បរទេស ៖ បន្ទាប់ពីបញ្ចប់កិច្ចចុះហត្ថលេខាព្រមព្រៀងក្នុងការរុករករ៉ែកម្រជាមួយគ្នាកាលពីខែកញ្ញាកន្លងទៅជាមួយទំហំទឹកប្រាក់ប្រមាណ ៥០០លានដុល្លារអាម៉េរិកនោះ នៅត្រឹមដើមខែតុលា ឆ្នាំ២០២៥ថ្មីៗនេះ ប៉ាគីស្ថាន បានចាប់ផ្តើមដឹកជញ្ជូនរ៉ែកម្រពីក្នុងទឹកដីរបស់ខ្លួនជាច្រើនមុខចូលទៅដល់ទឹកដីអាម៉េរិកតាមកាលកំណត់ និងសន្យាជាមួយគ្នា ខណៈដែលអាម៉េរិកកំពុងងាកចេញពីការផ្គត់ផ្គង់របស់ទីផ្សារចិន។

នៅក្នុងកញ្ចប់រ៉ែកម្រចម្រុះលើកដំបូងដែលត្រូវបានដឹកជញ្ជូនទៅដល់មូលដ្ឋានរបស់ក្រុមហ៊ុនអ្នកកែច្នៃរ៉ែរបស់សហរដ្ឋអាម៉េរិក U.S. Strategic Metals (USSM) កាលពីថ្ងៃព្រសហ្បតិ៍សប្តាហ៍មុននេះត្រូវបានបណ្តាញសារព័ត៌មានក្នុងស្រុករាយការណ៍ថា ជាលទ្ធផលនៃការរកស៊ីចូលគ្នាលើវិស័យរុករករ៉ែនេះ វាអាចក្លាយជាចំណងនៃទំនាក់ទំនងរវាងរដ្ឋាភិបាលប៉ាគីស្ថាន និងសហរដ្ឋអាម៉េរិកឲ្យកាន់តែមានភាពរឹងម៉ាំ និងស៊ីជម្រៅកាន់តែខ្លាំងឡើង។

នៅក្នុងកិច្ចព្រមព្រៀងដែលមានតម្លៃ៥០០លានដុល្លារ និងត្រូវបានចុះហត្ថលេខាកាលពីខែកញ្ញា ឆ្នាំ២០២៥កន្លងទៅរវាងក្រុមហ៊ុនវិស្វកម្មយោធារដ្ឋរបស់ប្រទេសប៉ាគីស្ថាន Frontier Works Organisation (FWO)ជាមួយនឹងក្រុមហ៊ុន USSM របស់សហរដ្ឋអាម៉េរិក ដើម្បីអាចបង្កើតបានជារោងចក្រចម្រាញ់រ៉ែកម្ររួមគ្នាមួយស្ថិតនៅក្នុងទឹកដីរបស់ប៉ាគីស្ថានផ្ទាល់តែម្ដង។

នាយករដ្ឋមន្ត្រីប៉ាគីស្ថាន លោក Shehbaz Sharif បានកោតសរសើរយ៉ាងខ្លាំងចំពោះកិច្ចខិតខំប្រឹងប្រែង និងលទ្ធផលជាផ្លូវការនាលើកនេះ ជាមួយនឹងការបង្ហាញពីការជឿទុកចិត្តថា តាមរយៈកិច្ចព្រមព្រៀងនេះនឹងអាចបង្កើតបានជាសង្វាក់ផ្គត់ផ្គង់ដ៏មានសុវត្ថិភាព និងភាពចម្រុះសម្រាប់សេដ្ឋកិច្ចជាតិ ព្រមទាំងផ្តល់នូវអត្ថប្រយោជន៍ជូនដល់ប្រជាជាតិនៃប្រទេសទាំងពីរ។

ប្រធានប្រតិបត្តិការក្រុមហ៊ុន USSM របស់សហរដ្ឋអាម៉េរិក លោក Stachy W. Hastie ក៏បានបង្ហាញពីភាពសុទិដ្ឋិនិយមផងដែរចំពោះជំហ៊ានលើកដំបូងនៃកិច្ចសហការរួមគ្នាក្នុងទ្រង់ទ្រាយធំមួយនេះ ហើយជឿជាក់ថា ការផ្គត់ផ្គង់រ៉ែសំខាន់ៗទៅឲ្យសហរដ្ឋអាម៉េរិកនឹងអាចជួយបង្កើនទំនាក់ទំនង និងបង្កើនផលប្រយោជន៍សេដ្ឋកិច្ចចំពោះភាគីទាំងសងខាង។

សូមបញ្ជាក់ដែរថា ចំពោះប្រភេទរ៉ែកម្រដែលបានដឹកជញ្ជូនចេញពីប្រទេស ប៉ាគីស្ថាន ទៅកាន់ទឹកដីសហរដ្ឋអាម៉េរិកនាពេលកន្លងទៅនេះរួមមានសារធាតុសំខាន់ៗដូចជា ប្រភេទរ៉ែ អង់ទីម៉ូនី (antimony), ទង់ដែង ( copper) និងរ៉ែកម្ររបស់ពិភពលោកផ្សេងទៀតដូចជា នីអូឌីមីញ៉ូម (neodymium) និងប្រាស្យូឌីមីញ៉ូម (praseodymium) ។ ជាងនេះទៅទៀត ក្រសួងកិច្ចការងារថាមពលសហរដ្ឋអាម៉េរិកបានប្រកាសពីផែនការបញ្ចេញថវិកាជិត១ពាន់លានដុល្លារ ដើម្បីអភិវឌ្ឍការធ្វើមាត្រដ្ឋានលើការជីកយករ៉ែកម្រ ការកែច្នៃ និងវត្ថុធាតុដើមសំខាន់ៗជាច្រើនមុខបន្ថែមទៀត ដូចជា ប្រភេទរ៉ែប្រាក់ជាដើម៕