សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ រាជរដ្ឋាភិបាលកម្ពុជា បានប្ដេជ្ញាក្នុងការបង្ក្រាបឱ្យបាននូវការឆបោកតាមប្រព័ន្ធបច្ចេកវិទ្យានៅក្នុងប្រទេសកម្ពុជាឱ្យខាងតែបាន ដោយបានដាក់ចេញនូវវិធានការក្ដៅចំពោះមុខដើម្បីអនុវត្តន៍ប្រកបដោយប្រសិទ្ធភាពខ្ពស់។ តាមរយៈការចុះបង្ក្រាបអំពើឆបោកតាមអនឡាញនេះ អ្នកជំនាញអចលនទ្រព្យ និងមន្ត្រីជាន់ខ្ពស់កម្ពុជាបានលើកឡើងស្រដៀងគ្នាថា វានឹងធ្វើឱ្យប៉ះពាល់ផលប្រយោជន៍រយៈពេលខ្លី ប៉ុន្តែវានឹងផ្ដល់ផលចំណេញមកវិញរយៈពេលវែង ។
នៅក្នុងវេទិកាសាធារណៈកាលពីពេលថ្មីៗនេះ ឯកឧត្តមបណ្ឌិតសភាចារ្យ ផាន់ ផល្លា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ បានមានប្រសាសន៍ថា ការបង្ក្រាបអំពើឆបោកតាមប្រព័ន្ធបច្ចេកវិទ្យានៅកម្ពុជា អាចនឹងប៉ះពាល់ដល់សេដ្ឋកិច្ច និងទេសចរណ៍រយៈពេលខ្លី ប៉ុន្តែវានឹងផ្ដល់ផលប្រយោជន៍ត្រឡប់មកវិញដល់សេដ្ឋកិច្ច និងទេសចរណ៍កម្ពុជាក្នុងរយៈពេលវែង ជាពិសេសបង្កើនទំនុកចិត្តដល់បណ្តាអ្នកវិនិយោគបរទេសយ៉ាងប្រសើរ។
ឯកឧត្តមបានលើកឡើងថា ៖
«ការបង្ក្រាបការឆបោកអនឡាញ គឺជាបច្ច័យល្អសម្រាប់ការទទួលបានអ្នកវិនិយោគពិតប្រាកដ អ្នកទេសចរបរទេសដែលចូលមកទស្សនាពិតប្រាកដ ប៉ុន្តែភ្លាមៗនឹងធ្វើឱ្យប៉ះពាល់ដោយចៀសមិនផុតទេ»។
ដោយឡែក សម្រាប់អ្នកជំនាញក្នុងវិស័យអចលនទ្រព្យក៏បានបង្ហាញទស្សនទានស្រដៀងនឹងមន្ត្រីជាន់ខ្ពស់កម្ពុជាផងដែរ ដោយរំពឹងថាក្រោយបង្ក្រាបការឆបោកអនឡាញនេះអស់ កម្ពុជានឹងទទួលបានមកវិញនូវអ្នកវិនិយោគដែលចូលមកវិនិយោគនៅកម្ពុជាពិតប្រាកដ និងអ្នកទេសចរបរទេសមកពីបណ្ដាប្រទេសផ្សេងៗឡើងវិញ ។
ឧកញ៉ាបណ្ឌិត គីម ហ៊ាង ប្រធាន KW Cambodia បានគាំទ្រដល់រាជរដ្ឋាភិបាល បង្ក្រាបនូវការឆបោកតាមប្រព័ន្ធបច្ចេកវិទ្យា( Scam Online ) ចេញពីកម្ពុជាឱ្យអស់ ពីព្រោះថាប្រទេសដែលរីកចម្រើនទៅបានមិនមែនមានក្រុមឆបោកតាមអនឡាញទេ ។
លោកថា ៖
« នៅពេលប្រទេសកម្ពុជាបានបង្ក្រាបការឆបោកតាមប្រព័ន្ធបច្ចេកវិទ្យានេះអស់ នឹងធ្វើឱ្យអ្នកវិនិយោគកាន់តែងាយស្រួលវិនិយោគ ហើយនឹងធ្វើឱ្យប្រទេសកម្ពុជាមានកេរ្តិ៍ឈ្មោះល្អ ដែលធ្វើឱ្យទេសចរបរទេសកាន់តែច្រើនចូលមកទស្សនានៅក្នុងប្រទេសកម្ពុជាយើង ។ ការបង្ក្រាបការឆបោកតាមអនឡាញនេះ ភ្លាមៗវានឹងធ្វើឱ្យប៉ះពាល់ អាចត្រឹម១ឆ្នាំ ឬយូរជាងនេះតិចតួច ប៉ុន្តែនៅពេលដែលយើងបានសម្អាតប្រទេសយើងបានស្អាតហើយនោះ អ្នកវិនិយោគ និងអ្នកទេសចរចូលមកក្រោយ គឺសុទ្ធតែជាអ្នកពិតប្រាកដ ដែលនឹងធ្វើឱ្យកម្ពុជាទទួលបានផលប្រយោជន៍កាន់តែច្រើន»។
លោក នី ជឿន អ្នករត់កង់បីម្នាក់នៅក្រុងព្រះសីហនុ ខេត្តព្រះសីហនុ បានឱ្យដឹងថា មុនពេលបង្ក្រាបការឆបោកអនឡាញ នៅក្នុងក្រុងព្រះសីហនុ មានជនជាតិចិន និងជនបរទេសផ្សេងៗទៀតច្រើន ហើយនៅពេលថ្ងៃទំនេរ ឬពេលយប់ ជនបរទេសទាំងនោះបានដើរកម្សាន្តតាមកន្លែងកម្សាន្តនានាក្នុងក្រុងព្រះសីហនុ ធ្វើឱ្យអ្នករត់កង់បី រត់តាក់ស៊ី រកចំណូលបានក្រាស់ក្រែលក្នុងមួយថ្ងៃៗ ប៉ុន្តែក្រោយមានការប្រកាសបង្ក្រាប ជនបរទេសទាំងនោះ បានចាកចេញពីក្រុងព្រះសីហនុ ត្រលប់ទៅប្រទេសរបស់ពួកគេវិញ ធ្វើឱ្យការរកប្រាក់ចំណូលបាត់បង់ខ្លះ ប៉ុន្តែក៏នៅមានជនបរទេសដែលជាអ្នកទេសចរ អ្នកធ្វើការសុច្ចរឹតបន្តធ្វើការ និងស្នាក់នៅជាធម្មតា មិនធ្វើឱ្យក្រុងព្រះសីហនុស្ងប់ស្ងាត់ខ្លាំងនោះទេ៕
Account
Security
Favourite Content