សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្នុងគោលបំណងពង្រឹងទំនាក់ទំនងពាណិជ្ជកម្ម និងការវិនិយោគជាមួយកម្ពុជា ហុងកុងគ្រោងនឹងបង្កើតការិយាល័យទីប្រឹក្សាពាណិជ្ជកម្មនៅក្នុងរាជធានីភ្នំពេញ ខណៈបច្ចុប្បន្ននេះ ហុងកុងបានបើកការិយាល័យទីប្រឹក្សាចំនួន៥០កន្លែងហើយនៅលើពិភពលោក ដោយក្នុងប្រទេសតំបន់អាស៊ានក៏មានការិយាល័យទីប្រឹក្សាពាណិជ្ជកម្មចំនួន៦កន្លែងផងដែរ ។ គម្រោងបង្កើតការិយាល័យពាណិជ្ជកម្មនៅក្នុងរាជធានីភ្នំពេញនេះត្រូវបានធ្វើឡើងក្នុងដំណើរទស្សនកិច្ចរបស់នាយកប្រតិបត្តិនៃតំបន់រដ្ឋបាលពិសេសហុងកុង ដែលនឹងសម្រួលដល់ការវិនិយោគរបស់ហុងកុងនៅកម្ពុជា។
លោកPeter K N Lam ប្រធានក្រុមប្រឹក្សាអភិវឌ្ឍន៍ពាណិជ្ជកម្មហុងកុង បានថ្លែងនៅក្នុងពិធីជួបជុំជាមួយធុរជន និងវិនិយោគិនកម្ពុជាកាលពីថ្ងៃទី៣១ ខែកក្កដា ឆ្នាំ២០២៤ ថា បច្ចុប្បន្ននេះ ក្រុមប្រឹក្សាអភិវឌ្ឍន៍ពាណិជ្ជកម្មហុងកុងមានការិយាល័យចំនួន៥០នៅទូទាំងពិភពលោក ក្នុងនោះមានការិយាល័យចំនួន៦នៅក្នុងតំបន់អាស៊ាន ដូចជានៅទីក្រុងបាងកកប្រទេសថៃ ក្រុងហូជីមិញប្រទេសវៀតណាម ទីក្រុងហ្សាការតាប្រទេសឥណ្ឌូនេស៊ី កូឡាឡាំពួរប្រទេសម៉ាឡេស៊ី ម៉ានីលប្រទេសហ្វីលីពីន និងសិង្ហបុរី ។
លោកបន្តថា ក្នុងពេលឆាប់ៗនេះ ក្រុមប្រឹក្សាអភិវឌ្ឍន៍ពាណិជ្ជកម្មហុងកុង នឹងបង្កើតការិយាល័យទីប្រឹក្សាថ្មីមួយនៅរាជធានីភ្នំពេញ ប្រទេសកម្ពុជា ដោយពង្រីកបណ្ដាញរបស់ខ្លួនបន្ថែមទៀតនៅក្នុងតំបន់អាស៊ាន និងតាមខ្សែក្រវាត់ និងផ្លូវរបស់ប្រទេសចិន ។ ចំណែកបេសកកម្មរបស់រដ្ឋបាលពិសេសហុងកុងនៅពេលនេះ គឺដើម្បីស្វែងរកឱកាស និងបង្កើតទំនាក់ទំនងដែលនឹងពង្រឹងភាពជាដៃគូរវាងប្រទេសកម្ពុជា និងហុងកុង ។
អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា បានមានប្រសាសន៍ថា ក្នុងនាមសភាពាណិជ្ជកម្មកម្ពុជា សូមស្វាគមន៍ចំពោះវិនិយោគិន និងធុរជនហុងកុងដែលមានបំណងមកបណ្ដាក់ទុន និងធ្វើធុរកិច្ចនៅក្នុងប្រទេសកម្ពុជា ហើយក្នុងនាមជាធុរជន និងវិនិយោគិនកម្ពុជា ក៏រង់ចាំស្វាគមន៍នូវការបណ្ដាក់ទុនរកស៊ីរួមគ្នា ដើម្បីពង្រឹងទំនាក់ទំនងនូវពាណិជ្ជកម្ម និងវិនិយោគរវាងកម្ពុជា និងហុងកុង ។
ឯកឧត្តម ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១នៃក្រុមប្រឹក្សាអភិវឌ្ឍន៍កម្ពុជាបានបង្ហាញនូវសក្ដានុពល និងកាលានុវត្តភាពវិនិយោគនៅក្នុងប្រទេសកម្ពុជា ក៏ដូចជាច្បាប់វិនិយោគថ្មីនៃព្រះរាជាណាចក្រកម្ពុជា ដែលអាចឱ្យវិនិយោគិនបរទេស រួមទាំងវិនិយោគិនហុងកុងផងនោះ ទទួលបាននូវអត្ថប្រយោជន៍ និងផលចំណេញជាច្រើនពីការបណ្ដាក់ទុនវិនិយោគនៅក្នុងប្រទេសកម្ពុជា ។
ឯកឧត្តមបន្តថា បច្ចុប្បន្ននេះ កម្ពុជាមានផ្លូវល្បឿនលឿន មានកំពង់ផែទឹកជ្រៅ ផ្លូវរថភ្លើង និងហេដ្ឋារចនាសម្ព័ន្ធសម្ព័ន្ធជាច្រើនទៀត ហើយនៅប៉ុន្មានថ្ងៃខាងមុខនេះ កម្ពុជានឹងបើកការដ្ឋានសាងសង់ព្រែកជីកហ្វូណនតេជោ ដូច្នេះមិនយូរនោះទេ ព្រែកជីកនេះ នឹងសាងសង់រួចរាល់ ពេលនោះកម្ពុជានឹងមានប្រព័ន្ធដឹកជញ្ជូនថ្មីមួយទៀត ហើយក៏នឹងធ្វើឱ្យប្រព័ន្ធដឹកជញ្ជូនរបស់កម្ពុជាកាន់តែសំបូរបែប ។
គួរបញ្ជាក់ថា ដើម្បីជំរុញទំនាក់ទំនងពាណិជ្ជកម្ម និងការវិនិយោគរវាងកម្ពុជា – ហុងកុង លោក John KC Lee នាយកប្រតិបត្តិនៃតំបន់រដ្ឋបាលពិសេសហុងកុង បានដឹកនាំធុរជន និងវិនិយោគិនចំនួន៣០ក្រុមហ៊ុន មកទស្សនកិច្ចនៅកម្ពុជា ស្វែងរកដៃគូវិនិយោគនិងអាជីវកម្មរួមគ្នា ។ ម្ចាស់សហគ្រាសនិងក្រុមហ៊ុនដែលមកទស្សនកិច្ចនៅកម្ពុជា មានលើវិស័យហិរញ្ញវត្ថុ ធានារ៉ាប់រង នវានុវត្តន៍ និងបច្ចេកវិទ្យា សេវាកម្មវិជ្ជាជីវៈ ហេដ្ឋារចនាសម្ព័ន្ធ ការដឹកជញ្ជូននិងភស្តុភារកម្ម ថាមពលនិងបដិសណ្ឋារកិច្ចជាដើម ៕
Account
Security
Favourite Content