ភ្នំពេញ ៖ ព្រះរាជាណាចក្រកម្ពុជា នាព្រឹកថ្ងៃទី២៧ ខែមីនា ឆ្នាំ២០២៤ បានធ្វើជាម្ចាស់ផ្ទះរៀបចំវេទិកា Maekyung កម្ពុជា ក្រោមមូលបទ “ព្រះរាជាណាចក្រពោរពេញដោយកាលានុវត្តភាព កិច្ចសហប្រតិបត្តិការជាយុទ្ធសាស្រ្តដើម្បីរុញច្រានកំណើនសម្រាប់អនាគត” ដែលសហការរៀបចំឡើងដោយក្រុមហ៊ុន Maekyung Media Group, ទីភ្នាក់ងារជំរុញពាណិជ្ជកម្ម-វិនិយោគកូរ៉េ (KOTRA), និងក្រុមប្រឹក្សាអភិវឌ្ឍន៍កម្ពុជា(CDC)។

វេទិកានេះ មានគោលបំណងចែករំលែកព័ត៌មានអំពីច្បាប់ និងលិខិតបទដ្ឋានគតិយុត្តថ្មីៗ ព្រមទាំងសក្ដានុពល និងកាលានុវត្តភាពវិនិយោគ និងធុរកិច្ចនៅកម្ពុជា ជាពិសេសការស្វែងរកកិច្ចសហការ និងភាពជាដៃគូរវាងវិស័យឯកជនកម្ពុជា-កូរ៉េ។ កម្មវិធីដ៏អធិក​អធមនេះមានការអញ្ជើញចូលរួមពីវិស័យឯកជនសរុបប្រមាណ២៦០រូប។ 

ក្នុងសុន្ទរកថាគន្លឹះ ឯកឧត្តម ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា បានមានប្រសាសន៍ថា៖

«វេទិកា Maekyung កម្ពុជា បានសបញ្ជាក់ឱ្យឃើញអំពីឆន្ទៈក្នុងការជំរុញកំណើនវិនិយោគ,ពាណិជ្ជ​កម្ម, និងធុរកិច្ចទ្វេទិសឱ្យកាន់តែរីកធំធាត់បន្ថែមមួយកម្រិតទៀត»។

ជាមួយគ្នានេះ ឯកឧត្តមក៏បានគូសរំលេចអំពីភាពធន់នៃសេដ្ឋកិច្ចកម្ពុជាតាមរយៈកំណើនសេដ្ឋកិច្ចក្នុងអត្រាប្រមាណ ៥,៦% ក្នុងឆ្នាំ២០២៣  និងរំពឹងថានឹងកើនឡើងក្នុងរង្វង់ ៦,៦% ក្នុងឆ្នាំ២០២៤ ដែលអត្រាកំណើនខ្ពស់នេះនឹងជួយឱ្យកម្ពុជារក្សាបាននូវជំហរដ៏រឹងមាំរបស់ខ្លួនលើគន្លងនៃការឈានទៅសម្រេចបាននូវឋានៈជាប្រទេសមានចំណូលមធ្យមកម្រិតខ្ពស់នៅត្រឹមឆ្នាំ២០៣០ និងចំណូលខ្ពស់នៅឆ្នាំ២០៥០។​ បន្ថែមពីនេះ ​ឯកឧត្តមក៏បានរំលេចអំពីការប្តេជ្ញាចិត្តរបស់រាជរដ្ឋាភិបាលកម្ពុជាក្រោមមគ្គទេសក៍ដឹកនាំប្រកបដោយគតិបណ្ឌិតរបស់សម្តេចធិបតីនាយករដ្ឋមន្ត្រី ក្នុងការបន្តផ្តល់មូលដ្ឋានគ្រឹះដ៏សំខាន់សម្រាប់ការវិនិយោគ គឺសុខសន្តិភាព, ស្ថិរភាពសេដ្ឋកិច្ច និងនយោបាយ, ព្រមទាំងការបន្តខិតខំប្រឹងប្រែងកែលម្អបរិយាកាសធុរកិច្ច និងវិនិយោគ  តាមរយៈការដាក់ចេញនូវកម្រងច្បាប់, គោលនយោបាយ, និងយុទ្ធសាស្ត្រគ្រប់ជ្រុងជ្រោយ ព្រមទាំងវិធានការគន្លឹះមុតស្រួចលើគ្រប់វិស័យ ដើម្បីធានាថាវិនិយោគិនអាចមកវិនិយោគប្រកបដោយសេចក្តីទុកចិត្ត។

គួរបញ្ជាក់ជូនផងដែរថា ប្រធានបទចំនួន ៣ ដែលបានជ្រើសរើសមកធ្វើបទឧទ្ទេសនាមជូនអង្គវេទិការួមមាន៖ទី១៖ បរិយាកាសវិនិយោគនៅកម្ពុជាដោយ ឯកឧត្តម សួន សុផល អគ្គលេខាធិការរងគណៈ​កម្មាធិការ​វិនិយោគកម្ពុជា និង ឯកឧត្តម Allen Tan ទីប្រឹក្សាអមក្រុមប្រឹក្សាអភិវឌ្ឍន៍កម្ពុជា។ទី២៖ ករណីសិក្សាស្តីពីភាពជោគជ័យនៃសហគ្រាសកូរ៉េនៅកម្ពុជា ដោយ ឯកឧត្តមបណ្ឌិត កាន ច័ន្ទមេត្តា រដ្ឋលេខាធិការក្រសួងឧស្សាហកម្ម, វិទ្យាសាស្ត្រ, បច្ចេកវិទ្យា, និងនវានុវត្តន៍និងទី៣៖ យុទ្ធសាស្ត្រនៃកិច្ចសហប្រតិ​បត្តិការសេដ្ឋកិច្ចកូរ៉េ-កម្ពុជា ដោយ ឯកឧត្តម ស៊ីម សុខេង រដ្ឋលេខាធិការក្រសួងពាណិជ្ជកម្ម, ឯកឧត្តម ឡឹក សុធា អនុរដ្ឋលេខា​ធិការក្រសួងកសិកម្ម រុក្ខាប្រមាញ់ និងនេសាទ, ឧកញ៉ា ភូ សេតុង នាយកប្រតិបត្តិ Anco Group, និង លោក Lee Sangyeop នាយកប្រតិបត្តិក្រុមហ៊ុន Barun (Cambodia) Accounting & Consulting Co., Ltd.៕