កិច្ចពិភាក្សាមួយស្ដីអំពី «រៀបចំអនាគត ផ្ដើមចេញពីការរៀបចំហិរញ្ញវត្ថុ» បានក្លាយជាប្រធានបទយ៉ាងសំខាន់ក្រោមការបកស្រាយពីសំណាក់វាគ្មិនដែលមានជំនាញផ្នែកគ្រប់គ្រងហិរញ្ញវត្ថុជាច្រើននាក់ ជាមួយនឹងការចោទសួរជាសំណួររបស់បណ្តាសិស្ស-និស្សិតដែលបានចូលរួមសរុបជាង២០០នាក់យ៉ាងផុសផុល។ វេទិកានៃកិច្ចពិភាក្សានេះត្រូវបានរៀបចំឡើងដោយកម្មវិធី «វិថីហិរញ្ញវត្ថុ រដូវកាលទី២» កាលពីថ្ងៃទី២៨ ខែសីហា ឆ្នាំ២០២៤ កន្លងទៅ នៅមជ្ឈមណ្ឌលសហប្រតិបត្តិការ កម្ពុជា-ជប៉ុន (CJCC) ។

តាមរយៈវេទិកានេះ វាគ្មិនចំនួន ៤ រូប បានចែករំលែកបទពិសោធន៍នៅក្នុងការគ្រប់គ្រងហិរញ្ញវត្ថុ ជាពិសេសផ្ដល់នូវគន្លឹះសំខាន់ៗសម្រាប់យុវជនក្នុងការចាត់ចែងសាច់ប្រាក់ បើទោះបីជាពួកគេកំពុងស្ថិតក្នុងវ័យមួយដែលមិនទាន់មានប្រាក់ចំណូលទៀងទាត់ក៏ដោយ។

អ្នកស្រី នុត ក្លារ៉ា នាយិកាប្រតិបត្តិក្រុមហ៊ុនអប្សរា មេឌាសឺវីស ​និងជាវាគ្មិនមួយរូបក្នុង​ចំណោម​វាគ្មិនទាំង៤ បានមានប្រសាសន៍ថា ការចេះចាត់ចែងលុយកាក់គឺពិតជារឿងមួយដ៏សំខាន់។ មនុស្សភាគច្រើនចេះរកលុយ ប៉ុន្តែមិនចេះចាយលុយឱ្យត្រឹមត្រូវ ម្លោះហើយទើបជារឿយៗពួកគេ​តែង​ជួបបញ្ហាហិរញ្ញវត្ថុ។

អ្នកស្រីបន្តចែករំលែកថា ៖

«ការចេះរៀបចំផែនការហិរញ្ញវត្ថុត្រឹមត្រូវ ជាទុនមួយដែលរុញបុគ្គលម្នាក់ឱ្យមានភាពឯករាជ្យក្នុងការរស់នៅ ព្រោះបើបុគ្គលមិនចេះចាត់ចែងលុយកាក់បន្តិចបន្តួចដែលខ្លួនរកបាននោះទេ តទៅទោះជាមានប្រាក់ខែច្រើនក៏នៅតែមិនសល់ដែរ»។

ទន្ទឹមគ្នានេះ លោក ឡាំង មាំ នាយកនៃនាយកដ្ឋានឌីជីថលរបស់ធនាគារ មេយ៍ប៊ែង ព្រមទាំងជា​វាគ្មិនក្នុងវេទិកាខាងលើនេះដែរបានឱ្យដឹងថា មិនមានវិធីសាស្ត្រជាក់លាក់ណាមួយសម្រាប់ការ​ទុកដាក់លុយកាក់ដែលត្រឹមត្រូវនោះទេ រឿងនេះគឺវាអាស្រ័យទៅតាមស្ថានភាពជាក់ស្ដែងរបស់​បុគ្គល​ម្នាក់ៗ។

ប៉ុន្តែមិនថាទោះជាស្ថិតក្នុងស្ថានភាពណាក៏ដោយ វិន័យនៅតែដើរតួនាទីសំខាន់ក្នុងការជួយឱ្យមនុស្សម្នាក់ មានលទ្ធភាពគ្រប់គ្រងហិរញ្ញវត្ថុរបស់ខ្លួនឱ្យមានប្រសិទ្ធភាព។

បន្ថែមពីលើនេះ វាគ្មិនមួយរូបទៀត គឺលោក កុក ថា ដែលជាអគ្គនាយកគ្រឹះស្ថានហិរញ្ញវត្ថុ អេហ្វអេចអេហ្វ ខេបភីថល បានមានប្រសាសន៍ថា ផែនការហិរញ្ញវត្ថុគឺមានច្រើន រួមមានដូចជាការសន្សំសម្រាប់គោលដៅអនាគត ការចាត់ចែងចំណូលចំណាយប្រចាំថ្ងៃ ការសន្សំសម្រាប់ចូលនិវត្ត និងការបែងចែកប្រាក់សម្រាប់ទិញកញ្ចប់សេវាធានារ៉ាប់រងសុខភាពជាដើម។

ទាំងអស់នេះគឺជាអ្វីដែលយុវជនគ្រប់វ័យគួរតែចាប់ផ្ដើមគិតគូរ ដើម្បីកសាងអនាគតមួយដែលមាន​គោលដៅច្បាស់លាស់ និងមិនមែនជាបន្ទុកដល់សមាជិកគ្រួសារ។

លោកបន្តចែករំលែកគន្លឹះគ្រប់គ្រងហិរញ្ញវត្ថុដែរថា ៖ «វិធីសាស្ត្រល្អមួយសម្រាប់ការគ្រប់គ្រងលុយ​កាក់គឺ ខ្ញុំលើកទឹកចិត្តឱ្យមានគណនីធនាគាយ៉ាងហោចណាស់ ៣ខុសៗគ្នា ដោយគណនីមួយសម្រាប់ទុកដាក់នូវចំណាយចាំបាច់ មួយសម្រាប់ដាក់ប្រាក់សន្សំ និងមួយទៀតគឺគណនីសម្រាប់ការកម្សាន្ដ​»។

ជាមួយគ្នានេះដែរ លោក និន ភុស្តភា ដែលជាមេធាវីនៅក្រុមហ៊ុនមេធាវីតម្រាច្បាប់ក៏បានចែករំលែក ពីបទពិសោធន៍គ្រប់គ្រងលុយកាក់របស់ខ្លួនកាលនៅសិក្សាផងដែរ។ លោកថា ដោយសារខ្លួនជាអ្នកមកពីគ្រួសារមិនសូវមានលទ្ធភាព លោក មិនមានប្រាក់គ្រប់គ្រាន់សម្រាប់ការសន្សំនោះទេ ប៉ុន្តែលោក​បាន​កាត់ប្រាក់មួយផ្នែកទៅវិនិយោគលើការអប់រំរបស់ខ្លួន។

សម្រាប់រូបលោកផ្ទាល់ ការណ៍នេះពិតជាបានជំរុញឱ្យលោកមកដល់ចំណុចដែលលោកកំពុងឈរបច្ចុប្បន្ន នោះគឺចំណុចដែលមានការងារធ្វើ និងមានប្រាក់ចំណូលសមរម្យ។

គួរបញ្ជាក់ថា វេទិកាកិច្ចពិភាក្សាខាងលើ គឺជាផ្នែកមួយរបស់កម្មវិធី «វិថីហិរញ្ញវត្ថុ រដូវកាលទី២» ដែលជានិមិត្តរូប​នៃកិច្ចសហប្រតិបត្តិការរវាងស្ថាប័នលេចធ្លោក្នុងវិស័យហិរញ្ញវត្ថុរបស់កម្ពុជា រួមមាន សមាគមធនាគារ​នៅកម្ពុជា (ABC), សមាគមមីក្រូហិរញ្ញវត្ថុកម្ពុជា(CMA), ក្រុមហ៊ុនការិយាល័យឥណទានកម្ពុជា (CBC), និងបណ្តាញផ្សព្វផ្សាយអប្សរា (AMS) ដោយមានការទទួលស្គាល់ពីធនាគារជាតិនៃកម្ពុជា (NBC)៕