សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ អគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំប្រាប់ឱ្យប្រជាពលរដ្ឋបង្កើនការប្រុងប្រយ័ត្នចំពោះការវាយប្រហារដោយការបន្លំប្រើសារ SMS ជាអក្សរទៅទូរស័ព្ទដៃ ( Smishing ) ដែលអាចនាំឱ្យមានការលួចអត្តសញ្ញាណបុគ្គល បាត់បង់គណនីបណ្តាញសង្គម ការក្លែងបន្លំផ្នែកហិរញ្ញវត្ថុ ឬចម្លងមេរោគនៅលើឧបករណ៍ឌីជីថលរបស់ជនរងគ្រោះ។
ក្រុមការងារបច្ចេកទេសនៃនាយកដ្ឋានការពារសុវត្ថិភាពបច្ចេកវិទ្យាឌីជីថល នៃអគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ បានបញ្ជាក់ថា ថ្មីៗនេះបានទទួលសេចក្តីរាយការណ៍ និងមានការចែករំលែកតាមបណ្តាញសង្គម ដោយក្រុមជនខិលខូចផ្ញើសារ SMS មកទូរស័ព្ទដៃរបស់ជនរងគ្រោះដែលមាននូវតំណភ្ជាប់ក្លែងក្លាយក្នុងគោលបំណងលួចយកព័ត៌មានផ្ទាល់ខ្លួន លេខសម្ងាត់គណនីបណ្តាញសង្គម និងបង្កប់មេរោគបច្ចេកវិទ្យាជាដើម ។
“Smishing” គឺជាការរួមបញ្ចូលគ្នានៃ “SMS” និង “Phishing” សំដៅទៅលើការវាយប្រហារដោយបន្លំប្រើសារ SMS (សារជាអក្សរ) ដែលបានរចនាឡើងមានឈ្មោះ (sender) ជាស្ថាប័នស្របច្បាប់អាចទុកចិត្តបាន ឬសេវាកម្មពេញនិយមជាដើម ដើម្បីបញ្ឆោតជនរងគ្រោះឱ្យផ្តល់ព័ត៌មានផ្ទាល់ខ្លួនតាមរយៈតំណភ្ជាប់ក្លែងក្លាយ ។
ចំណាំ ៖ ដំណើរការនៃការវាយប្រហាររបស់ Smishing ៖
– សារជាអក្សរ SMS បន្ទាន់ និងទាក់ទាញ ៖ សារជាអក្សរធម្មតា តែរួមបញ្ចូលនូវខ្លឹមសារបន្ទាន់ ឬទាក់ទាញ ដូចជា គណនីរបស់លោកអ្នកនឹងត្រូវបិទ ឬហាមឃាត់ក្នុងរយៈពេលដ៏ខ្លី។
– មានតំណភ្ជាប់ក្លែងក្លាយ ៖ បើសិនលោកអ្នកចុចលើតំណភ្ជាប់ក្លែងក្លាយនោះ នឹងបញ្ជូនទៅគេហទំព័រក្លែងក្លាយដែលបានរចនាឡើងស្ទើរតែដូចនឹងគេហទំព័រពិតប្រាកដ ដើម្បីប្រមូលយកព័ត៌មានសម្ងាត់ ឬព័ត៌មានផ្ទាល់ខ្លួនរបស់ជនរងគ្រោះជាដើម។
– ជាលទ្ធផលជនរងគ្រោះដែលបានបញ្ចូលព័ត៌មានសម្ងាត់ទាំងនោះនឹងត្រូវបានវាយប្រហារភ្លាមៗដែលអាចនាំឱ្យមានការលួចអត្តសញ្ញាណបុគ្គល បាត់បង់គណនីបណ្តាញសង្គម ការក្លែងបន្លំផ្នែកហិរញ្ញវត្ថុ ឬចម្លងមេរោគនៅលើឧបករណ៍ឌីជីថលរបស់ជនរងគ្រោះ។
ដូច្នេះ ដើម្បីការពារខ្លួនពីការវាយប្រហាររបស់ Smishing ត្រូវអនុវត្តជំហានដូចជា ៖ ទី១, កុំចុចតំណភ្ជាប់ក្នុងសារ SMS ដែលលោកអ្នកមិនបានស្នើសុំ ជាពិសេសប្រសិនខ្លឹមសារមើលទៅហាក់ដូចជាបន្ទាន់, ទី២, ផ្ទៀងផ្ទាត់អត្តសញ្ញាណអ្នកផ្ញើ ដោយទាក់ទងក្រុមហ៊ុន ឬស្ថាប័នដោយផ្ទាល់, ទី៣- កុំចែករំលែកព័ត៌មានផ្ទាល់ខ្លួនតាមរយៈសារ SMS, ទី៤- បើកមុខងារសុវត្ថិភាព 2FA បន្ថែមក្នុងគណនីបណ្តាញសង្គមដើម្បីទប់ស្កាត់ការវាយប្រហារ, ទី៥- ធ្វើសេចក្តីរាយការណ៍មកសមត្ថកិច្ចជំនាញក្នុងករណីលោកអ្នករងការវាយប្រហារដើម្បីជួយរកដំណោះស្រាយ៕
Account
Security
Favourite Content