បរទេស៖​ យោងតាមប្រភពព័ត៌មានពី Al Jazeera បានរាយការណ៍ថា ឥណ្ឌា បានប្រកាសកាត់បន្ថយពន្ធលើទំនិញប្រើប្រាស់រាប់រយមុខចាប់ពីសាប៊ូ រហូតដល់រថយន្តធុនតូច ដើម្បីជំរុញតម្រូវការក្នុងស្រុក និងទប់ទល់ពីទណ្ឌកម្មពន្ធគយដល់ទៅ ៥០% របស់ប្រធានាធិបតីអាម៉េរិក Donald Trump។

កាលពីខែសីហា ការដាក់ពន្ធដល់ទៅ ៥០%​ របស់អាម៉េរិកលើការនាំចូលពីឥណ្ឌាបានចូលជាធរមាន ដែលបង្កើនការភ័យខ្លាចចំពោះការធ្លាក់ចុះសេដ្ឋកិច្ច។

រដ្ឋមន្ត្រីក្រសួងហិរញ្ញវត្ថុរបស់ឥណ្ឌា Nirmala Sitharaman បានប្រកាសថា ពន្ធលើទំនិញ និងសេវាកម្ម (GST) ត្រូវបានកែសម្រួលឡើងវិញ ដើម្បីសម្រួលប្រព័ន្ធពន្ធ ៤ ទម្រង់ដ៏ស្មុគស្មាញរបស់ឥណ្ឌា និងកាត់បន្ថយការយកពន្ធលើវិស័យនានា។ ក្រុមប្រឹក្សាដែលដឹកនាំដោយ Sitharaman បានអនុម័តរចនាសម្ព័ន្ធអត្រាពន្ធពីរទម្រង់គឺ ៥% និង ១៨% ខណៈដែលរចនាសម្ព័ន្ធចាស់មាន ៤ ទម្រង់ គឺ ៥%, ១២%,១៨%, និង ២៨%។

កំណែទម្រង់ពន្ធលើទំនិញ និងសេវាកម្ម (GST) ត្រូវបានអនុម័តដោយកាត់បន្ថយពន្ធលើទំនិញប្រើប្រាស់ដូចជា ថ្នាំដុសធ្មេញ និងសាប៊ូកក់សក់ពី ១៨% មកត្រឹម​ ៥% ប៉ុណ្ណោះ ហើយរថយន្តខ្នាតតូច ម៉ាស៊ីនត្រជាក់ និងទូរទស្សន៍ពី ២៨% មកត្រឹម ១៨%។ លើសពីនេះ ការធានារ៉ាប់រងអាយុជីវិត និងសុខភាពនឹងមិនជាប់ពន្ធនោះទេ។ ការកាត់បន្ថយពន្ធ GST មិនពាក់ព័ន្ធទៅនឹងភាពចលាចលបង្កដោយពន្ធពីខាងក្រៅសុទ្ធសាធនោះទេ ប៉ុន្តែជាផ្នែកមួយនៃកំណែទម្រង់ដែលបានគ្រោងទុកជាយូរមកហើយ។

ទន្ទឹមនឹងនេះ រដ្ឋាភិបាលឥណ្ឌាបានប៉ាន់ប្រមាណថា សេដ្ឋកិច្ចអាចនឹងខាតបង់ប្រាក់ចំនួន ៤៨០ ពាន់លានរូពី (៥,៤៩ ពាន់លានដុល្លារ) ខណៈដែលវិធានការនេះនឹងត្រូវបានអនុវត្តចាប់ពីថ្ងៃទី ២២ ខែកញ្ញា ដែលជាថ្ងៃដំបូងនៃពិធីបុណ្យហិណ្ឌូ Navratri ។ យ៉ាងណាមិញ គេរំពឹងថា វានឹងជំរុញការប្រើប្រាស់ក្នុងស្រុកដោយសារតែការកាត់បន្ថយពន្ធ GST គួបផ្សំជាមួយនឹងការកាត់បន្ថយពន្ធផ្ទាល់ខ្លួនកាលពីខែកុម្ភៈ។

លោក Soumya Kanti Ghosh ប្រធានសេដ្ឋវិទូនៅ SBI បាននិយាយថា ពលរដ្ឋក្នុងស្រុកអាចនឹងចំណាយបន្ថែមទៀត ដែលជំរុញដល់ការប្រើប្រាស់ក្នុងស្រុក ប៉ុន្តែវាគឺជាសញ្ញាវិជ្ជមាន និងមិនប៉ះពាល់ ឬ ស្ទើរតែគ្មានទៅដល់ចំណូលរបស់រដ្ឋាភិបាលនោះទេ។

ជាមួយគ្នានេះគេរំពឹងថា ការផ្លាស់ប្តូរអត្រាពន្ធរបស់រដ្ឋាភិបាលឥណ្ឌ នឹងជំរុញដល់ការលក់របស់ក្រុមហ៊ុនដែលផ្គត់ផ្គង់ទំនិញប្រើប្រាស់ ដូចជា ក្រុមហ៊ុន Hindustan Unilever, ក្រុមហ៊ុន Godrej Industries និងក្រុមហ៊ុនអេឡិចត្រូនិកប្រើប្រាស់ដូចជា Samsung Electronics LG Electronics និង Sony ។ ក្រៅពីនេះ ក្រុមហ៊ុនផលិតរថយន្តដូចជា Maruti, Toyota Motor, និង Suzuki Motor ប្រៀបបានជាអ្នកឈ្នះរង្វាន់ធំ។

សូមបញ្ជាក់ថា ការកាត់បន្ថយពន្ធបានកើតឡើងបន្ទាប់ពីនាយករដ្ឋមន្ត្រីឥណ្ឌា Narendra Modi អំពាវនាវឲ្យប្រទេសមានការពឹងផ្អែកលើខ្លួនឯងឲ្យកាន់តែខ្លាំង និងបានសន្យាថា នឹងកាត់បន្ថយពន្ធ GST ដើម្បីទប់ទល់នឹងពន្ធអាម៉េរិករហូតដល់ ៥០%។ បន្ទាប់ពីការកាត់បន្ថយពន្ធត្រូវបានប្រកាសកាលពីថ្ងៃពុធ នៅក្នុងការធ្វើកំណែទម្រង់យ៉ាងទូលំទូលាយនេះនឹងធ្វើឱ្យជីវិតរស់នៅរបស់ពលរដ្ឋឥណ្ឌាកាន់តែប្រសើរឡើង និងធានាភាពងាយស្រួលនៃការធ្វើអាជីវកម្មទាំងអស់គ្នា ជាពិសេសពាណិជ្ជករខ្នាតតូច ក៏ដូចជាអាជីវកម្មធំៗ៕