សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ប្រទេសនីហ្សេរីយ៉ា ត្រូវបានគេស្គាល់ថាជាអ្នកដែលអាចដាំដុះនឹងប្រមូលផលដាំណាំដំឡូងមីបានច្រើនជាងគេបំផុតលើពិភពលោកដល់ទៅជាង៦០លានតោនជារៀងរាល់ឆ្នាំ ប៉ុន្តែជារឿងដែលមិនគួរឲ្យជឿបំផុតនោះគឺថាការនាំចេញស្ទើរតែមិនមានឡើយទៅកាន់ទីផ្សារអន្តរជាតិ។
ដំឡូងមី ជាប្រភេទផលិតផលដ៏មានតំរូវការខ្ពស់បំផុតចាប់រាប់ពីអាស៊ីទៅដល់អឺរ៉ុប និងអាមេរិក ពីព្រោះថាជាវត្ថុធាតុដើមដ៏មានសារៈសំខាន់នៅក្នុងវិស័យម្ហូបអាហាររបស់សកលលោក ដែលគេអាចទាញវាយកទៅផលិតជាអាហារបានច្រើនប្រភេទ ហើយគិតត្រឹមតែឆ្នាំ២០១៨ប៉ុណ្ណោះទីផ្សារដំឡូងមីរបស់សកលមានទំហំដល់ទៅ៤០,៥៣ពាន់លានដុល្លារ និងរំពឹងថានឹងកើនឡើងទៅដល់ ៦៦,៨៤ពាន់លានដុល្លារនៅត្រឹមឆ្នាំ២០២៦។
ឆ្នាំ២០២២កន្លងមកនេះ នីហ្សេរីយ៉ា ប្រមូលផលដំឡូងមីបានរហូតទៅដល់៦៣លានផោន ពោលគឺច្រើនជាងបណ្តាប្រទេសណាទាំងអស់លើពិភពលោក ប៉ុន្តែគិតជាទំហំប្រាក់ចំណូលបានមកពីការនាំចេញបែរជាមានត្រឹមតែ១លានដុល្លារទៅវិញ ខណៈដែលថៃមិនស្ថិតនៅក្នុងបញ្ជីទាំង៥អ្នកផលិតច្រើនជាងគេផងនោះបែរជាអាចរកប្រាក់ចំណូលបានពីការនាំចេញច្រើនជាងគេបំផុតដល់ទៅ ១,៣ពាន់លានដុល្លារទៅវិញ។
ហេតុអ្វីបានជានីហ្សេរីយ៉ាមានសក្តានុពលផ្នែកដំឡូងមីខ្លាំងធៀបទៅនឹងប្រទេសជាច្រើន ប៉ុន្តែបែរជាមិនអាចទាញយកចំណូលជាច្រើនពាន់លានដុល្លារដូចគេ?
មូលហេតុសាមញ្ញ និងងាយស្រួលយល់បំផុតនោះគឺនៅត្រង់ថា បើទោះបីជានីហ្សេរីយ៉ាអាចបង្កើនផលិតផលដំណាំនេះគុណនឹង២ដងទៀតក៏ប្រទេសនេះនៅតែមិនអាចទាញយកចំណូលដ៏ច្រើនសន្ធឹកសន្ធាប់ទាំងនេះបានដែរ។
កសិករនីហ្សេរីយ៉ាស្ទើរគ្រប់គ្នាសុទ្ធតែជាអ្នកដាំដំណាំដំឡូងមី ប៉ុន្តែពួកគេមានគោលបំណងតែមួយគត់ដើម្បីទទួលផលពីវាគឺស្តុកទុកគ្រាន់តែជាអាហារសម្រាប់បរិភោគផ្ទាល់ខ្លួនប៉ុណ្ណោះ ដូច្នេះហើយដីដាំដុះរបស់ពួកគេមួយផ្នែកបែរជានាំគ្នាទៅដាំដំណាំផ្សេងវិញដែលអាចទាញបានចំណូលច្រើនជាង ហើយគិតជាមធ្យម កសិករនីហ្សេរីយ៉ាមិនអាចទាញចំណូលពីការលក់ដំឡូងមីបាន១ដុល្លារឡើយក្នុងមួយថ្ងៃ។
សង្វាក់ផលិតកម្មដ៏ខ្សត់ខ្សោយបានជះឥទ្ធិពលយ៉ាងធំធេងនៅក្នុងវិស័យដ៏មានទីផ្សារមួយនេះ។ រោងចក្រផលិតម្សៅដំឡូងមីមានចំនួនតិចតួចហើយស្ថិតនៅចំងាយឆ្ងាយដល់ទៅរាប់រយគីឡូម៉ែត្រពីចំការដំឡូងមី ខណៈដែលការដឹកជញ្ជូនគឺមិនអាចធ្វើបានល្អប្រសើរឡើយ ពីព្រោះថាប្រសិនបើការដឹកជញ្ជូនដំឡូងមីលើសពី៤៨ម៉ោងនោះវានឹងធ្វើឲ្យដំណាំទាំងនោះខូចខាតភ្លាមៗ ជាក់ស្តែងកាលពីឆ្នាំ២០១៥កន្លងទៅ នីហ្សេរីយ៉ាបានខាតបង់ទឹកប្រាក់ដល់ជាង ៦០០លានដុល្លារ ពីព្រោះថាការដឹកជញ្ជូនមិនបានត្រឹមត្រូវ។
ដំឡូងមីដល់ទៅ៦៣លានតោន ប៉ុន្តែនីហ្សេរីយ៉ាមិនអាចដឹកជញ្ជូនទៅកាន់ទីផ្សារក្រៅស្រុកបានដែលនឹងអាចរកចំណូលបានទៅដល់រាប់ពាន់លានដុល្លារ មិនត្រឹមតែប៉ុណ្ណោះប្រទេសនេះក៏ខកខានការទាញយកប្រាក់ចំណូលរាប់ពាន់លានដុល្លារផ្សេងទៀតផងដែរ ពីព្រោះថាផ្ទៃដីដាំដុះរបស់ប្រទេសអាចបង្កើនផលដល់ទៅច្រើនដងជាងបច្ចុប្បន្នក្នុងករណីប្រសិនបើកសិករទទួលបានការលើកទឹកចិត្ត និងអត្ថប្រយោជន៍បានច្រើនជាងនេះ៕
Account
Security
Favourite Content