សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ក្នុងគោលដៅប្រែក្លាយខ្លួនជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងមានចំណូលខ្ពស់នៅឆ្នាំ ២០៥០ កម្ពុជាបានដាក់ចេញឱ្យអនុវត្តនូវគោលនយោបាយជាច្រើន ដោយក្នុងនោះ វិស័យសុខាភិបាលក៏ជាវិស័យអាទិភាពមួយផងដែរ ដោយរាជរដ្ឋាភិបាលបានជំរុញឱ្យមានការវិវត្តកាន់តែទំនើបថែមទៀត ដើម្បីឱ្យការព្យាបាលកាន់តែសម្បូរបែប និងមានប្រសិទ្ធភាពខ្ពស់។
យ៉ាងណាមិញ បច្ចុប្បន្ននេះការព្យាបាលច្រើនតែប្រព្រឹត្តទៅនៅតាមមន្ទីរពេទ្យធំៗដែលស្ថិតនៅទីប្រជុំជននៃខេត្តដែលតម្រូវឱ្យអ្នកជំងឺធ្វើដំណើរឆ្ងាយដើម្បីទទួលបានការព្យាបាល ឬពិគ្រោះយោបល់។ ដោយមើលឃើញពីចន្លោះប្រហោងនេះ ស្ត្រីម្នាក់បានចាប់ផ្ដើមអាជីវកម្មមួយ ដោយការផ្ដល់នូវសេវាព្យាបាលចល័ត ដោយអ្នកជំងឺមិនពិបាកក្នុងការធ្វើដំណើរស្វែងរកមន្ទីរពេទ្យនោះទេ ប៉ុន្តែអ្នកជំនាញផ្នែកព្យាបាល និងផ្ដល់សេវាប្រឹក្សាយោបល់នឹងទៅដល់លំនៅដ្ឋានអ្នកជំងឺតែម្ដង។
បើតាមលោកស្រី ឌី ផន ភិរម្យ នាយិការក្រុមហ៊ុន ថែទាំសុខភាពចល័ត ម៉ាច់ (MUCH Mobile Health Care) បានឱ្យដឹងថា ក្រុមហ៊ុនផ្ដល់សេវាថែទាំសុខភាពតាមផ្ទះរបស់លោកស្រី ត្រូវបានបង្កើតឡើងនៅឆ្នាំ២០១៦។ បន្ទាប់ពីបង្កើតអាជីវកម្មនេះ លោកស្រីបានស្វះស្វែងចូលរួមក្នុងវគ្គបណ្ដុះបណ្ដាល និងកម្មវិធីប្រកួតប្រជែងជាច្រើន ក្នុងគោលបំណងរកការគាំទ្របន្ថែម។ ដោយសារការខិតខំប្រឹងប្រែងជាបន្តបន្ទាប់ នៅត្រឹមឆ្នាំ២០១៧ លោកស្រីបានឈ្នះការប្រកួតពានរង្វាន់សហគ្រិនវ័យក្មេង។
ក្រោយមកទៀត នៅឆ្នាំ២០២២ លោកស្រីក៏បានជាប់ពានរង្វាន់ Superstar Award និងបានប្រែក្លាយអាជីវកម្មរបស់ខ្លួនទៅជាអាជីវកម្មបរិយាបន្ន។ ក្រៅតែពីជ័យលាភីទាំង២នេះ លោកស្រីក៏ទទួលបានពានរង្វាន់មួយទៀតគឺ ASEAN Women Entrepreneurship Network Award នៅក្នុងឆ្នាំ២០២៣។ តាមរយៈភាពជោគជ័យនៅក្នុងការប្រកួតប្រជែងទាំងក្នុង និងក្រៅស្រុកនេះ លោកស្រី ឌី ផន ភិរម្យ បានពង្រីកសេវាកម្មរបស់ខ្លួនបន្ថែមទៀតឱ្យកាន់តែសម្បូរបែប។ ជាក់ស្ដែង នាពេលបច្ចុប្បន្ននេះ ក្រុមហ៊ុន ថែទាំសុខភាពចល័ត ម៉ាច់ មានផ្ដល់នូវសេវាកម្មថែទាំសុខភាពដល់ផ្ទះ សេវាថែទាំសុខភាពឆ្លងប្រទេស និងសេវាថែទាំអ្នកដំណើរជាដើម។
យ៉ាងណាមិញ លោកស្រី ឌី ផន ភិរម្យ បានបញ្ជាក់ផងដែរថា ក្រុមហ៊ុនរបស់ខ្លួនគឺជាក្រុមហ៊ុនទីមួយនៅកម្ពុជាដែលមានផ្ដល់នូវសេវាថែទាំចល័តបែបនេះ។ ដូច្នេះហើយ ក្នុងរយៈពេលប៉ុន្មានឆ្នាំចុងក្រោយក្នុងការឈរជើងនេះ ក្រុមហ៊ុនរបស់លោកស្រីបានរួមចំណែកធ្វើឱ្យប្រសើរឡើងនូវសេវាសុខាភិបាលតាមរយៈការផ្ដល់ជូនសេវាកម្មដែលរហ័ស និងមានគុណភាព។
គួរបញ្ជាក់ថា ប្រភេទធុរកិច្ចបរិយាបន្ននេះ គឺជាអ្វីដែលរាជរដ្ឋាភិបាលផ្ដោតការយកចិត្តទុកដាក់ និងជំរុញឱ្យមានកាន់តែច្រើន។ អាជីវកម្មបរិយាបន្ននឹងផ្ដល់នូវភាពវិជ្ជមាន ឈ្នះ-ឈ្នះ-ឈ្នះ ទៅកាន់រាជរដ្ឋាភិបាល ម្ចាស់អាជីវកម្ម និងប្រជាជន ដែលមានជីវភាពក្រីក្រ។ អាជីវកម្មបរិយាបន្ននេះ ក៏ជាគំរូនៃការជំរុញសេដ្ឋកិច្ចបែបថ្មី ហើយក៏ជាទំនោរដ៏ពេញនិយមរបស់ប្រទេសជាច្រើននៅជុំវិញពិភពលោក៕
Account
Security
Favourite Content