សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ កំពង់ផែពហុបំណង និងមណ្ឌលភស្តុភារកម្មកំពង់ឆ្នាំង ដែលរាជរដ្ឋាភិបាលបានសម្រេចចេញអនុក្រឹត្យឱ្យបង្កើតជាផ្លូវការកាលពីចុងសប្ដាហ៍កន្លងទៅនេះ នឹងក្លាយជាទីតាំងចែកចាយកសិផល ក៏ដូចជាទំនិញរបស់កម្ពុជាទៅកាន់ទីផ្សារ ទាំងក្នុង និងក្រៅប្រទេស កាន់តែទូលាយ។
បើតាមអនុក្រឹត្យរបស់រាជរដ្ឋាភិបាល លេខ ៤១ អនក្រ.បក ចុះថ្ងៃទី១៣ ខែមីនា ឆ្នាំ២០២៦ បានឱ្យដឹងថា កំពង់ផែពហុបំណង និងមណ្ឌលភស្តុភារកម្មកំពង់ឆ្នាំង មានដែនទឹក និងដែនដីគោកសរុបជិត៦០ម៉ឺនម៉ែត្រការ៉េ មានសមត្ថភាពផ្ដល់សេវាកម្មសម្រាប់ទំនិញឆ្លងកាត់ប្រមាណ ២លានតោនក្នុងមួយឆ្នាំ ។
ឯកឧត្តម ផន រឹម អ្នកនាំពាក្យក្រសួងសាធារណការ និងដឹកជញ្ជូនបានថ្លែងប្រាប់បណ្ដាញសារព័ត៌មាន AMS ឱ្យដឹងថា តាមពិតទៅកំពង់ផែនេះមានយូរមកហើយ ដោយវាជាប្រភេទកំពង់ផែលើកដាក់ទំនិញ និងធ្វើប្រតិបត្តិការដោយក្រុមហ៊ុនរបស់អ្នកឧកញ៉ា ទ្រី ភាព ។ យោងតាមអនុក្រឹត្យរបស់រាជរដ្ឋាភិបាលកម្ពុជា ដែលបានអនុញ្ញាតឱ្យសាងសង់កាលពីពេលថ្មីៗនេះ គឺក្នុងគោលបំណងដើម្បីលើកកម្រិតគុណភាព ពីកំពង់ផែធម្មតា ទៅជាកំពង់ផែពហុបំណង ហើយកំពង់ផែនេះនឹងក្លាយទៅជាកំពង់ពហុបំណង និងមជ្ឈមណ្ឌលភស្តុភារកម្មនាពេលអនាគតឆាប់ៗនេះ ។
ឯកឧត្តមបន្តថា ៖
«កំពង់ផែនេះ នឹងក្លាយជាទីតាំង និងមជ្ឈមណ្ឌលដ៏សំខាន់ក្នុងការដឹកជញ្ជូនប្រេង រ៉ែ កសិផល និងកសិ-ឧស្សាហកម្ម ដែលបានផលិតនៅតំបន់ជុំវិញនោះទៅចែកចាយទាំងក្នុង និងក្រៅប្រទេស»។
លោកឧកញ៉ា ស៊ិន ចន្ធី អគ្គនាយកក្រុមហ៊ុន LINEX Logistics Cambodia Co., Ltd ក៏បានមានប្រសាសន៍ថា ការបង្កើតកំពង់ផែពហុបំណង និងមជ្ឈមណ្ឌលភស្តុភារកម្មនៅខេត្តកំពង់ឆ្នាំង នឹងធ្វើឱ្យការដឹកជញ្ជូនកសិផល កសិ-ឧស្សាហកម្ម និងទំនិញដែលផលិតនៅតំបន់ជុំវិញនោះកាន់តែមានភាពងាយស្រួល និងត្រូវចំណាយថ្លៃដើមកាន់តែទាបជាងមុន ។
ឧកញ៉ាបន្តថា ៖
«ខេត្តកំពង់ឆ្នាំ និងខេត្តជុំវិញបឹងទន្លេសាប ជាខេត្តដែលមានសក្ដានុពលមួយក្នុងវិស័យកសិកម្ម និងការកែច្នៃផលិតផលកសិកម្ម ហើយការបង្កើតកំពង់ផែ និងមជ្ឈមណ្ឌលភស្តុភារកម្មនេះ នឹងជួយសម្រួលដល់ការដឹកជញ្ជូនទំនិញ ក៏ដូចជាផលិតផលដែលកែច្នៃរួចទៅកាន់ទីផ្សារទាំង និងក្រៅប្រទេស»។
សូមបញ្ជាក់ថា គម្រោងព្រែកជីកហ្វូណនតេជោដែលកំពុងដំណើរការនីតិវិធីក្នុងការសាងសង់ក៏ជាផ្នែកមួយនៃការតភ្ជាប់ទៅកាន់កំពង់ផែពហុបំណង ខេត្តកំពង់ឆ្នាំងនេះដែរ ហើយតាមរយៈនេះ នឹងអាចតភ្ជាប់ការដឹកជញ្ជូនផ្លូវទឹកសាបទៅកាន់សមុទ្រកម្ពុជា ហើយបន្តដឹកចេញទៅកាន់កំពង់ផែនានាក្នុងតំបន់ និងលើពិភពលោក ។
ឯកឧត្តម សាយ សំអាល់ ឧបនាយករដ្ឋមន្ត្រី និងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ធ្លាប់បានលើកឡើងពីការសាងសង់កំពង់ផែតាមបណ្ដាខេត្តជាប់ទន្លេសាប និងទន្លេមេគង្គ ដើម្បីងាយស្រួលដល់ការដឹកជញ្ជូនកសិកផលរបស់កសិករទៅកាន់ទីផ្សារ ដោយចំណាយថ្លៃដើមទាបជាងមុន ។ គម្រោងនេះ នឹងត្រូវចូលរួមសហការជាមួយក្រសួងធនធានទឹក និងឧត្តុនិយម និងក្រសួងទេសចរណ៍ ។ ដោយឡែក ការរៀបចំបង្កើតកំពង់ផែតាមដងទន្លេនេះ ក៏អាចទាក់ទាញទេសចរ វិនិយោគិន និងអាចបង្កើនចំណូលដល់ពលរដ្ឋនៅតាមដងទន្លេ ហើយនៅពេលពលរដ្ឋមានប្រាក់ចំណូលនឹងធ្វើឱ្យសេដ្ឋកិច្ចជាតិទាំងមូលមានភាពកាន់តែប្រសើរឡើងដែរ ៕
Account
Security
Favourite Content