សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ សេចក្តីប្រកាសព័ត៌មានរបស់សហព័ន្ធស្រូវអង្ករកម្ពុជា (CRF) បានបង្ហាញថា រយៈពេល ១១ខែ ក្នុងឆ្នាំ២០២៣ កម្ពុជានាំចេញអង្ករបានជិត ៦០ម៉ឺនតោន ដោយទទួលបានចំណូលគិតជាទឹកប្រាក់ចំនួន ៤២០លានដុល្លារ ខណៈការនាំចេញស្រូវបានជិត ៤លានតោន គិតជាទឹកប្រាក់ជាង ១១៥៦លានដុល្លារ។
ទិន្នន័យរបស់សហព័ន្ធស្រូវអង្ករ បានបញ្ជាក់ថា ក្នុងរយៈពេល ១១ខែ ចាប់ពីខែមករាដល់ខែវិច្ឆិកា កម្ពុជាបាននាំចេញអង្ករបានចំនួនប្រមាណ ៥៩៥ ៦៣០ តោន ដោយក្រុមហ៊ុននាំចេញអង្ករចំនួន ៦០ ក្រុមហ៊ុនទៅកាន់គោលដៅចំនួន ៦០ ដែលក្នុងនោះប្រទេសចិន និងហុងកុងបានចំនួន ១៩៨ ៧៦១ តោន ដែលគិតជាទឹកប្រាក់បានចំនួន ១២៨ លានដុល្លារ ទៅកាន់ប្រទេសនៅទ្វីបអឺរ៉ុបចំនួន ២៦ប្រទេស បានចំនួន ២៤០ ៧៥១ តោន ដែលគិតជាទឹកប្រាក់បានចំនួន ១៧១.៩០ លានដុល្លារ ។
ជាមួយគ្នានេះនាំចេញទៅកាន់ប្រទេសសមាជិកអាស៊ានចំនួន៦ ប្រទេស បានបរិមាណចំនួន ៧៦ ៥១៤ តោន គិតជាទឹកប្រាក់ចំនួន ៥០.៣៦ លានដុល្លារ និងទៅកាន់គោលដៅផ្សេងទៀតនៅអាហ្វ្រិក មជ្ឈឹមបូព៌ា ..។ល។ ចំនួន ២៦ ប្រទេសបានចំនួន ៧៩ ៦០៤ តោន ដែលគិតជាទឹកប្រាក់បានចំនួន ៧០.៥៤ លានដុល្លារ។
ពូជអង្ករដែលកម្ពុជានាំចេញរួមមាន អង្ករក្រអូប អង្ករសរីរាង្គ អង្ករស អង្ករសំរូប និងអង្ករជប៉ុន។ សម្រាប់ការនាំចេញនេះ ចំពោះប្រភេទអង្ករក្រអូបគ្រប់ប្រភេទចំនួន ៨២.២០% អង្ករស ចំនួន ១៣.១៣% អង្ករចំហ៊ុយ ៣.០៤ % អង្ករសរីរាង្គចំនួន ១.៦១% និង អង្ករសគ្រាប់ខ្លីចំនួន ០.០២%។
ជាមួយគ្នានេះ ប្រទេសកម្ពុជាក៏បាននាំចេញស្រូវចំនួន ៣ ៩២៦ ៥៦៦ តោន ដែលគិតជាទឹកប្រាក់បានប្រមាណជា ១ ១៥៦.៧០ លានដុល្លារ ដែលក្នុងនោះ ៦៤% បាននាំចេញដោយឆ្លងកាត់ការស្នើសុំការបញ្ជាក់ឯកសារនាំចេញ ពីអាជ្ញាធរមានសមត្ថកិច្ច។
អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ លោកជំទាវ អ៊ឹម រចនា បានលើកឡើងថា កិច្ចខិតខំប្រឹងប្រែងរួមគ្នារវាងរដ្ឋាភិបាល និងវិស័យឯកជនបានជួយដល់ការនាំចេញ ហើយប្រទេសចិន និងអឺរ៉ុប គឺជាទីផ្សារដ៏សំខាន់សម្រាប់អង្កររបស់កម្ពុជា។
លោកជំទាវ អ៊ឹម រចនា បានមានប្រសាសន៍ថា៖
«យើងធ្វើការរួមគ្នា ជាមួយនឹងគោលដៅចម្បងក្នុងការនាំមកនូវអត្ថប្រយោជន៍សេដ្ឋកិច្ច សម្រាប់វិស័យកសិកម្មរបស់ប្រទេសកម្ពុជា ហើយដោយហេតុនេះជួយដល់កំណើនសេដ្ឋកិច្ចរបស់ប្រទេស»។
សូមបញ្ជាក់ថា សហព័ន្ធស្រូវអង្ករកម្ពុជាCRF បានកំណត់គោលដៅនាំចេញអង្ករពេញមួយឆ្នាំសម្រាប់ព្រះរាជាណាចក្រកម្ពុជាចំនួន ៧00,000 តោននៅឆ្នាំ២០២៣ និងអង្ករយ៉ាងតិចមួយលានតោននៅឆ្នាំ ២០២៥។
ជាមួយគ្នានេះ កម្ពុជាបាននាំចេញកសិផលមិនមែនអង្ករជិត ៤លានតោនទៅក្រៅប្រទេសក្នុងអំឡុងពេល ១១ ខែដំបូង ដែលរកចំណូលបានជាង ២.៥ ពាន់លានដុល្លារ។ ទំនិញនាំចេញសំខាន់ៗរួមមាន អង្ករ ចេក ស្វាយ ដំឡូងមី គ្រាប់ស្វាយចន្ទី ពោត ប្រេងដូង ម្រេច និងថ្នាំជក់។
ក្រសួងកសិកម្មបានគូសបញ្ជាក់ថា កសិកម្មគឺជាសសរស្តម្ភមួយក្នុងចំណោមសសរស្តម្ភទាំងបួន ដែលជួយដល់សេដ្ឋកិច្ចកម្ពុជា។ វិស័យនេះបានរួមចំណែកប្រមាណ ២៤.៤ ភាគរយ ដល់ផលិតផលក្នុងស្រុកសរុប (GDP) របស់ប្រទេស ក្នុងឆ្នាំ២០២១ ៕
Account
Security
Favourite Content