សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងតាមប្រភពព័ត៌មានពី Al Jazeera បានរាយការណ៍ថា ចក្រភពអង់គ្លេស និងឥណ្ឌា បានចុះហត្ថលេខាលើកិច្ចព្រមព្រៀងពាណិជ្ជកម្មដែលនឹងកាត់បន្ថយពន្ធលើទំនិញនាំចូលចាប់ពីវាយនភណ្ឌរហូតដល់ស្រាវីស្គី រថយន្ត និងគ្រឿងទេស ហើយថែមទាំងអនុញ្ញាតឱ្យមានទីផ្សារកាន់តែច្រើនសម្រាប់អាជីវកម្មទាំងនេះផងដែរ។
កាលពីថ្ងៃព្រហស្បតិ៍ សប្ដាហ៍នេះ នាយករដ្ឋមន្ត្រីអង់គ្លេស លោក Keir Starmer បានសាទរចំពោះកិច្ចព្រមព្រៀងសម្រាប់ប្រទេសទាំងពីរ ខណៈដែលរដ្ឋមន្ត្រីពាណិជ្ជកម្មចក្រភពអង់គ្លេស Jonathan Reynolds និងឥណ្ឌា Piyush Goyal បានចុះហត្ថលេខាជាផ្លូវការលើកិច្ចព្រមព្រៀងមួយនេះ។ កាលពីខែឧសភាកន្លងទៅ ទាំងនាយករដ្ឋមន្ត្រីអង់គ្លេស Keir Starmer និងនាយករដ្ឋមន្ត្រីឥណ្ឌា Narendra Modi បានប្រកាសថា ពួកគេបានឈានដល់កិច្ចព្រមព្រៀងពាណិជ្ជកម្មសេរីមួយបន្ទាប់ពីដំណើរការចរចាអស់រយៈពេល ៣ឆ្នាំត្រូវបានបញ្ចប់ ដោយភាគីទាំងពីរបានពន្លឿនកិច្ចខិតខំប្រឹងប្រែងដើម្បីឈានដល់កិច្ចព្រមព្រៀង ខណៈដែលពន្ធគយរបស់ Donald Trump កំពុងគំរាមដល់សេដ្ឋកិច្ចពិភពលោក។
លោក Starmer បាននិយាយថា ៖
«នេះមិនមែនជាការពង្រីក ឬដាក់កំណត់លើកិច្ចសហការរបស់យើងជាមួយឥណ្ឌាទេ។ យើងមានចំណងពិសេសនៃប្រវត្តិសាស្ត្រ គ្រួសារ និងវប្បធម៌ ហើយយើងចង់ពង្រឹងទំនាក់ទំនងឱ្យកាន់តែរឹងមាំឡើង និងផ្តោតលើរយៈពេលវែង។ លើសពីនេះ កិច្ចព្រមព្រៀងនេះគឺជាកិច្ចព្រមព្រៀងពាណិជ្ជកម្មដ៏ធំបំផុត និងសំខាន់បំផុត ដែលចក្រភពអង់គ្លេសបានធ្វើចាប់តាំងពីការចាកចេញពីសហភាពអឺរ៉ុបក្នុងឆ្នាំ២០២០»។
សម្រាប់ប្រទេសឥណ្ឌា កិច្ចព្រមព្រៀងនេះតំណាងឱ្យភាពជាដៃគូយុទ្ធសាស្ត្រដ៏ធំបំផុតរបស់ខ្លួនជាមួយនឹងប្រទេសសេដ្ឋកិច្ចជឿនលឿនមួយ ដែលអាចផ្តល់ជាគំរូសម្រាប់កិច្ចព្រមព្រៀងរបស់ខ្លួនដែលអូសបន្លាយជាយូរណាស់មកហើយជាមួយសហភាពអឺរ៉ុប ក៏ដូចជាការពិភាក្សាជាមួយតំបន់ផ្សេងទៀត។ មិនត្រឹមតែប៉ុណ្ណោះ ប្រទេសទាំងពីរក៏បានប្រកាសផងដែរនូវកិច្ចព្រមព្រៀងពាណិជ្ជកម្ម និងការវិនិយោគដែលមានទឹកប្រាក់ជិត ៦ ពាន់លានផោន (៨ ពាន់លានដុល្លារ) នៅក្នុងពាណិជ្ជកម្ម និងការវិនិយោគសម្រាប់បញ្ញាសិប្បនិម្មិត (AI) និងផលិតផលទឹកដោះគោ។ បន្ថែមពីនេះ ភាគីទាំងពីរបានសន្យាថានឹងធ្វើការជាមួយគ្នាកាន់តែជិតស្និទ្ធក្នុងវិស័យការពារជាតិ ការធ្វើចំណាកស្រុក អាកាសធាតុ និងសុខភាព។ ទន្ទឹមនឹងនេះ ចក្រភពអង់គ្លេស និងឥណ្ឌាសង្ឃឹមថា កិច្ចព្រមព្រៀងនេះនឹងជំរុញពាណិជ្ជកម្មរវាងប្រទេសទាំងពីរបន្ថែម ៣៤,៤ ពាន់លានដុល្លារក្នុងមួយឆ្នាំ។ រដ្ឋាភិបាលចក្រភពអង់គ្លេសបានលើកឡើថា កិច្ចព្រមព្រៀងនេះនឹងកាត់បន្ថយពន្ធជាមធ្យមរបស់ឥណ្ឌាលើទំនិញនាំចូលពីអង់គ្លេសពី ១៥% មកត្រឹម ៣% ខណៈដែលពន្ធនាំចូលលើស្រាវីស្គី និងជីន នឹងត្រូវកាត់បន្ថយពាក់កណ្តាលពី ១៥០% មកត្រឹម ៧៥%។ ជាងនេះទៅទៀត ពន្ធលើរថយន្តនឹងធ្លាក់ចុះពីជាង ១០០% មកត្រឹម ១០% ប៉ុណ្ណោះ។
កាលពីខែឧសភាកន្លងទៅនេះ ក្រសួងពាណិជ្ជកម្ម និងឧស្សាហកម្មរបស់ឥណ្ឌា បានបង្ហើបថា ៩៩% នៃការនាំចេញរបស់ឥណ្ឌាទៅកាន់អង់គ្លេសនឹងមិនត្រូវបានយកពន្ធនៅក្រោមកិច្ចព្រមព្រៀងនេះ ដែលអនុវត្តចំពោះផលិតផល រួមមាន សម្លៀកបំពាក់ ស្បែកជើង និងអាហារជាដើម។ គួរឲ្យបញ្ជាក់ដែរថា ឥណ្ឌា និងចក្រភពអង់គ្លេស គឺជាប្រទេសដែលមានសេដ្ឋកិច្ចខ្ពស់ជាងគេទី៥ និងទី៦ រៀងគ្នា ជាមួយនឹងទំនាក់ទំនងពាណិជ្ជកម្មមានតម្លៃប្រហែល ៤១ ពាន់លានផោន (៥៥,៣ ពាន់លានដុល្លារ) រួមជាមួយនឹងការវិនិយោគដែលគាំទ្រការងារជាង ៦ សែនកន្លែងនៅទូទាំងប្រទេសទាំងពីរ៕
Account
Security
Favourite Content