សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
កាលពីថ្ងៃចុងសប្ដាហ៍កន្លងទៅថ្មីៗនេះ ឯកឧត្តមរដ្ឋមន្ត្រីក្រសួងកសិកម្មបានចូលរួមក្នុងកម្មវិធីបើកសម្ពោធពិព័រណ៍រូបថត «សត្វផ្សោតទន្លេមេគង្គកម្ពុជា» នៅវិទ្យាស្ថានភាសាបារាំង។ កម្មវិធីពិព័រណ៍ រូបថតនេះដែរត្រូវបានរៀបចំដោយអង្គការ WWF ហើយនឹងធ្វើឡើងក្នុងរយៈពេលពេញមួយខែ។
ការដាក់តាំងបង្ហាញនូវរូបភាពសត្វផ្សោតទន្លេមេគង្គរបស់កម្ពុជានាពេលនេះ គឺជាសកម្មភាពមួយទៀតក្នុងការកៀរគរឱ្យមានការចូលរួមពីប្រជាជនកម្ពុជាគ្រប់ស្រទាប់ តាមរយៈការបញ្ជ្រាបចំណេះដឹងអំពីជីវិតរបស់សត្វផ្សោត ជាពិសេសការគំរាមគំហែងដែលសត្វផ្សោតកំពុងតែប្រឈម។
ក្នុងឱកាសដដែលនេះ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានមានប្រសាសន៍ថា កន្លងមកក្រុមការងាររបស់ក្រសួងកសិកម្ម សហការជាមួយអង្គការពាក់ព័ន្ធបានខិតខំប្រឹងប្រែងក្នុងការយាមល្បាតក្នុងតំបន់អភិរក្ស សត្វផ្សោត សំដៅការពារ និងទប់ស្កាត់នូវបទល្មើសដាក់មងនេសាទ។
ជាលទ្ធផល ក្នុងឆ្នាំ២០២៣នេះ ផ្សោតត្រឹមតែ៤ក្បាលប៉ុណ្ណោះដែលបានបាត់បង់ជីវិត ដោយពីរក្បាលបានស្លាប់ក្នុងដែនអភិរក្ស និងពីរក្បាលទៀតបានស្លាប់នៅក្រៅដែនអភិរក្ស។ ចំនួននេះ មានភាពល្អប្រសើរច្រើនបើធៀបទៅនឹងឆ្នាំ២០២២ ដែលកម្ពុជាបានបាត់បង់សត្វផ្សោតរហូតដល់ ១១ក្បាល។
ឯកឧត្តមបន្តមានប្រសាសន៍ថា អ្វីដែលក្រសួងកំពុងខិតខំនាពេលនេះគឺរារាំងការដាក់មងក្រឡាធំ ព្រោះមងប្រភេទនេះនឹងអាចជាប់សត្វផ្សោតដែលហែលរកចំណីក្នុងអន្លង់ព្រែកកាំពី។
ឯកឧត្តមបានថ្លែងថា៖
«ប្រជានេសាទពេលខ្លះមិនមែនគាត់ចង់បានផ្សោតទេ ពេលបានផ្សោតគាត់មានតែភ័យខ្លួនវិញទេ ប៉ុន្តែការណ៍ដែលគាត់ប្រើមងក្រឡាធំនេះ គឺដើម្បីចាប់ត្រីធំប៉ុណ្ណោះ»។
ឯកឧត្តមបន្តថា៖
«ប៉ុន្តែយើងសុំចិត្ត ទោះចង់ ឬមិនចង់បានផ្សោតក្ដី ប្រជាជនត្រូវតែគោរពច្បាប់ជាដាច់ខាត គឺច្បាប់ដែលមិនអនុញ្ញាតឱ្យមានការដាក់មងនៅក្នុងតំបន់អភិរក្សសត្វផ្សោតរបស់យើង។»
គួរឱ្យដឹងថា សត្វផ្សោតមិនមែនជាប្រភេទត្រីនោះទេ វាជាប្រភេទថនិកសត្វថ្នាក់ខ្ពស់ដែលចិញ្ចឹមកូនដោយទឹកដោះ និងជាសត្វដែលគេប្រើសម្រាប់វាស់គុណភាពទឹក។ វាស់គុណភាពទឹកព្រោះថា តំបន់ដែលសត្វផ្សោតនៅបាន លុះត្រាតែជាតំបន់ដែលទឹកមានចរន្ដល្អ មានចំណី និងមិនមានការបំពុលជាដើម។
រីឯមូលហេតុភាគច្រើន ដែលនាំឱ្យផ្សោតបាត់បង់ជីវិតរួមមាន ការវង្វេងអន្លង់ ការជាប់មង ការអត់ចំណី និងមួយភាគទៀតចេញពីភាពជរារបស់វា។ ផ្សោតអាចមានអាយុដល់ ២៧ ទៅ ៣០ឆ្នាំ និងអាចបង្កើតកូនបានម្ដងត្រឹមតែមួយប៉ុណ្ណោះ។ ដោយផ្សោតមិនមែនជាត្រី វាមិនមានស្រកាសម្រាប់ដកដង្ហើមក្នុងទឹកនោះទេ ពោលគឺសត្វផ្សោតត្រូវ ស្រូបខ្យល់ចូលក្នុងសួតដូចជាមនុស្សដែរ។ ម្លោះហើយបានជាផ្សោតចូលចិត្តហែលបណ្ដែតខ្លួនលើ ផ្ទៃទឹក នឹងជារឿយៗ វាលោតចេញពីផ្ទៃទឹកដើម្បីដកដង្ហើមនោះឯង៕
Account
Security
Favourite Content