្រាវសេដ្ឋកិច្ចចុងក្រោយមួយ The Global Economic Prospects បានព្យាករណ៍ថា ស្ថានភាពសេដ្ឋកិច្ចពិភពលោកក្នុងឆ្នាំនេះនឹងមានកំណើនយឺតយ៉ាវបំផុតធៀបទៅនឹងកំណត់ត្រាច្រើនទសវត្សរ៍ចុងក្រោយនេះ។
ឆ្នាំនេះកំណើនសេដ្ឋកិច្ចពិភពលោកអាចទទួលបានត្រឹមតែ២,៤ភាគរយធៀបទៅនឹងកំណើនដែលពិភពលោកធ្លាប់ធ្វើបានកាលពីឆ្នាំ២០២៣ ប្រមាណជា២,៦ភាគរយ ហើយបើគេសរុបកំណើនសេដ្ឋកិច្ចក្នុងរយៈពេល៥ឆ្នាំចុងក្រោយនេះវាមានស្ថានភាពអាក្រក់បំផុតមិនធ្លាប់មានឡើយក្នុងរយៈពេលជាង៣០ឆ្នាំមកនេះ។
អនុប្រធានផ្នែកសេដ្ឋកិច្ចរបស់ធនាគារពិភពលោក លោក Ayhan Kose បានថ្លែងថា ឆ្នាំនេះកំណើនសេដ្ឋកិច្ចសកលនឹងបន្តធ្លាក់ចុះក្នុងរយៈពេល៣ឆ្នាំជាប់គ្នាដែលធ្វើឲ្យស្ថិរភាពសេដ្ឋកិច្ចចន្លោះឆ្នាំ២០២០ទៅឆ្នាំ២០២៤គឺមានភាពកំសោយជាងវិបត្តិហិរញ្ញវត្ថុសកលកាលពីឆ្នាំ២០០៨ និងឆ្នាំ២០០៩ ផង វិបត្តិហិរញ្ញវត្ថុក្នុងតំបន់អាស៊ីឆ្នាំ១៩៩០ផង ជាមួយនឹងវិបត្តសេដ្ឋកិច្ចឆ្នាំ២០០០ផង។
លោក Kose ដែលបានរៀបរាប់ប្រាប់ក្រុមអ្នកកាសែត CNBC ក៏បានលើកឡើងផងដែរថា កត្តាវិបត្តិសកលដែលមានដូចជាភាពតានតឹងនៅក្នុងជម្លោះអ៊ុយក្រែន-រុស្ស៊ី និងអ៊ីស្រាអែល-ក្រុមហាម៉ាសជាដើមគឺជាដើមចមនៃផលប៉ះពាល់ធ្ងន់ធ្ងរទៅដល់កំណើន។ វិបត្តិទាំងនេះបានបង្កឲ្យតម្លៃថាមពលហក់ឡើងខ្លាំងដែលជាកម្លាំងចលករដ៏សំខាន់ធ្វើឲ្យអត្រាអតិផរណាមានសភាពអាក្រក់ឡើង និងបណ្តាលឲ្យមានការប៉ះពាល់ដល់សកម្មភាពសេដ្ឋកិច្ចខ្លាំងក្លាបំផុត។
នៅក្នុងរបាយការណ៍ស្រាវជ្រាវដដែលនោះធនាគារពិភពលោកក៏បានព្រមានដែរថា បណ្តាប្រទេសមហាអំណាចសេដ្ឋកិច្ចនានាក៏នឹងបានត្រឹមមើលឃើញកំណើនសេដ្ឋកិច្ចក្នុងកម្រិតទន់ខ្សោយបំផុតផងដែរក្នុងឆ្នាំ២០២៤ និងឆ្នាំ២០២៥ ខាងមុខនេះ។ ដោយឡែកក្រុមប្រទេសកំពុងអភិវឌ្ឍក៏នឹងទទួលរងនូវឥទ្ធិពលក្នុងរយៈពេលមធ្យម ឬ Midium-Term (២ឬ៣ខែទៅ២ ឬ ៣ឆ្នាំក្រោយ) ពីភាពរាំងស្ទះនៃការធ្វើពាណិជ្ជកម្មសកលព្រមទាំងលក្ខខណ្ឌមិនអំណោយផលជាច្រើនដែលពាក់ព័ន្ធទៅនឹងវិស័យហិរញ្ញវត្ថុផង។
គួរឲ្យដឹងដែរថា សហរដ្ឋអាមេរិកដែលជាមហាអំណាចសេដ្ឋកិច្ចលេខមួយនោះនឹងអាចមើលកំណើនសេដ្ឋកិច្ចត្រឹមតែ១,៦ភាគរយប៉ុណ្ណោះក្នុងឆ្នាំ២០២៤នេះធៀបទៅនឹងកំណើនដែលទទួលបានកាលពីឆ្នាំទៅប្រមាណជា ២,៥ភាគរយ ប៉ុន្តែប្លុកអឺរ៉ុបនឹងអាចកើនឡើង ០,៧ភាគរយក្នុងឆ្នាំនេះខណៈដែលកាលពីឆ្នាំ២០២៣ទទួលបានត្រឹមតែ០,៤ភាគរយ៕
Account
Security
Favourite Content