ភ្នំពេញ ៖ នៅព្រឹកថ្ងៃទី២៦ ខែកក្កដា ឆ្នាំ២០២៤នេះ ស្ថាប័នធនាគារ និងហិរញ្ញវត្ថុ សរុបប្រមាណ ៩០ស្ថាប័ន ព្រមទាំងក្រុមហ៊ុនអប្សរា មេឌាសឺវីស (AMS) បានជួបប្រជុំគ្នាដើម្បីពង្រឹងកិច្ចសហប្រតិបត្តិការ លើការផ្សព្វផ្សាយកម្មវិធី «វិថីហិរញ្ញវត្ថុរដូវកាលទី ២ » ប្រកប​ដោយ​ប្រសិទ្ធភាព និងទៅដល់ប្រជាជនគោលដៅ។

តាមរយៈកម្មវិធីនេះ ក្រុមហ៊ុន អប្សរា មេឌាសឺវីស (AMS) បានប្រមូលនូវមតិកែលម្អពីបណ្តាធនាគារ និងគ្រឹះស្ថាន​មីក្រូហិរញ្ញវត្ថុ​សម្រាប់​​ការបង្កើតមាតិការថ្មីៗបន្ថែមទៀតនៅក្នុងកម្មវិធីវិថីហិរញ្ញវត្ថុ។ ម្យ៉ាងទៀតក៏ដើម្បីសម្រួលផ្នែក​បច្ចេក​ទេសទៅដល់ស្ថាប័ន​ពាក់ព័ន្ធនានា ក្នុងការចូលរួមផ្សព្វផ្សាយមាតិកា​ជាច្រើនផ្សេងទៀតពីកម្មវិធី «វិថីហិរញ្ញវត្ថុ រដូវកាលទី២»។

នៅក្នុងឱកាសជួបជុំគ្នានេះ លោក កាំង តុងងី ប្រធាននាយកដ្ឋានទំនាក់ទំនងសាធារណៈ​នៃសមាគមមីក្រូហិរញ្ញ​វត្ថុ​កម្ពុជា បានឱ្យដឹងថា កម្មវិធីនេះជាផ្នែកមួយនៃការជំរុញកិច្ចផ្សព្វផ្សាយចំណេះដឹងផ្នែកហិរញ្ញវត្ថុទៅដល់ប្រជាជនកម្ពុជាឱ្យបានកាន់តែទូលំទូលាយបន្ថែមពីលើអ្វីដែលសមាគមបាន និងកំពុងធ្វើនាពេលបច្ចុប្បន្ន។

លោកបន្តឱ្យដឹងទៀតថា៖

«ការលើកកម្ពស់ចំណេះដឹងហិរញ្ញវត្ថុនេះ មិនមែនជារឿងដែលយើងអាចធ្វើក្នុងរយៈពេល ៤ -៥ ចប់នោះទេ ប៉ុន្តែត្រូវធ្វើជាប្រចាំ ធ្វើដោយមានយុទ្ធសាស្ត្រ ហើយពេលខ្លះ កិច្ចការពង្រឹងចំណេះដឹងហិរញ្ញវត្ថុនេះ វាអាចលើលពីមួយជំនាន់។ កាលណាប្រជាពលរដ្ឋមានចំណេះដឹងលើផ្នែកហិរញ្ញវត្ថុនេះកាន់តែប្រសើរឡើង វាក៏អាចធ្វើឱ្យការប្រកបអាជីវកម្មរបស់ស្ថាប័នធនាគារ ឬមីក្រូហិរញ្ញវត្ថុកាន់តែប្រសើរឡើងផងដែរ»។

ទន្ទឹមគ្នានេះ លោក ហេង សុវណ្ណ ដែលជាប្រធាននាយកដ្ឋានព័ត៌មាននៃក្រុមហ៊ុន អប្សរា មេឌាសឺវីស (AMS) ក៏បានលើកឡើងផងដែរអំពីដំណើរការរបស់ក្រុមហ៊ុនក្នុងការចូលរួមផ្សព្វផ្សាយ និងបញ្ជ្រាបចំណេះដឹងផ្នែកហិរញ្ញវត្ថុទៅដល់ប្រជាពលរដ្ឋគោលដៅ។

លោកបានបន្តឱ្យដឹងទៀតថា៖

«ក្នុងនាមជាអ្នកផលិតកម្មវិធី វិថីហិរញ្ញវត្ថុ យើងព្យាយាមធ្វើយ៉ាងណា សម្រិតសម្រាំងទៅលើគុណភាពមាតិកា ព្រមទាំងធានាថា មាតិកាទាំងនោះបានទៅដល់ក្រុមមនុស្សគោលដៅ ​ដែលយើងបានកំណត់នៅក្នុងរដូវកាលនីមួយៗ។»

ដោយឡែក នៅក្នុងរដូវកាលថ្មីនេះ កម្មវិធីបានកែប្រែនូវទម្រង់នៃកិច្ចពិភាក្សាមួយចំនួន ដោយ​ព្យាយាមរក្សានូវភាពសាមញ្ញ ជាពិសេសប្រើប្រាស់ពាក្យដែលងាយស្រួលយល់។ នេះបើតាមការបញ្ជាក់បន្ថែមរបស់លោក ហេង សុវណ្ណ។

គួរបញ្ជាក់ថា កម្មវិធីវិថីហិរញ្ញវត្ថុ គឺជាកម្មវិធីដែលទទួលបានការគាំទ្រពីសំណាក់សមាគមមីក្រូហិរញ្ញវត្ថុនៃកម្ពុជា (CMA) សមាគមធនាគារនៃកម្ពុជា (ABC) ជាពិសេសគឺធនាគារជាតិនៃកម្ពុជា (NBC) ក្នុងការបង្កើតជាវេទិកាពិភាក្សា ដើម្បីបង្កើនចំណេះដឹងផ្នែកហិរញ្ញវត្ថុទៅកាន់ប្រជាពលរដ្ឋកម្ពុជា៕