បរទេស៖ អង្គការសម្រាប់កិច្ចសហប្រតិបត្តិការ និងអភិវឌ្ឍន៍សេដ្ឋកិច្ច (OECD) បង្ហាញពីការព្យាករនិង ការព្រមានខ្លះៗរបស់ខ្លួនសម្រាប់សេដ្ឋកិច្ចសកល ។ នេះបើយោងតាមការរាយការណ៍ពី Al Jazeera។

នៅក្នុងទស្សនវិស័យសេដ្ឋកិច្ចរបស់ OECD ព្យាករថា កំណើនសេដ្ឋកិច្ចពិភពលោកនឹងថយចុះបន្តិចពី ៣,២% ក្នុងឆ្នាំ ២០២៥ មកត្រឹម ២,៩% ក្នុងឆ្នាំ ២០២៦ ប៉ុន្តែអាចងើបឡើងវិញដល់ ៣,១% នៅឆ្នាំ ២០២៧ ។ OECD ព្រមានថា កំណើនសេដ្ឋកិច្ចសកលងាយរងគ្រោះទៅនឹងការផ្ទុះឡើងនៃភាពតានតឹងពាណិជ្ជកម្ម ខណៈដែលអារម្មណ៍វិជ្ជមានរបស់វិនិយោគិនលើ AI អាចធ្វើឲ្យផ្សារភាគហ៊ុនមានការប្រែប្រួល។ ប្រធាន OECD លោក Mathias Cormann លើកឡើងថា រហូតមកដល់ពេលនេះ ភាពតក់ស្លុតខាងពាណិជ្ជកម្មបង្កឡើងដោយការដំឡើងពន្ធគយរបស់អាម៉េរិកហាក់ធូរស្រាលបន្តិច ប៉ុន្តែការចំណាយទំនងជាកើនឡើងនៅឡើយ។ យ៉ាងណាមិញ ឥទ្ធិពលនៃពន្ធខ្ពស់ទាំងនោះនឹងបង្ហាញកាន់តែច្បាស់ នៅពេលស្តុករបស់ក្រុមហ៊ុន ឬ អាជីវកម្មធ្លាក់ចុះ ។

ទន្ទឹមនឹងនេះ សេដ្ឋកិច្ចអាម៉េរិកត្រូវបានព្យាករថានឹងកើនឡើង ២% នៅឆ្នាំ ២០២៥ ធៀបនឹងការព្យាករលើកមុនកាលពីខែកញ្ញា ១,៩%។ OECD បន្ថែមថា ការវិនិយោគលើ AI, ការគាំទ្រផ្នែកសារពើពន្ធ និងការកាត់បន្ថយអត្រាការប្រាក់របស់ធនាគារកណ្តាលអាម៉េរិកជួយបន្ធូរបន្ថយសម្ពាធពីពន្ធនាំចូល និង​ កាត់បន្ថយចំនួនអន្តោប្រវេសន៍។ យ៉ាងណាមិញ រដ្ឋបាល Trump ធ្វើឲ្យគោលនយោបាយសារពើពន្ធរបស់អាម៉េរិកមានភាពមិនច្បាស់លាស់ ជាមួយនឹងឱនភាពថវិកាដ៏ធំ និងការកើនឡើងនៃបំណុល។ សម្រាប់នៅខាងប្រទេសចិនវិញ កំណើនសេដ្ឋកិច្ចត្រូវបានព្យាករថានឹងរក្សាស្ថិរភាព ៥% ក្នុងឆ្នាំ ២០២៥ ប៉ុន្តែនឹងធ្លាក់ចុះមកត្រឹម ៤,៤% ក្នុងឆ្នាំ ២០២៦។ លើសពីនេះ កំណើនសេដ្ឋកិច្ចរបស់ជប៉ុនត្រូវបានព្យាករថានឹងកើនឡើង ១,៣% ក្នុងឆ្នាំនេះ ធៀបនឹងការព្យាករណ៍លើកមុន ១,១%  ដោយសារត្រូវបានជំរុញដោយប្រាក់ចំណូលសាជីវកម្ម និងការវិនិយោគដ៏រឹងមាំ ប៉ុន្តែនឹងធ្លាក់ចុះដល់ ០,៩% នៅឆ្នាំ ២០២៦។ សម្រាប់នៅតំបន់ចាយប្រាក់អឺរ៉ូវិញ កំណើនសេដ្ឋកិច្ចត្រូវបានព្យាករថានឹងកើនឡើងបន្តិច ១,៣% ក្នុងឆ្នាំនេះ បើធៀបនឹងការព្យាករលើកមុន ១,២% ដោយសារទីផ្សារការងារមានភាពធន់ទ្រាំ និងការកើនឡើងការចំណាយសាធារណៈនៅក្នុងប្រទេសអាល្លឺម៉ង់។

មិនត្រឹមតែប៉ុណ្ណោះ OECD ព្យាករកំណើនពាណិជ្ជកម្មសកលនឹងថយចុះពី ៤,២% ក្នុងឆ្នាំ ២០២៥ មកត្រឹម ២,៣% ប៉ុណ្ណោះនៅឆ្នាំ ២០២៦ ដោយសារសម្ពាធពន្ធគយនឹងបង្ហាញផលប៉ះពាល់ពេញលេញលើការវិនិយោគ និងការប្រើប្រាស់។ លើសពីនេះ គោលនយោបាយពាណិជ្ជកម្មកាន់តែមានភាពមិនច្បាស់លាស់ ខណៈដែលអត្រាអតិផរណានៅអាម៉េរិកអាចនឹងកើនឡើងដល់កម្រិតកំពូលនៅពាក់កណ្តាលឆ្នាំ ២០២៦។ យ៉ាងណាមិញ នៅក្នុងប្រទេសចិន និងទីផ្សារដែលកំពុងរីកចម្រើនមួយចំនួន អត្រាអតិផរណាអាចនឹងកើនឡើងតិចតួច ខណៈដែលសមត្ថភាពផលិតលើសអាចនឹងធ្លាក់ចុះជាងមុន។ OECD ព្យាករថា ធនាគារកណ្តាលសំខាន់ៗភាគច្រើនអាចនឹងរក្សា ឬ កាត់បន្ថយអត្រាការប្រាក់ក្នុងឆ្នាំ ២០២៦ ដោយសារសម្ពាធ​អតិ​ផរណាមានភាពធូរស្រាល។ អត្រាអតិផរណាអាចនឹងត្រលប់ទៅគោលដៅរបស់ធនាគារកណ្តាលជាបណ្តើរៗនៅពាក់កណ្តាលឆ្នាំ ២០២៧ ជាពិសេសប្រទេសសេដ្ឋកិច្ចធំៗ៕