សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ការដាំដុះ មិនថាខ្នាតធំ ឬខ្នាតតូចនោះទេ គេត្រូវការជាចំាំបាច់នូវបច្ចេកទេស ក៏ដូចជាចំណេះដឹងសំខាន់ៗក្នុងការដាំ និងមើលថែ ដែលធ្វើឱ្យការបង្កើតមាតិកាទាក់ទងនឹងការដាំដុះកាន់តែមានប្រជាប្រិយភាព និងកាន់តែមានអ្នកចាប់អារម្មណ៍ច្រើន។
តួយ៉ាង Easy Grow ជាផេកហ្វេសប៊ុកមួយដែលចែករំលែកវីដេអូមាតិកាផ្ដោតលើការដាំបន្លែ ក៏ដូចជាគន្លឹះសំខាន់ៗក្នុងការដាំដំណាំ ពិសេសប្រភេទបន្លែ ប្រកបដោយប្រសិទ្ធភាព និងទទួលបានទិន្នផលខ្ពស់ ពោលគឺជាការចែករំលែកសម្រាប់បងប្អូនកសិករផ្ទាល់តែម្ដង។
លោក ទាំ អ៊ូមឺត ជាស្ថាបនិកផេកកសិកម្មខាងលើបានមានប្រសាសន៍ថា៖
«យើងបង្កើតផេកនេះឡើងដោយសារតែយល់ឃើញថា យើងមានចំណេះដឹងកសិកម្មស្រាប់ ហើយក៏ធ្លាប់ធ្វើការជាមួយអង្គការនានាដែរ ទើបចង់បង្កើតវីដេអូចំណេះដឹងដើម្បីចែករំលែកដល់នបងប្អូនអ្នកដាំដំណាំផង និងអាចរកចំណូលបានមួយកម្រិតផងដែរ»។
លោក អ៊ូមឹត និង អ្នកនាង ឈុត សុខា ដែលជាដៃគូបានបញ្ជាក់ទៀតថា សម្រាប់ឈ្មោះថា Easy Grow ដែលមានន័យថាងាយស្រួលដាំដុះ គឺចង់បង្ហាញថា ការដាំដុះគឺមិនមានអ្វីពិបាកនោះទេ ដែលយើងអាចសិក្សាពីវាបានម្ដងបន្តិចៗ អ្វីដែលសំខាន់គឺយើងអត់ដាំ បើយើងដាំគឺដឹងតែដុះ ហើយចេះមើលថែទាំដឹងតែល្អហើយ ម្យ៉ាងទៀតគឺចង់ទាក់ទាញចំណាប់អារម្មណ៍អ្នកទស្សនាឱ្យបានយល់ថា ការដាំដុះគឺពិតជាងាយស្រួល។
លោកបន្តថា ដំបូងឡើយលោកជាបុគ្គលិកនៅតាមអង្គការដែលមានសកម្មភាពក្នុងវិស័យកសិកម្មដែរ ហើយលោកក៏បានចាប់ផ្ដើមបង្កើតវីដេអូខ្លះៗ យកវីដេអូគេមកចែលរំលែកបន្តខ្លះតាំងពីឆ្នាំ២០១២ ដោយពុំយល់ច្បាស់ពីច្បាប់កម្មសិទ្ធិបញ្ញាឡើយ ទើបក្រោយមកក៏ជួបបញ្ហានៅលើផេក។ បន្ទាប់មកទៀត ទើបស្ថាបនិករូបនេះបានស្រាវជ្រាវបន្ថែម និងបង្កើតផេកឡើងវិញ ដោយបានឈប់ធ្វើការ និងផ្ដោតទាំងស្រុងលើការបង្កើតវីដេអូ ក៏ដូចជាមានគម្រោងចង់ចែកចាយនូវធាតុចូលកសិកម្មមួយចំនួនដែលមានគុណភាពល្អដល់កសិករផងដែរ។
ក្រោយការចាប់ផ្ដើមឡើងវិញនេះ អាជីពជាអ្នកបង្កើតមាតិកានេះហាក់មានជោគជ័យ មានផ្លែផ្កាច្រើន ដោយមានអ្នកគាំទ្រ ក៏ដូចជាឆាត និងទូរស័ព្ទមកសួរពីបច្ចេកទេសកសិកម្មនានា ពីបណ្ដាលខេត្តមួយចំនួនដូចជា បាត់ដំបង កំពត កំពង់ចាម ត្បូងឃ្មុំ កណ្ដាលជាដើម។
យ៉ាងណាមិញ លោក ទាំ អ៊ូមឺត ក៏បានរៀបរាប់ពីផលលំបាកដែរថា អ្វីដែលយើងពិបាកនោះគឺទាក់ទងនឹងបច្ចេកទេសក្នុងការថត ការជ្រើសរើសប្លង់ ហើយការកាត់តនៅមានកម្រិតនៅឡើយ ណាមួយពីមុនយើងមិនសូវមានពេលវេលាគ្រប់គ្រាន់ តែយើងក៏មានផែនការ ក្នុងការបង្កើតមាតិកាបន្ថែម រៀនបច្ចេកទេសផលិតវីដេអូបន្ថែម ដើម្បីផលិតវីដេអូកាន់តែមានគុណភាព និងជាគុណប្រយោជន៍សម្រាប់កសិករ៕
Account
Security
Favourite Content