គ្រប់គ្នាតែងតែនិយាយ និងចែករំលែកការយល់ឃើញដូចៗគ្នាថា សង្គមដែលមានសមភាពយេនឌ័រកាន់តែច្រើនមិនត្រឹមតែផ្តល់ឱកាសសេដ្ឋកិច្ចសង្គមកាន់តែប្រសើរសម្រាប់ស្ត្រីខ្លួនឯងប៉ុណ្ណោះទេ ប៉ុន្តែវាក៏នឹងផ្តល់ទំនោរកាន់តែរីកចម្រើនទៅដល់សុខភាពសេដ្ឋកិច្ចរបស់សកលព្រមទាំង និងសមធម៌ដែលមានភាពល្អប្រសើរឡើងជាងមុនផងដែរ។ លើសពីនេះការលើកកំពស់ឱកាសជូនស្ត្រីនឹងអាចផ្តល់ជួយទៅដល់កិច្ចខិតខំកាត់បន្ថយភាពក្រីក្រ បង្កើននិរន្តរភាពចំពោះបរិស្ថាន ព្រមទាំងផ្តល់នូវការសម្រេចចិត្តលើបញ្ហាកាន់តែទូលំទូលាយទៀតផង។

ទ្រឹស្តី និងការលើកឡើងរបស់អ្នកជំនាញត្រូវបានធ្វើឡើងអស់រយៈពេលជាច្រើនទសវត្សរ៍មកហើយ ប៉ុន្តែបើយើងពិនិត្យទៅលើតួលេខជាក់ស្តែងអំពីលទ្ធផលដែលស្ត្រីនឹងអាចចែករំលែកទៅដល់សេដ្ឋកិច្ចរបស់សកលលោកនោះគឺមានទំហំច្រើនអនេកលើសពីអ្វីយើងធ្លាប់គិតប្រសិនបើពិភពលោកអាចអនុវត្តកិច្ចការងារលើកកំពស់សិទ្ធិ និងឱកាសបានជោគជ័យប្រកបដោយភាពត្រឹមត្រូវ។

The World Economic Forum ធ្លាប់បានសរសេរថា ការផ្តល់អំណាចក្នុងការចូលរួមដោយស្មើភាពរបស់ស្ត្រីនៅគ្រប់វិស័យរបស់សកលលោកនឹងអាចជួយឲ្យពិភពលោកអាចទទួលបានកំណើនដល់ទៅ២៨ទ្រីលានដុល្លារទៀតនៅត្រឹមឆ្នាំ២០២៥។

របាយការណ៍ស្រាវជ្រាវផ្សេងទៀតដោយ The Connect Americas បានបង្ហាញថាស្ត្រីនៅក្នុងវិស័យការងារបានបំពេញមួយចំណែកដ៏ធំប្រមាណជា ៦៦ ភាគរយនៅទូទាំងពិភពលោក ហើយគិតត្រឹមក្នុងវិស័យម្ហូបអាហារស្ត្រីគឺជាមនុស្សដ៏សំខាន់ដែលអាចចូលរួមក្នុងចំណែកដល់ទៅ៥០ភាគរយ ប៉ុន្តែការទទួលបានប្រាក់ចំណូលបានត្រឹមតែ១០ភាគរយប៉ុណ្ណោះនៃចំណូលសរុបហើយមានតែពី១ទៅ២ភាគរយប៉ុណ្ណោះដែលអាចមានសិទ្ធិកាន់កាប់ទ្រព្យសម្បត្តិប្រភេទជាអចលនទ្រព្យ។

យ៉ាងណាក៏ដោយ បើទោះបីជាស្ត្រីបានដើរតួយ៉ាងសំខាន់នៅក្នុងកិច្ចការងារអភិវឌ្ឍសេដ្ឋកិច្ចសកលក្តី ប៉ុន្តែគេមើលឃើញថាស្ត្រីដល់ទៅ៧០ភាគរយនៃពលរដ្ឋក្រីក្រ ១,៥ពាន់លាននាក់នៅទូទាំងពិភពលោកដែលកំពុងរស់នៅទទួលបានប្រាក់ចំណូលទាបជាងមួយដុល្លារក្នុងមួយថ្ងៃ។ លើកលែងតែវិស័យកសិកម្មទោះជាស្ថិតនៅក្នុងប្រទេសកំពុងអភិវឌ្ឍ និងប្រទេសអភិវឌ្ឍក្តី ស្ត្រីជាមធ្យមនៅតែអាចទទួលបានប្រាក់ខែទាបជាងប្រាក់ខែដែលបុរសទទួលបានពីការងារដូចគ្នាដល់ទៅ៧៨ភាគរយ ពោលគឺជាចន្លោះខុសគ្នាដ៏ធំបំផុតដែលត្រូវការពេលវេលា និងកិច្ចខិតខំខ្លាំងបំផុតក្នុងការកែសម្រួលបញ្ហានេះឡើងវិញ។

របាយការណ៍ស្រាវជ្រាវចុងក្រោយមួយទៀតដែលធ្វើឡើងដោយ The Moody’s Analytics ក៏បានបង្ហាញដែរទៅលើភាពខុសគ្នានៃប្រាក់កម្រៃដែលស្ត្រី និងបុរសទទួលបានដោយការសន្និដ្ឋានរបស់អង្គភាពនេះបានអះអាងថា ប្រសិនបើគម្លាតប្រាក់ខែរបស់ពួកគេមានកម្រិតតិចតួចនោះវានឹងអាចធ្វើឲ្យពិភពលោកបង្កើនសេដ្ឋកិច្ចប្រហែលជា៧ភាគរយ ឬប្រមាណជា៧ទ្រីលានដុល្លារជារៀងរាល់ឆ្នាំ ប៉ុន្តែ Moody បានព្យាករណ៍ថាពិភពលោកត្រូវការពេលវេលាដល់ទៅ១៣២ឆ្នាំដើម្បីអាចធ្វើឲ្យគម្លាតប្រាក់កម្រៃនៅក្នុងសមភាពយេនឌ័រអាចខិតមកជិតគ្នាបាន។

មកត្រឹមនេះយើងអាចមើលឃើញថា ទាំងទ្រឹស្តី ទាំងទិន្នន័យ និងតួលេខពិតប្រាកដបានបង្ហាញយ៉ាងច្បាស់អំពីសារៈសំខាន់នៃសមភាពយេនឌ័រ និងសក្តានុពលដ៏ធំធេងក្នងការលើកកំពស់សមត្ថភាព​ ក៏ដូចជាឱកាសសម្រាប់ស្ត្រីនៅក្នុងការចូលរួមចំណែកនានា និងនៅលើគ្រប់វិស័យដើម្បីអាចពង្រឹង និងធ្វើឲ្យសេដ្ឋកិច្ចសកលកាន់តែមានស្ថិរភាពខ្លាំងឡើង៕