សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ នៅក្នុងរយៈពេលជិត២ឆ្នាំចុងក្រោយនេះ គម្រោងវិនិយោគចម្រុះនៅក្នុងខេត្តព្រះសីហនុសរុបជិត៤០០គម្រោង ដែលមានទុនសរុបជិត ៨ពាន់លានដុល្លារអាម៉េរិក ទទួលបានគោលការណ៍លើកទឹកចិត្តពិសេសពីសំណាក់រាជរដ្ឋាភិបាលម្ពុជា ដើម្បីបង្កើនសកម្មភាពវិនិយោគ ជំរុញកំណើនសេដ្ឋកិច្ច ជាពិសេសអាចជួយឱ្យប្រជាជនដែលពាក់ព័ន្ធទាំងនៅក្នុងខេត្ត និងមកពីតំបន់ផ្សេងទៀតមានការងារធ្វើ និងអាចទទួលបានចំណូលសមរម្យសម្រាប់លើកកម្រិតជីវភាពគ្រួសារកាន់តែប្រសើរ។
ក្រុមការងារជំរុញការវិនិយោគក្នុងខេត្តព្រះសីហនុ កាលពីថ្ងៃចុងសប្ដាហ៍កន្លងទៅនេះបានបញ្ជាក់ថា ៖ ចាប់ពីឆ្នាំ២០២៤ រហូតដល់ខែកញ្ញា ឆ្នាំ២០២៥ ក្រុមការងារបានសម្រេចជាគោលការណ៍ផ្តល់ការលើកទឹកចិត្តដល់គម្រោងវិនិយោគសរុបចំនួន ៣៩២ គម្រោង មានទុនវិនិយោគប៉ាន់ស្មានសរុប ៧ ៨០១ លានដុល្លារអាម៉េរិក និងប៉ាន់ស្មានថាអាចបង្កើតការងារ ៥០ ៦៧០ កន្លែង ដោយក្នុងចំណោមគម្រោងទាំងអស់នោះមានគម្រោងវិនិយោគពាក់ព័ន្ធអគារជាប់គាំងចំនួន ១៨៦ គម្រោង, គម្រោងវិនិយោគថ្មី ១៦៦ គម្រោង, គម្រោងពង្រីក ២៥ គម្រោង និងគម្រោងវិនិយោគមានស្រាប់ ១៥ គម្រោង។
គម្រោងវិនិយោគដែលទទួលបានគោលការណ៍លើកទឹកចិត្តពីសំណាក់រាជរដ្ឋាភិបាលកម្ពុជាទាំងអស់នេះ ភាគច្រើនជាគម្រោងបង្កើតមជ្ឈមណ្ឌលពាណិជ្ជកម្មចម្រុះ, គម្រោងបង្កើតរោងចក្រកែច្នៃអាលុយមីញ៉ូម, គម្រោងបង្កើតរោងចក្រផលិតសម្ភារៈសម្រាប់សត្វចិញ្ចឹម, ,គម្រោងរោងចក្រផ្គុំ និងដំឡើងរថយន្ត, គម្រោងរោងចក្រផលិតគ្រឿងបន្លាស់យានយន្ត, គម្រោងសណ្ឋាគារ, គម្រោងរមណីយដ្ឋានទេសចរណ៍ និង គម្រោងអគារពហុមុខងារ និងវិស័យផ្សេងៗជាច្រើនទៀត។
បណ្ឌិតសភាចារ្យ ហ៊ាន សាហ៊ីប រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ ទីប្រឹក្សាសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា និងជាប្រធានក្រុមការងារលើកទឹកចិត្តពិសេសរបស់រាជរដ្ឋាភិបាល បានមានប្រសាសន៍ឱ្យដឹងថា៖ មុនពេលផ្តល់នូវការលើកទឹកចិត្តពិសេសដល់គម្រោងនានាដែលបានដាក់ស្នើសុំការលើកទឹកចិត្ត ក្រុមការងារបានប្រជុំ និងពិនិត្យយ៉ាងល្អិតល្អន់។ បន្ទាប់ពីសម្រេចជាគោលការណ៍ផ្តល់ការលើកទឹកចិត្តហើយ ក្រុមការងារ និងក្រសួង ស្ថាប័នពាក់ព័ន្ធ ត្រូវបន្តជួយសម្របសម្រួល ដោះស្រាយបញ្ហា សំណូមពរ សម្រួលនីតិវិធី និងផ្តល់ការលើកទឹកចិត្តជាក់ស្តែង ដូចជា ការលើកទឹកចិត្តផ្នែកពន្ធដារ ផ្នែកគយ និងការផ្តល់អាជ្ញាបណ្ណ លិខិតអនុញ្ញាត និងវិញ្ញាបនបត្រ រួមទាំងការចុះបញ្ជីក្រុមហ៊ុន និងការចេញប្រកាសបើករោងចក្រ ។
សូមជម្រាបថា កម្មវិធីពិសេសជំរុញការវិនិយោគក្នុងខេត្តព្រះសីហនុឆ្នាំ២០២៤ បានត្រូវប្រកាសដាក់ឱ្យអនុវត្តកាលពីថ្ងៃទី៣១ ខែមករា ឆ្នាំ២០២៤ ដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ។ កម្មវិធីពិសេសនេះ មានគោលបំណងលើកកម្ពស់សកម្មភាពវិនិយោគ និងធុរកិច្ចក្នុងខេត្តព្រះសីហនុ សម្រាប់ឆ្នាំ២០២៤ ឱ្យកាន់តែច្រើន និងមានសម្ទុះលឿន ដោយផ្តោតលើគម្រោងវិនិយោគ ឬសកម្មភាពធុរកិច្ចចំនួន ៣ប្រភេទរួមមាន៖ ១៖ គម្រោងវិនិយោគ ឬសកម្មភាពធុរកិច្ចពាក់ព័ន្ធនឹងអគារកំពុងជាប់គាំង, ២៖ គម្រោងវិនិយោគ ឬសកម្មភាពធុរកិច្ច មិនជាប់ពាក់ព័ន្ធនឹងអគារជាប់គាំងនិង៣៖ ការពង្រីកគម្រោងវិនិយោគ ឬសកម្មភាពធុរកិច្ចដែលមានស្រាប់ស្របតាមលក្ខណៈវិនិច្ឆ័យជាក់លាក់៕
Account
Security
Favourite Content