សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ ក្រសួងសេដ្ឋកិច្ច និងហិរញ្ញវត្ថុ បានឱ្យដឹងថា ការបង្កើតប្រព័ន្ធចុះបញ្ជីពាណិជ្ជកម្មតាមប្រព័ន្ធអនឡាញ រហូតមកដល់ពេលនេះ បានរួមចំណែកកាត់បន្ថយនីតិវិធី ពេលវេលា និងការចំណាយក្នុងការចុះបញ្ជីពាណិជ្ជកម្ម និងផ្តល់ភាពងាយស្រួលក្នុងការរៀបចំអាជីវកម្មស្របច្បាប់របស់វិស័យឯកជននៅកម្ពុជា។
របាយការណ៍ផ្លូវការបានបង្ហាញថា ទំហំដើមទុនវិនិយោគសរុបសម្រាប់ក្រុមហ៊ុនដែលទទួលបានការចុះបញ្ជីតាមរយៈប្រព័ន្ធចុះបញ្ជីអាជីវកម្ម តាមថ្នាលបច្ចេកវិទ្យាព័ត៌មាន សម្រេចបានក្នុងទឹកប្រាក់ដើមទុនប្រមាណ ១០,២២ ពាន់លានដុល្លារ ខណៈក្រុមហ៊ុនអាជីវកម្មចុះបញ្ជីមានចំនួន ៣៥ ៨២៩ ដែលត្រូវបានគេស្គាល់ថា Single Portal-Phase 1 គិតត្រឹមថ្ងៃទី៥ ខែឧសភា។
របាយការណ៍បានបញ្ជាក់ថា វិស័យសំណង់ឈរនៅលើគេក្នុងបញ្ជីដែលមានចំនួន ១០,៨ ភាគរយនៃការវិនិយោគសរុប បន្ទាប់មកគឺវិស័យអចលនទ្រព្យមានចំនួន ១០,១៤ ភាគរយ សេវាស្នាក់នៅ ៩,៥ ភាគរយ សេវាប្រឹក្សា ៥,៧២ ភាគរយ វិស័យផលិតកម្ម ៥,៤៩ ភាគរយ និងវិស័យចម្រុះ ៥៨,២៦ ភាគរយ ហើយក្នុងនោះអាជីវកម្មចុះបញ្ជីដែលគ្រប់គ្រងដោយស្ត្រីតំណាងឱ្យ៣៨ ភាគរយនៃអាជីវកម្មសរុប។
អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានមានប្រសាសន៍ថា ការបង្កើតប្រព័ន្ធចុះបញ្ជីពាណិជ្ជកម្មតាមប្រព័ន្ធអនឡាញ ដែលបង្ហាញនូវកើនឡើងនៃការចុះបញ្ជីពាណិជ្ជកម្ម បានឆ្លុះបញ្ចាំងពីសកម្មភាពសេដ្ឋកិច្ចសង្គមគ្រប់ប្រភេទ និងការសាងទំនុកចិត្តអ្នកវិនិយោគក្នុងការធ្វើអាជីវកម្មនៅកម្ពុជា ក្រោមគោលនយោបាយរបស់រាជរដ្ឋាភិបាលប្រកបដោយប្រសិទ្ធភាព។
សូមជម្រាបថា ប្រព័ន្ធចុះបញ្ជីអាជីវកម្មតាមរយៈថ្នាលបច្ចេកវិទ្យាព័ត៌មាន ដំណាក់កាលទី១ (Single Portal-Phase 1) ត្រូវបានដាក់ឱ្យដំណើរការនៅថ្ងៃទី១៥ ខែមិថុនា ឆ្នាំ២០២០ រួមបញ្ចូលការចុះបញ្ជីពាណិជ្ជកម្មជាមួយក្រសួងពាណិជ្ជកម្ម ការចុះបញ្ជីពន្ធជាមួយអគ្គនាយកដ្ឋានពន្ធដារ និងការចេញវិញ្ញាបនបត្របើកសហគ្រាសនៅក្រសួងការងារ និងបណ្តុះបណ្តាលវិជ្ជាជីវៈ។
ដំណាក់កាលទី២ ត្រូវបានដាក់ឱ្យដំណើរការជាផ្លូវការនៅថ្ងៃទី១ ខែកញ្ញា ឆ្នាំ២០២១ និងដំណាក់កាលទី៣ នៅខែមិថុនា ឆ្នាំ២០២៣។
បច្ចុប្បន្ននេះ ប្រព័ន្ធចុះបញ្ជីលើអាជីវកម្មទាំង ៣ ដំណាក់កាល ត្រូវបានដាក់ឱ្យអនុវត្តលើថ្នាលផ្លាស់ប្តូរទិន្នន័យកម្ពុជា (ឬ ហៅកាត់ថា ថ្នាល CamDX)។ ថ្នាល CamDX នេះ គឺជាថ្នាលបច្ចេកវិទ្យាព័ត៌មានឈានមុខគេមួយនៅកម្ពុជា ដែលទើបទទួលបានជ័យលាភី “ការសម្របខ្លួនប្រើប្រាស់បច្ចេកវិទ្យាបើកចំហកូដ” ពីកម្មវីធីពានរង្វាន់អនាគតនៃរដ្ឋាភិបាលប្រចាំឆ្នាំ។
ប្រព័ន្ធចុះបញ្ជីអាជីវកម្ម តាមថ្នាលបច្ចេកវិទ្យាព័ត៌មាន គឺជាវិធានកែទម្រង់មុតស្រួចជាកញ្ចប់របស់រាជរដ្ឋាភិបាលកម្ពុជា ក្នុងគោលបំណងលើកស្ទួយភាពប្រកួតប្រជែង និងលើកកម្ពស់បរិយាកាសធុរកិច្ច និងវិនិយោគនៅកម្ពុជា៕
Account
Security
Favourite Content