សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ជាយុទ្ធសាស្ត្រដើម្បីអាចរក្សាស្ថិរភាពតម្លៃស្រូវរបស់ប្រជាកសិករឱ្យមាននិរន្តរភាព ក្រសួងកសិកម្ម រុក្ខាប្រមាញ់ និងនេសាទ សហការជាមួយសហព័ន្ធស្រូវអង្ករកម្ពុជា បានជំរុញឱ្យមានការធ្វើកិច្ចសន្យាកសិកម្មឱ្យបានកាន់តែច្រើន ហើយកិច្ចសហការរវាងកសិករ – ម្ចាស់រោងម៉ាស៊ីនកិនស្រូវ និងជាឈ្មួញទិញស្រូវនេះ ធ្វើឡើងឆ្លើយតបនឹងផែនការរបស់រោងម៉ាស៊ីនកិនស្រូវ ដែលត្រូវការស្រូវគុណភាពស្របតាមទីផ្សារផងដែរ ។
រដ្ឋលេខាធិការក្រសួងកសិកម្ម ឯកឧត្តម យ៉ង សាំងកុមារ បានលើកឡើងថា ក្រសួងកំពុងជំរុញការពង្រឹង និងពង្រីកសហគមន៍កសិកម្មដើម្បីដោះស្រាយបញ្ហាទីផ្សារ ទុន ជី ពូជ បច្ចេកទេសកាត់ច្រូត និងសម្ងួតស្រូវជូនកសិករគ្រប់រូប ជាពិសេសការធ្វើកិច្ចសន្យាកសិកម្ម ដើម្បីរក្សាស្ថិរភាពនៃតម្លៃជូនកសិករ។
ឯកឧត្តមបណ្ឌិតបានមានប្រសាសន៍ថា ៖
“ពាក់ព័ន្ធនឹងវិស័យស្រូវអង្ករលើផែនការផលិត និងកិច្ចសន្យាកសិកម្មនេះ នៅខេត្តបាត់ដំបងមានរោងម៉ាស៊ីនចំនួន៧ បានត្រៀមសហការជាមួយសហគមន៍កសិករលើកិច្ចសន្យាជាមួយបរិមាណស្រូវ ២១០០០ តោន។ ជាមួយនឹងការសម្របសម្រួលឱ្យកសិកររាប់ពាន់ ឬរាប់ម៉ឺន និងឈានទៅដល់រាប់សែននាក់ឱ្យសហការគ្នាដោយឈរលើគោលការណ៍ និងស្តង់ដាររួម ដើម្បីផ្សាភ្ជាប់មកទីផ្សារជាការងារលំបាក ប៉ុន្តែវាសំខាន់សម្រាប់កសិករខ្នាតតូច និងវិស័យកសិកម្មនៅកម្ពុជា”
ឯកឧត្តមបណ្ឌិត យ៉ង សាំងកុមារ បានគូសបញ្ជាក់ថា ការងារសំខាន់ គឺការរៀបចំ និងគាំទ្រដល់សហគមន៍កសិកម្ម ដើម្បីរៀបចំផែនការឱ្យឆ្លើយតបនឹងផែនការកិច្ចសន្យាកសិកម្មនេះ ហើយក្រៅពីនេះត្រូវរួមគ្នាធ្វើការកសាងសហគមន៍កសិកម្ម និងកិច្ចសន្យាកសិកម្មឱ្យបានល្អប្រសើរ។
តបទៅនឹងគោលបំណងខាងលើនេះ តំណាងសហព័ន្ធស្រូវអង្ករកម្ពុជា លោក លន់ យ៉េង បានលើកឡើងថា ចំពោះការងារកិច្ចសន្យាកសិកម្មនេះ គឺជាការងាររួមរវាងក្រសួងកសិកម្ម និងសហព័ន្ធស្រូវអង្ករ ដើម្បីជំរុញ និងធានាបន្ថែមជួយធានាបន្ថែម ជាពិសេសជួយដល់កសិករដែល ក្នុងការផ្តល់ព័ត៌មានច្បាស់លាស់ទាក់ទងនឹងព័ត៌មានទីផ្សារ និងតម្លៃស្រូវជាដើម ។
លោកបានបន្ថែមថា កិច្ចសហការគ្នា គឺជាកំលាំងចលករ ក្នុងការជំរុញបន្ថែមទៀតទៅលើការងារដែលបានអនុវត្តនាពេលកន្លងមកទាក់ទងនឹងការធ្វើកិច្ចសន្យាកសិកម្ម ជាពិសេសដើម្បីឆ្លើយតបទៅនឹងតម្រូវការរបស់អ្នកនាំចេញ ទាំងបញ្ហាពូជស្រូវ និងបរិមាណដែលរោងម៉ាស៊ីនមានតម្រូវការ។
លោក លន់ យ៉េង បានបញ្ជាក់ថា ៖
“បច្ចុប្បន្ននេះ កសិករមានជម្រើសច្រើនណាស់លើការលក់ស្រូវ ដោយគាត់អាចលក់ដោយខ្លួននៅលើទីផ្សារ ដូចជាលក់ឱ្យរោងម៉ាស៊ីនកិនស្រូវក៏បាន លក់ឱ្យឈ្មួញនាំចេញទៅវៀតណាមផ្ទាល់ក៏បាន ទៅតាមតម្លៃទីផ្សារដែលគាត់ត្រូវការ។ ប៉ុន្តែយើងចង់ឱ្យអនុវត្តការធ្វើកិច្ចសន្យាកសិកម្មឱ្យបានច្រើន ដើម្បីធានាបាននូវតម្លៃសមរម្យមួយដែលអាចទទួលយកបានជៀសវាងផលិតស្រូវបានតែគ្មានទីផ្សារ ឬលក់បានក្នុងតម្លៃទាប”
គួរបញ្ជាក់ផងដែរថា បច្ចុប្បន្ននេះ ក្រសួងកសិកម្ម បានចូលរួមជួយជ្រោមជ្រែងយ៉ាងច្រើន ជាពិសេសចាប់តាំងពីរដ្ឋមន្រ្តីក្រសួងកសិកម្មថ្មីមកកាន់តំណែង ដោយលោកមានការយកចិត្តទុកដាក់លើការធ្វើកិច្ចសន្យាកសិកម្ម ឬ Contract Farming នេះ។ ក្រសួងកសិកម្ម ក៏កំពុងដឹកនាំការកសាងប្រព័ន្ធពូជស្រូវ ដោយសហការគ្នារវាងកសិករតាមរយ:សហគមន៍ និងសហភាពកសិកម្មអ្នកផលិតស្រូវ និងកិច្ចសន្យាកសិកម្ម ជាមួយរោងម៉ាស៊ិនកិនស្រូវ រួមជាមួយនឹងកិច្ចសហការជាមួយអ្នកពាក់ព័ន្ធផ្សេងទៀតដើម្បីផលប្រយោជន៍រួមទាំងអស់គ្នា។ ជាមួយគ្នានេះ គម្រោងដែលសហព័ន្ធស្រូវអង្ករ ចង់នាំអង្ករចេញទៅកាន់ទីផ្សារអន្តរជាតិឱ្យបានមួយលានតោន ក្នុងពេលខាងមុខនេះ គឺត្រូវផ្តើមចេញពីការធ្វើកិច្ចសន្យាកសិកម្មនេះហើយ ដែលជំរុញឱ្យគម្រោងនេះទទួលបានជោគជ័យ៕
Account
Security
Favourite Content