ភ្នំពេញ ៖ សារព័ត៌មានបានដើរតួនាទីយ៉ាងសំខាន់ក្នុងវិស័យហិរញ្ញវត្ថុ ក្នុងនាមជាអ្នកបញ្ជូនសារអបរំ និងផ្សព្វផ្សាយអំពីការយល់ដឹងហិរញ្ញវត្ថុដល់ប្រជាជនកម្ពុជានៅទូទាំងប្រទេស ស្របពេលប្រព័ន្ធធនាគារនៅតែទាមទារការចូលរួមពីភាគីពាក់ព័ន្ធទាំងអស់ ពិសេសសារព័ត៌មាន ដើម្បីជំរុញវិស័យនេះឱ្យកាន់តែមានភាពរឹងមាំ និងភាពធន់។
ថ្លែងក្នុងពិធីបិទវគ្គបណ្តុះបណ្តាល និងប្រគល់វិញ្ញាបនបត្រដល់អ្នកសារព័ត៌មានស្ដីពីមូលដ្ឋានគ្រឹះនៃវិស័យធនាគារហិរញ្ញវត្ថុ និងធានារ៉ាប់រងនៅកម្ពុជា បានប្រព្រឹត្តទៅដោយជោគជ័យ កាលពីរសៀលថ្ងៃទី១៣ ខែកញ្ញា ឆ្នាំ២០២៣ លោក សុខ វឿន ប្រធានក្រុមប្រឹក្សាភិបាល សមាគមមីក្រូហិរញ្ញវត្ថុកម្ពុជា បានថ្លែងថា សារព័ត៌មានពិតជាមានតួនាទីយ៉ាងសំខាន់ក្នុងដំណើរជីវិតនៅប្រចាំថ្លៃរបស់យើងទាំងអស់គ្នា ដោយមិនអាចខ្វះបានក្នុងការទទួលបានព័ត៌មានពាក់ព័ន្ធនឹងព្រឹត្តិការណ៍សេដ្ឋកិច្ច សង្គម តាមរយៈពេលប្រព័ន្ធផ្សព្វផ្សាយនានាទាំង Online និង Offline។
លោក សុខ វឿន បានបញ្ជាក់ដូច្នេះថា
“ទន្ទឹមនឹងនេះ តួនាទីនៃសារព័ត៌មានក្នុងវិស័យហិរញ្ញវត្ថុ រឹតតែមានសារៈសំខាន់មិនអាចកាត់ផ្តាច់បាន ព្រោះសារព័ត៌មានគឺជាយន្តការ និងជាច្រកដ៏សំខាន់សម្រាប់វិស័យហិរញ្ញវត្ថុ ក្នុងការបញ្ជូនសារអបរំ និងផ្សព្វផ្សាយអំពីការយល់ដឹងហិរញ្ញវត្ថុ ឱ្យកាន់តែទូលំទូលាយដល់ប្រជាជនកម្ពុជានៅទូប្រទេសកម្ពុជា ក្នុងគោលដៅធានាឱ្យបាននូវស្ថិរភាព និងនរន្តរភាពរបស់វិស័យ ក៏ដូចជាការកសាងទំនុកចិត្តក្នុងចំណោមសាធារណជនផងដែរ”។
លោកបានថ្លែងថា ដោយមើលឃើញពីសារៈសំខាន់នេះហើយ ទើបសមាគមទាំងបី (សមាគមមីក្រូហិរញ្ញវត្ថុកម្ពុជា (CMA) សមាគមធនាគារនៅកម្ពុជា (ABC) សមាគមធានារ៉ាប់រងកម្ពុជា (IAC)) រួមជាមួយនឹងក្លឹបអ្នកកាសែតកម្ពុជា បានបង្កើតឱ្យមានវគ្គបណ្តុះបណ្តាលនេះឡើងដើម្បីលើកកម្ពស់ការយល់ដឹងរបស់បងប្អូនសារព័ត៌មានឱ្យកាន់តែស៊ីជម្រៅ ដើម្បីអាចផលិតជាមាតិកាព័ត៌មានដែលមានសុក្រឹតភាព។
លោកបានលើកឡើងថា តាមរយៈការចូលរួមវគ្គបណ្តុះបណ្តាលរយៈពេល ៣ខែកន្លងទៅនេះ លោកសង្ឃឹមជឿជាក់ថា បងប្អូនសារព័ត៌មានដែលជាសិក្ខាកម្ម នឹងទទួលបានចំណេះដឹងកាន់តែទូលំទូលាយអំពីវិស័យហិរញ្ញវត្ថុ ហើយជឿថា វិស័យទាំងពីរ ពោលគឺវិស័យព័ត៌មាន និងវិស័យហិរញ្ញវត្ថុ នឹងមានទំនាក់ទំនងល្អកាន់តែជិតស្និទ្ធ ដើម្បីសហការផ្តល់មាតិកាព័ត៌មានដែលផ្តល់អត្ថប្រយោជន៍ ក៏ដូចជាចំណេះដឹងហិរញ្ញវត្ថុដល់សាធារណៈជនឱ្យចេះគ្រប់គ្រងចាត់តែងហិរញ្ញវត្ថុរបស់ពួកគាត់ឱ្យមានប្រសិទ្ធភាព ដែលនឹងចូលរួមចំណែកលើកស្ថិរភាព និងកំណើនសេដ្ឋកិច្ចជាតិ។
លោក Raymond Sai ប្រធានក្រុមប្រឹក្សាភិបាលសមាគមធនាគារនៅកម្ពុជា បានថ្លែងថា វិស័យហិរញ្ញវត្ថុដើរតួនាទីយ៉ាងសំខាន់ក្នុងការចូលរួមអភិវឌ្ឍន៍សេដ្ឋកិច្ចប្រទេសមួយ ហើយនេះមិនខុសពីនៅកម្ពុជាដែលយើងបានឃើញវិស័យធនាគារ និងហិរញ្ញវត្ថុ គាំទ្រដល់កំណើនសេដ្ឋកិច្ចរបស់ប្រទេស ពិសេសធានាបាននូវសុវត្ថិភាពលើការសន្សំរបស់អតិថិជន និងសាធារណៈជន ហើយអាជីវកម្ម និងបុគ្គលមានភាពងាយស្រួលក្នុងការទទួលបានប្រាក់កម្ចី។
លោក Raymond Sai បានបញ្ជាក់បន្តថា វិស័យហិរញ្ញវត្ថុក៏បានរួមចំណែកដល់ទីផ្សារការងារផងដែរ ខណៈដែលកម្ពុជាមានធនធានមនុស្សប្រហែល ១០ ម៉ឺននាក់ ដែលកំពុងធ្វើការនៅក្នុងវិស័យនេះ។
យោងតាមរបាយការណ៍ប្រចាំឆមាសទី១ ឆ្នាំ២០២៣ របស់ធនាគារជាតិនៃកម្ពុជា វិស័យធនាគារ និងហិរញ្ញវត្ថុរបស់កម្ពុជាបន្តទទួលបានកំណើនប្រកបដោយសុខភាពល្អ ទាំងប្រាក់កម្ចី និងប្រាក់បញ្ញើក្នុងឆមាសទីមួយ ឆ្នាំ២០២៣។
ឥណទានក្នុងវិស័យធនាគារបានកើនឡើង ១៤% ពីមួយឆ្នាំទៅមួយឆ្នាំដល់ប្រហែល ៥៨ ពាន់លានដុល្លារ គិតត្រឹមខែមិថុនា ឆ្នាំ២០២៣ ខណៈប្រាក់បញ្ញើរបស់អតិថិជនបានកើនឡើង ៦.៥% ដល់ប្រហែល ៤៤ ពាន់លានដុល្លារអាមេរិក។ ប្រាក់កម្ចីនេះត្រូវបានបញ្ចេញដើម្បីជួយដល់វិស័យធំៗដូចជា ពាណិជ្ជកម្ម លំនៅដ្ឋាន សំណង់ និងអចលនទ្រព្យ កសិកម្ម សណ្ឋាគារ និងភោជនីយដ្ឋាន និងកម្មន្តសាលជាដើម។
លោក Raymond Sai បានថ្លែងដូច្នេះថា
“ថ្វីត្បិតតែសេដ្ឋកិច្ចសកលមានភាពមិនប្រាដកប្រជាក៏ដោយ វិស័យធនាគាររបស់យើងនៅតែបន្តមានភាពធន់ និងរឹងមាំ។ ធនាគារ និងគ្រឹះស្ថានហិរញ្ញវត្ថុក៏បានរួមចំណែកធ្វើឱ្យប្រសើរឡើងនូវបរិយាបន្នហិរញ្ញវត្ថុ ដែលឆ្លុះបញ្ចាំងពីចំនួនគណនីប្រាក់បញ្ញើដែលបានកើនឡើងដល់ជិត ១៦.៥ លានគណនី និងគណនីប្រាក់កម្ចីបានកើនឡើងដល់ជាង ៣.៨ លានគណនីគិតត្រឹមដំណាច់ខែមិថុនា ឆ្នាំ២០២៣។ ដើម្បីជំរុញប្រព័ន្ធធនាគារឱ្យកាន់តែមានសុវត្ថិភាព និងភាពធន់ ការចូលរួមពីភាគីពាក់ព័ន្ធទាំងអស់គឺត្រូវការជាចាំបាច់ ដែលក្នុងនោះរួមមានសារព័ត៌មាន និងអ្នកសារព័ត៌មានរបស់យើងផងដែរ”៕