សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្រុមហ៊ុនចិនមួយបានអះអាងថា ខ្លួនមានគម្រោងមកវិនិយោគលើវិស័យទឹកស្អាតនៅកម្ពុជាដោយការចំណាយទុនខ្ទង់១០០លានដុល្លារអាម៉េរិក។ គម្រោងនេះនឹងជួយពង្រីកវិស័យទឹកស្អាតនៅកម្ពុជា ជាពិសេសនៅក្នុងតំបន់ដែលមិនទាន់មានសេវាគ្របដណ្តប់ទៅដល់។
លោកបណ្ឌិត ឆាយ យុនឡុង ( Cai Yunlong ) នាយកប្រតិបត្តិ និងជាតំណាងក្រុមហ៊ុន Hainan Litree Purifying Technology Co., Ltd. ក្នុងជំនួបជាមួយឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ កាលពីថ្ងៃចុងសប្តាហ៍កន្លងទៅនេះបានមានប្រសាសន៍ឱ្យដឹងថា ក្រុមហ៊ុនរបស់លោកចង់វិនិយោគក្នុងវិស័យទឹកស្អាតនៅកម្ពុជា ដោយនឹងចំណាយទុនប្រមាណ១០០លានដុល្លារ។
លោកនាយកប្រតិបត្តិ បានជម្រាបថា ៖ ក្រុមហ៊ុន Hainan Litree Purifying Technology បង្កើតឡើងក្នុងឆ្នាំ១៩៩២ និងបានកសាងកេរ្តិ៍ឈ្មោះខាងបច្ចេកវិទ្យាUF Membrane ដោយសារក្រុមហ៊ុនបានបង្កើតលទ្ធផលជោគជ័យជាសកល និងមានភ្នាក់ងារផ្តល់បច្ចេកវិទ្យានេះនៅក្នុងប្រទេសជាច្រើន។ ឧបករណ៍ចម្រោះទឹកម៉ាក Litree របស់ក្រុមហ៊ុន ត្រូវបានទទួលស្គាល់យ៉ាងទូលំទូលាយចំពោះប្រសិទ្ធភាពក្នុងការផ្គត់ផ្គង់ទឹកសម្រាប់តំបន់ប្រជុំជនសម្រាប់តម្រូវការ ឧស្សាហកម្ម និងបច្ចេកវិទ្យាចម្រោះទឹកសម្រាប់ប្រើប្រាស់ក្នុងគ្រួសារដែលបាន និងកំពុងផ្តល់អត្ថប្រយោជន៍ដល់មនុស្សជាង៣លានគ្រួសារនៅទូទាំងពិភពលោក។
នៅក្នុងប្រទេសកម្ពុជាបច្ចុប្បន្ន ផលិតផលដែលប្រើបច្ចេកវិទ្យា UF membrane របស់ក្រុមហ៊ុន ត្រូវបានប្រើប្រាស់នៅក្នុងខេត្ត-ក្រុងជាច្រើន ដោយបានរួមចំណែកដល់ការពង្រឹងស្តង់ដារទឹកស្អាតក្នុងបរិមាណ ១១ ០០០ម៉ែត្រគូប/ថ្ងៃ។
ឯកឧត្តម ហែម វណ្ណឌី បានស្វាគមចំពោះគម្រោងរបស់ក្រុមហ៊ុនក្នុងការពង្រីកការវិនិយោគក្នុងវិស័យទឹកស្អាតនៅកម្ពុជា ជាពិសេសនៅក្នុងតំបន់ដែលមិនទាន់មានសេវាគ្របដណ្តប់។ ដោយសង្កត់ធ្ងន់លើសារៈសំខាន់នៃការចាប់យកបច្ចេកវិទ្យា ទាំងនៅក្នុងវិស័យសាធារណៈ និងឯកជន ឯកឧត្តម រដ្ឋមន្ត្រី បានលើកទឹកចិត្តឱ្យក្រុមហ៊ុនសិក្សាលទ្ធភាពវិនិយោគនេះ និងស្វែងរកឱកាសបន្ថែមក្នុងការលក់ទឹកដុំសម្រាប់ប្រតិបត្តិករទឹកឯកជន ដោយប្រើប្រាស់ឧត្តមភាពបច្ចេកវិទ្យា និងបទពិសោធន៍ជោគជ័យរបស់ខ្លួនកន្លងមក។
តាមរយៈជំនួបនេះ ក្រុមហ៊ុនបានបញ្ជាក់ពីការប្តេជ្ញាចិត្ត និងការរួមចំណែករបស់ខ្លួនក្នុងការដោះស្រាយបញ្ហាផ្គត់ផ្គង់ទឹកស្អាត និងថែរក្សាធនធានទឹក តាមរយៈការប្រើប្រាស់បច្ចេកវិទ្យា membraine ប្រកបដោយនវានុវត្តន៍ ដំណោះស្រាយធុងចម្រោះទឹក និងសេវាសុវត្ថិភាពទឹកសាធារណៈ ស្របតាមគោលដៅអភិវឌ្ឍប្រកបដោយចីរភាព និងការគ្រប់គ្រងបរិស្ថានរបស់កម្ពុជា៕
Account
Security
Favourite Content