ភ្នំពេញ ៖ យោង​តាម​សេចក្ដីប្រកាស​ព័ត៌មាន​របស់​គ្រឹះស្ថាន​អង្គរ​ ​ចំនួនភ្ញៀវទេសចរ​ ដែល​ចូល​ទិញ​ប​ណ្ណ ​ឬ​សំបុត្រ​ទស្សនា​អង្គរ​រយៈពេល​១​១​ខែ​ ​ក្នុងឆ្នាំ២០២៣​ ​គិតជា​ទឹកប្រាក់​បានប្រមាណ​ ​៣២,៥៥ លាន​ដុល្លារ​ ដែល​ចំនួន​នេះ​កើន​ឡើងជា​ង ២៦០ ភាគរយ​ ធៀប​នឹងរយៈពេលដូចគ្នា​ឆ្នាំ​២​០​២​២​។​

​​គ្រឹះស្ថាន​អង្គរបានបង្ហាញក្នុងសេចក្តីប្រកាស​ព័ត៌មាន កាលពី​ថ្ងៃទី​ ១ ខែធ្នូ បានឱ្យដឹងថា​ ចាប់ពី​ខែមករា ដល់​ខែវិច្ឆិកា ឆ្នាំ​២០២៣ ភ្ញៀវទេសចរ​បរទេស​ទិញ​សំបុត្រ​ចូល​ទស្សនា​រមណីយដ្ឋាន​អង្គរ មាន ៦៩៩ ៩៩៦​ នាក់​ដោយ​រក​ចំណូល​ពី​ការលក់​សំបុត្រ​បានចំនួន ​៣​២​ ​៥​៤​៦​ ​៨​៤​៧​ដុល្លារ​ ​បើ​ធៀប​រយៈពេល​ដូចគ្នា​កាលពី​ឆ្នាំមុន គឺ​ចំនួន​ភ្ញៀវ​ទិញ​សំបុត្រ បាន​កើនឡើង ២១០,៨៥​ ភាគរយ និង​ចំនួន​ប្រាក់​កើន ២៦១,១២ ​ភាគរយ​។​

ជាមួយនឹង​ចំណូល​ពី​ការលក់​សំបុត្រ​ចូល​ទស្សនា​រមណីយដ្ឋាន​អង្គរ គ្រឹះស្ថាន​អង្គរ ក៏​រកចំណូលបានចំនួន ៦៨៥ ២៣៣​ ដុល្លារ​ ពី​ការលក់​សំបុត្រ​ឱ្យ​ភ្ញៀវ​បរទេស​ចូល​ទស្សនា​នៅ​ប្រាសាទ​កោះ​កេរ ដែលមាន​ចំនួន ១៨៤ ២០០​ ដុល្លារ និង​សំបុត្រ​ទូក​នៅ​កំពង់ផែ​ចុង​​ឃ្នៀ​ស ចំនួន ៥០១ ០៣៣ ​ដុល្លារផងដែរ​។​ សេចក្តីប្រកាសគ្រឹះស្ថាន​អង្គរ​ បាន​បញ្ជាក់ដែរ​ថា ​១​១​ខែ​នេះ​ ​ការ​ដក​ថវិកា​សម្រាប់​ចូល​មូលនិធិ​គន្ធ​បុប្ផា​ ​សរុប​ ​១​ ​៣​៩​៩​ ​៩​៩​២​ដុល្លារ​។​

​​សូមបញ្ជាក់ថា នៅក្នុងកំណត់ត្រា​កាលពី​ឆ្នាំ​ ២០១៩ ចំនួន​ភ្ញៀវទេសចរ​បរទេស​ច្រើន​បំផុត​មាន​ប្រមាណ​ជាង ៦,៦ ​លាន​នាក់ គឺ​គ្រឹះស្ថាន​អង្គរ​រក​ចំណូល​ពី​ការលក់​សំបុត្រ​ឱ្យ​ភ្ញៀវ​បរទេស​បាន​រហូតដល់​ជាង ៨០,៧ ​លាន​ដុល្លារ​។ នេះ​បើ​យោងតាម​សេចក្តីប្រកាស​ព័​ត៌​មាន​របស់​គ្រឹះស្ថាន​អង្គរ។

កាលពី​ឆ្នាំ​ ២០២២ គ្រឹះស្ថាន​អង្គរ​រក​ចំណូល​ពី​ការលក់​សំបុត្រ​ឱ្យ​ភ្ញៀវទេសចរ​បរទេស​បាន ១១,៧៨​ ​លាន​ដុល្លារ ក្នុងនោះ​ចំណូល​ពី​រមណីយដ្ឋាន​អង្គរ​ចំនួន​ ១១,៥៣​លាន​ដុល្លារ​, ប្រាសាទ​កោះ​​កែរ ៩០ ៤៥០​ ដុល្លារ និង​កំពង់ផែ​ចុង​ឃ្នៀ​ស ១៦៥ ៣០៨ ​ដុល្លារ​។​

​គ្រឹះស្ថាន​អង្គរ គឺជា​គ្រឹះស្ថានសាធារណៈ ​ស្ថិតក្រោម​អាណា​ព្យា​បាល​ហិរញ្ញវត្ថុ​ក្រសួង​សេដ្ឋកិច្ច និង​ហិរញ្ញវត្ថុ​ ។ ការប្រមូល​ចំ​ណូ​ល​របស់​គ្រឹះស្ថាន​អង្គរ​រួមមាន រមណីយដ្ឋាន​អង្គរ​, ប្រា​សាទ​កោះ​កេរ​, និង​សំបុត្រ​ទូក​នៅ​កំពង់ផែ​ចុង​ឃ្នៀ​ស​។ តម្លៃ​សំបុត្រ​ចូល​ទស្សនា​រមណីយ​ដ្ឋា​ន​អង្គរ ត្រូវបាន​ចែកចេញជា៣ប្រភេទ គឺ​សំបុត្រ​ចូល​ទស្សនា ១ ​ថ្ងៃ​មានតម្លៃ៣៧​ដុល្លារ​, រយៈ​ពេល ៣​ថ្ងៃ តម្លៃ៦២ដុល្លារ និង៧​ថ្ងៃ មានតម្លៃ៧២​ដុល្លារ​។

ឯកឧត្តម សុខ សូកេន រដ្ឋមន្ត្រីក្រសួងទេសចរណ៍​ បាន​ថ្លែងក្នុង​ពិធី​បិទ​ពិធីបុណ្យ​សមុទ្រ​លើក​ទី​១០ ដែល​ប្រារព្ធ​ធ្វើ​នៅ​ខេត្ត​កែប កាលពី​ថ្ងៃទី​៣ ខែធ្នូ​បានឱ្យដឹងថា កម្ពុជាបានទាក់ទាញភ្ញៀវទេសចរអន្តរជាតិប្រមាណ ៤,៤លាន​​នាក់ក្នុងរយៈពេល ១០ខែ នៃឆ្នាំ២០២៣ ដែលចំនួននេះមានការកើនឡើងគំហុកប្រមាណ ១៨០ ភាគរយ ពីចំនួន ១,​៥៧​ លាននាក់ ធៀបនឹងរយៈពេលដូចគ្នាកាលពីឆ្នាំមុន។

ឯកឧត្តម សុខ សូកេន បានមានប្រសាសន៍​​ថា​ ​កម្ពុជា​ត្រូវ​បាន​គេ​រំពឹង​ថា​នឹង​ទទួល​បាន​ភ្ញៀវ​បរទេស​ប្រមាណ​ ៥,៤ ​លាន​នាក់​ក្នុង​ឆ្នាំ​ ២០២៣​​ ។

របាយការណ៍​​របស់​រដ្ឋ​លេខាធិការដ្ឋាន​អាកាសចរណ៍ស៊ីវិល​ (SSCA) ​បាន​បង្ហាញ​ថា​ ​ចំនួន​អ្នកដំណើរ​តាម​ផ្លូវអាកាស​ដែល​ឆ្លងកាត់​អាកាសយានដ្ឋាន ​ដែល​ទើបនឹង​ចាប់​ផ្តើម​ថ្មី​បាន​កើន​ឡើង​ដល់​ ​៣​ ​២​០​០​ ​នាក់​ក្នុង​មួយ​ថ្ងៃ​ ​ពោល​គឺ​កើន​ឡើង​ពី​មធ្យម​ភាគ​ប្រចាំថ្ងៃ​ពីមុន ​ដែល​មាន​ចំនួន​ ​២​ ​៦​០​០​នាក់​ ​។​ ​អាកាសយានដ្ឋាន​បាន​កត់ត្រា​ចលនា​ហោះហើរ​ប្រចាំថ្ងៃ​ចំនួន​ ​៤​២​ ​ក្នុង​ខែ​តុលា​ ​កើន​ឡើង​ពី​ ​៣​៤​ ​ក្នុង​ខែមុន។

ក្រសួងទេសចរណ៍ ក៏បានព្យាករណ៍ថា ចំនួនភ្ញៀវអន្តរជាតិមកទស្សនាកម្ពុជា នឹងកើនឡើងដល់ ៧ លាននាក់នៅឆ្នាំ២០២៥  ព្រោះថា ទេសចរណ៍ គឺជាសសរស្តម្ភមួយ ក្នុងចំណោមសសរស្តម្ភទាំងបួន ដែលជួយដល់សេដ្ឋកិច្ចរបស់ប្រទេសកម្ពុជា បន្ថែមពីលើការនាំចេញសម្លៀកបំពាក់ ស្បែកជើង និងទំនិញធ្វើដំណើរ កសិកម្ម សំណង់ និងអចលនទ្រព្យ៕