ភ្នំពេញ៖ សមាគមមីក្រូហិរញ្ញវត្ថុកម្ពុជា (CMA) នឹងរៀបចំសន្និសីទប្រចាំឆ្នាំសម្រាប់ឆ្នាំ២០២៥ របស់ខ្លួននៅថ្ងៃទី៥ ខែធ្នូ ឆ្នាំ២០២៥ នៅមជ្ឈមណ្ឌលសន្និបាត និងសណ្ឋាគារសុខា (Sokha Siem Reap Resort & Convention Center) ក្នុងខេត្តសៀមរាប។ ថ្នាក់ដឹកនាំ អ្នកគ្រប់​គ្រងជាន់ខ្ពស់ និងអ្នកជំនាញមកពីវិស័យធនាគារនិងហិរញ្ញវត្ថុ និយតករ ទីភ្នាក់ងារដ្ឋាភិបាលនិងស្ថាប័នពាក់ព័ន្ធផ្សេងទៀតនឹងអញ្ជើញចូលរួមសន្និសីទនេះ។

សន្និសីទមីក្រូហិរញ្ញវត្ថុប្រចាំឆ្នាំ (AMC) គឺជាវេទិកាដ៏សំខាន់បំផុតរបស់វិស័យមីក្រូហិរញ្ញវត្ថុដែលប្រមូលផ្តុំអ្នកបង្កើតគោលនយោបាយជាន់ខ្ពស់ អ្នកដឹកនាំអាជីវកម្ម និងនាយកប្រតិបត្តិពីគ្រឹះស្ថានធនាគារ និង មីក្រូហិរញ្ញវត្ថុ ដើម្បីដោះស្រាយបញ្ហាសំខាន់ៗនិងលើកឡើងពីនិន្នាការ និងឱកាសដែលកំណត់ដល់ការអភិវឌ្ឍរបស់វិស័យហិរញ្ញវត្ថុនៅកម្ពុជា។

សន្និសីទមីក្រូហិរញ្ញវត្ថុត្រូវបានទទួលស្គាល់ថាជាព្រឹត្តិការណ៍ដ៏សំខាន់មួយសម្រាប់អ្នកដឹកនាំក្នុងវិស័យក្នុងការកសាងបណ្តាញ ផ្លាស់ប្តូរការយល់ដឹងអំពីភាពជោគជ័យ និងបញ្ហាប្រឈម និងទទួលបានព័ត៌មានអំពីនិន្នាការនៃការអភិវឌ្ឍន៍ដែលកំពុងកើតមានឡើង និងក្របខ័ណ្ឌបទប្បញ្ញត្តិដែលកំពុងវិវត្ត។

សម្រាប់ឆ្នាំ២០២៥ នេះ សន្និសីទមីក្រូហិរញ្ញវត្ថុប្រចាំឆ្នាំ នឹងធ្វើឡើងក្រោមប្រធានបទ “បរិយាបន្នហិរញ្ញវត្ថុកម្ពុជាក្នុងបរិបទបម្រែបម្រួលជាសកល” ដែលមានគោលបំណង៖

១. កសាងមូលដ្ឋាននៃទំនុកចិត្តតាមរយៈការជំរុញការផ្ដល់ឥណទានប្រកបដោយការទទួលខុសត្រូវខ្ពស់ លើកកម្ពស់ក្របខ័ណ្ឌការពារអតិថិជន និងបង្កើនចំណេះដឹងផ្នែកហិរញ្ញវត្ថុឱ្យកាន់តែស៊ីជម្រៅ ដើម្បីធានាសុខុមាលភាពអតិថិជនយូរអង្វែង និងស្ថិរភាពរបស់វិស័យ។

២. ពន្លឿនបរិវត្តកម្មឌីជីថល ដោយស្វែងយល់ពីយុទ្ធសាស្ត្រអនុវត្តជាក់ស្ដែងក្នុងការប្រើប្រាស់បច្ចេកវិទ្យាប្រកបដោយនវានុវត្តន៍ដូចជាបច្ចេកវិទ្យា AI ការវិភាគទិន្នន័យ និងភ្លែតហ្វមឌីជីថល ដើម្បីបង្កើនប្រសិទ្ធភាពប្រតិបត្តិការ ពង្រីកបរិយាបន្នហិរញ្ញវត្ថុ និងកាត់បន្ថយហានិភ័យក្នុងការផ្ដល់ប្រាក់កម្ចី។

៣.ធ្វើឱ្យហិរញ្ញប្បទានអាកាសធាតុក្លាយជាចរន្តសំខាន់មួយ ដែលផ្តោតលើការបង្កើតផែនទីបង្ហាញផ្លូវច្បាស់លាស់សម្រាប់ការអភិវឌ្ឍនិងការពង្រីកផលិតផលហិរញ្ញវត្ថុបៃតង។

៤. ជំរុញកិច្ចសហប្រតិបត្តិការក្នុងចំណោមភាគីពាក់ព័ន្ធ ដើម្បីពង្រឹងកិច្ចខិតខំប្រឹងប្រែងរវាងនិយតករ គ្រឹះស្ថានហិរញ្ញវត្ថុ និងដៃគូបច្ចេកវិទ្យា ដើម្បីបង្កើនភាពធន់រួមនៃវិស័យហិរញ្ញវត្ថុរបស់យើង។

៥. ផ្តល់ជូននូវទិន្នន័យស៊ីជម្រៅ និងទស្សនវិស័យឆ្ពោះទៅមុខ ដល់ថ្នាក់ដឹកនាំគ្រប់រូបដែលបានចូលរួម ដើម្បីជម្នះភាពមិនប្រាកដប្រជានៃសេដ្ឋកិច្ច សម្របខ្លួនទៅនឹងបទប្បញ្ញត្តិដែលកំពុងវិវត្ត និងចាប់យក     ឱកាសកំណើនថ្មីៗក្នុងបរិបទដែលផ្លាស់ប្តូរយ៉ាងឆាប់រហ័ស។

នៅឆ្នាំនេះ សមាគមមីក្រូហិរញ្ញវត្ថុកម្ពុជារំពឹងថាមានអ្នកចូលរួមជាង ៤០០នាក់ ដែលជានាយកប្រតិបត្តិ និងថ្នាក់គ្រប់គ្រងជាន់ខ្ពស់នៃគ្រឹះស្ថានធនាគារ និង​ហិរញ្ញវត្ថុ និយតករមកពីស្ថាប័នពាក់ព័ន្ធ រួមទាំង ធនាគារជាតិនៃកម្ពុជា(NBC)និងក្រសួងសេដ្ឋកិច្ចនិងហិរញ្ញវត្ថុ ដៃគូអភិវឌ្ឍន៍ វិនិយោគិននិងអ្នកជំនាញអន្តរជាតិ។

នៅក្នុងពិធីនេះ វាគ្មិនជំនាញៗដែលមានពីទាំងវិស័យឯកជន និយ័តករ ស្ថាប័នអន្តរជាតិ និងរដ្ឋាភិបាលនឹងចូលរួមធ្វើបទបង្ហាញនិងកិច្ចពិភាក្សាផ្សេងៗ ក្រោម ប្រធានបទសំខាន់សម្រាប់វិស័យ ដែលផ្តោតលើចក្ខុវិស័យសេដ្ឋកិច្ចពិភពលោក តំបន់ និងកម្ពុជា ហិរញ្ញវត្ថុបៃតង កិច្ចការពារអតិថិជន ហិរញ្ញវត្ថុប្រកប​ដោយ​បរិយាបន្ន ឌីជីថលូបនីយកម្ម បច្ចេកវិទ្យា ការច្នៃប្រឌិតថ្មី ការចូលរួមពីមនុស្សជំនាន់ Gen Z ក្នុងកម្លាំងពលកម្មជាដើម។សន្និសីទនឹងស្វែងយល់ពីរបៀបដែល ស្ថាប័នហិរញ្ញវត្ថុអាចជំរុញការអនុវត្តន៍បរិយាបន្ននិងការទទួលខុសត្រូវ ក្នុងការកសាងវិស័យប្រកបដោយចីរភាព និងរួមចំណែកដល់សេដ្ឋកិច្ចដែលមានភាព ធន់តាមរយៈការសម្របខ្លួនទៅនឹងប្រព័ន្ធឌីជីថល។

គួរជម្រាបថា៖សមាគមមីក្រូហិរញ្ញវត្ថុកម្ពុជា បានរៀបចំសន្និសីទមីក្រូហិរញ្ញវត្ថុប្រចាំឆ្នាំ (AMC) ចាប់តាំងពីឆ្នាំ២០០៨ដែលបង្កើតបានជាវេទិកាដ៏ធំមួយសម្រាប់កិច្ចសន្ទនាយុទ្ធសាស្ត្រក្នុងវិស័យហិរញ្ញវត្ថុ។

តាមលទ្ធផលរំពឹងទុក អ្នកចូលរួមនឹងទទួលបានអត្ថប្រយោជន៍ជាច្រើនរួមមាន៖១-ទទួលបានទស្សនៈស៊ីជម្រៅ និងព័ត៌មានអំពីស្ថិរភាពវិស័យហិរញ្ញវត្ថុ ភាព ធន់នៃសេដ្ឋកិច្ច បញ្ហាប្រឈម និងឱកាស,២-សិក្សាស្វែងយល់និងសហការកាន់តែប្រសើរ ដើម្បីលើកកម្ពស់យន្តការផ្ដល់ហិរញ្ញប្បទានដល់សហគ្រាសធុនតូចនិងមធ្យម (SMEs) វិស័យអនាម័យនិងទឹកស្អាត និងហិរញ្ញវត្ថុបៃតង ,៣-ស្វែងយល់ និងចូលរួមក្នុងការពង្រឹងគំនិតផ្ដួចផ្ដើមនានាក្នុងវិស័យពាក់ព័ន្ធនឹង​ហិរញ្ញប្បទានប្រកបដោយការទទួលខុសត្រូវនិងបរិយាបន្ននិងកិច្ចខិតខំប្រឹងប្រែងការទប់ស្កាត់អ្នកផ្តល់សេវាហិរញ្ញវត្ថុក្រៅប្រព័ន្ធនិងធនាគារឌីជីថល,៤-ពង្រីកបណ្ដាញទំនាក់ទំនងនិងឱកាសភាពជាដៃគូជាមួយនិយតករ ភ្ញៀវកិត្តិយស និងវាគ្មិនមកពីវិស័យផ្សេងៗ ដើម្បីពង្រឹងកិច្ចសហប្រតិបត្តិការ និងផ្លាស់ប្តូរយោបល់ និងចាប់យកនិន្នាការ និងយន្តការយុទ្ធសាស្ត្រសំខាន់ៗនិងដើម្បីពង្រឹង ឬច្នៃប្រឌិតយុទ្ធសាស្ត្រអាជីវកម្មផ្ទាល់ខ្លួនដើម្បីឱ្យមានភាពធន់កាន់តែខ្លាំង៕