សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ របាយការណ៍របស់ក្រសួងពាណិជ្ជកម្មបានបង្ហាញថា ពាណិជ្ជកម្មរបស់កម្ពុជាជាមួយបណ្តាប្រទេសសមាជិកដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP) ក្នុងរយៈពេល៥ខែដើមឆ្នាំ២០២៤ មានទំហំដល់ ១៤,១៧ ពាន់លានដុល្លារ កើនឡើងប្រមាណ ១៤,២ភាគរយ បើធៀបនឹងក្នុងរយៈពេលដូចគ្នាកាលពីឆ្នាំ២០២៣។
របាយការណ៍ដដែលបានបង្ហាញទៀតថា ចំពោះពាណិជ្ជកម្មរបស់ប្រទេសកម្ពុជាជាមួយប្រទេសជាសមាជិក RCEP ស្មើនឹង ៦៥,៦ ភាគរយ នៃទំហំពាណិជ្ជកម្មសរុប (២១,៦ ពាន់លានដុល្លារ) របស់ខ្លួនក្នុងអំឡុងពេល ៥ខែ នៃឆ្នាំ២០២៤នេះ។
ក្នុងនោះ កម្ពុជាបាននាំចេញផលិតផលដែលមានតម្លៃ ៣,៩៧ ពាន់លានដុល្លារ ទៅកាន់ប្រទេសសមាជិក RCEP កើនឡើង ១២,៤ ភាគរយ ក្នុងរយៈពេលដូចគ្នាធៀបទៅនឹងឆ្នាំមុន ខណៈដែលការនាំចូលទំនិញពីបណ្តាប្រទេសសមាជិក RCEP វិញ មានតម្លៃ ១០,២ ពាន់លានដុល្លារ កើនឡើង ១៤,៩ ភាគរយ បើធៀបទៅនឹងរយៈពេលដូចគ្នាកាលពីឆ្នាំ ២០២៣កន្លងទៅ។ ទន្ទឹមនឹងនោះ ប្រទេសចិន វៀតណាម ថៃ ជប៉ុន និងសិង្ហបុរី គឺជាដៃគូពាណិជ្ជកម្មកំពូលទាំង ៥ របស់កម្ពុជា។
ទាក់ទិននឹងចំណុចនេះ លោកបណ្ឌិត ហុង វណ្ណៈ ប្រធាននាយកដ្ឋានសេដ្ឋកិច្ចអន្តរជាតិនៃវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជា បានមានប្រសាសន៍ថា RCEP បាន និងកំពុងផ្តល់ការជំរុញដ៏ធំមួយដល់កំណើនពាណិជ្ជកម្ម និងសេដ្ឋកិច្ចរបស់កម្ពុជា។ អ្នកជំនាញសេដ្ឋកិច្ចរូបនេះបានប្រាប់ AMS Economy ថា ភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ RCEP បានដើរតួនាទីយ៉ាងសំខាន់ក្នុងការធ្វើសមាហរណកម្មសេដ្ឋកិច្ចក្នុងតំបន់ និងគាំទ្រដល់យន្តការពហុភាគីនិយម ដែលលើកកម្ពស់សមត្ថភាពពាណិជ្ជកម្មក្នុងតំបន់ និងជំរុញកំណើនសេដ្ឋកិច្ចទៅវិញទៅមក។
លោកបណ្ឌិតបានសង្កត់ធ្ងន់ថា៖
«ជាការកត់សម្គាល់ ការនាំចេញរបស់កម្ពុជាទៅកាន់ប្រទេសក្របខ័ណ្ឌអាសិប គឺយើងមានកំណើន តែមិនច្រើនប៉ុន្មានទេបើប្រៀបធៀបទៅនឹងការនាំចេញទៅបណ្ដាប្រទេសនៅសហភាពអឺរ៉ុប និងសហរដ្ឋអាមេរិក។ ដូច្នេះតើយើងត្រូវនាំអ្វីបន្ថែមទៀត ដើម្បីពង្រីកការនាំចេញទៅកាន់ទីផ្សារខាងក្រៅ ក្នុងក្របខ័ណ្ឌ RCEP នេះ»។
ជាការយល់ឃើញរបស់លោក បច្ចុប្បន្ន កម្ពុជាមានផលិតផលក្នុងស្រុកដែលអាចធានាការផ្គត់ផ្គង់ឱ្យគេបានកម្រិតណាមួយ ជាពិសេសផលិតផលកសិផលតែម្ដង។ ដូច្នេះ ជំហានបន្ទាប់គឺទាមទារឱ្យមានភាពច្បាស់លាស់ និងជំរុញការផលិត និងកែច្នៃដែលស្របទៅតាមស្តង់ដារបន្ថែមទៀត ដើម្បីបង្កើនការនាំចេញ។
សូមជម្រាបថា កិច្ចព្រមព្រៀងពាណិជ្ជកម្មសេរីគ្រប់ជ្រុងជ្រោយក្នុងតំបន់ RCEP បានចូលជាធរមាននៅថ្ងៃទី ១ ខែមករា ឆ្នាំ២០២២។ កតិកាសញ្ញាពាណិជ្ជកម្មក្នុងតំបន់មាន ១៥ ប្រទេសនៅអាស៊ីប៉ាស៊ីហ្វិក រួមទាំងរដ្ឋសមាជិកចំនួន ១០ នៃសមាគមប្រជាជាតិអាស៊ីអាគ្នេយ៍ (អាស៊ាន) – ប្រ៊ុយណេ កម្ពុជា ឥណ្ឌូនេស៊ី ឡាវ ម៉ាឡេស៊ី មីយ៉ាន់ម៉ា ហ្វីលីពីន សិង្ហបុរី ថៃ និងវៀតណាម — និងដៃគូពាណិជ្ជកម្មចំនួន ៥ ដូចជា ចិន ជប៉ុន កូរ៉េខាងត្បូង អូស្ត្រាលី និងនូវែលសេឡង់៕
Account
Security
Favourite Content