បរទេស៖ យោងតាម​ប្រភពពី CNBC បានរាយការណ៍ថា តម្លៃប្រេងឆៅបានឡើងថ្លៃបន្តិចបន្ទាប់ពីទិន្នផលបេ្រងរបស់លីប៊ីធ្លាក់ចុះជិត ១,៥ លានបារ៉ែល ក្នុងរយៈពេល៣ថ្ងៃជាប់គ្នា ដែលស្មើនឹងការខាតបង់ជិត ១២០ លានដុល្លារ។

ទន្ទឹមនឹងនេះ តម្លៃប្រេងឆៅម៉ាក Brent ឡើងថ្លៃ ១,៦ ភាគរយ ឬ ៧៩,៩៤ ដុល្លារក្នុងមួយបារ៉ែល ខណៈដែលតម្លៃប្រេងម៉ាក West Texas Intermediate (WTI) ឡើងថ្លៃ ១,៣ ភាគរយ​ ឬ ៧៥,៩១ ដុល្លារក្នុងមួយបារ៉ែល។

ថ្មីៗនេះ លីប៊ី ដែលជាអ្នកផលិតប្រេងធំមួយរបស់ក្រុមប្រទេសនាំចេញប្រេង OPEC បានបញ្ជាក់ពីការរំខាននៅក្នុងទិន្នផលប្រេងរបស់ខ្លួន ដែលធ្វើឲ្យផលិតកម្មបានធ្លាក់ចុះ ១,៥ លានបារ៉ែលក្នុងរយៈពេល ៣ ថ្ងៃចុងក្រោយ ស្មើនឹងការខាតបង់សរុបចំនួន ១២០ លានដុល្លារ។ ទីផ្សារថាមពលឯករាជ្យ Rapidan Energy ប៉ាន់ប្រមាណថា ការរំខានផលិតកម្មនៅក្នុងប្រទេសលីប៊ីមានចន្លោះពី ៩ សែនបារ៉ែលទៅ ១ លានបារ៉ែលក្នុងមួយថ្ងៃ។ មិនត្រឹមតែប៉ុណ្ណោះ ​លីប៊ី កំពុង​ជាប់​គាំង​ក្នុង​ជម្លោះ​នយោបាយ ដោយរដ្ឋាភិបាលភាគខាងកើតនៅទីក្រុង Benghazi ដែលមិនត្រូវបានទទួលស្គាល់ជាអន្តរជាតិបានគម្រាមបិទការផលិត និងការនាំចេញប្រេងទាំងអស់។

ការព្រួយបារម្ភអំពីកង្វះការផ្គត់ផ្គង់ដែលអាចកើតមានដោយសារតែការផ្អាកផលិតកម្មប្រេងនៅក្នុងប្រទេសលីប៊ីបានធ្វើឲ្យតម្លៃប្រេងឡើងថ្លៃ។ គួរឲ្យបញ្ជាក់ដែរថា លីប៊ីផលិតប្រេងប្រហែល ១,២ លានបារ៉ែលក្នុងមួយថ្ងៃ ដោយភាគច្រើននៃប្រេងឆៅរបស់ខ្លួនត្រូវបាននាំចេញទៅកាន់ទីផ្សារពិភពលោក។

បច្ចុប្បន្ន អ៊ីរ៉ាក់ កំពុងផលិតប្រេងច្រើនជាងកូតារបស់ខ្លួន ៤ លានបារ៉ែល ក្រោមកិច្ចព្រមព្រៀងជាមួយអង្គការ OPEC និងសម្ព័ន្ធមិត្ត។

លោក Bob Yawger នាយកប្រតិបត្តិនៃក្រុមហ៊ុន ថាមពល Mizuho បានលើកឡើងថា ការរំខានក្នុងផលិតកម្មប្រេងរបស់ លីប៊ី ហានិភ័យនៃសង្រ្គាមកាន់តែទូលំទូលាយនៅមជ្ឈិមបូព៌ា និងការស្តុកទុកប្រេងឆៅ EIA នៅកម្រិតទាបរយៈពេល ៨ខែ គឺជាមូលហេតុធ្វើឲ្យតម្លៃប្រេងឡើងថ្លៃ។ ប្រសិនបើតម្លៃប្រេងបន្តឡើងថ្លៃ OPEC+ អាចនឹងបន្ថែមទិន្នផលបន្ថែម ៥ សែនបារ៉ែលចូលទៅក្នុងទីផ្សារនៅក្នុងខែតុលា។

លោក Matt Smith អ្នកវិភាគប្រេងនៅ Kpler បាននិយាយថា ទីផ្សារប្រេងអាមេរិកទំនងជានឹងទទួលបានអត្ថប្រយោជន៍ច្រើនបំផុតពីបញ្ហារំខានផលិតកម្មនៅលីប៊ី ដោយសារវាគឺជាការជំនួសដ៏ល្អបំផុតសម្រាប់អ្នកទិញនៅអឺរ៉ុបដែលត្រូវការជំនួសការផ្គត់ផ្គង់លីប៊ី។ កាលពីថ្ងៃចន្ទកន្លងទៅនេះ ប្រេងឆៅរបស់សហរដ្ឋអាមេរិកបានកើនឡើងច្រើនជាង ៣ ភាគរយ។ នៅក្នុងខែនេះ ទីផ្សារប្រេង​របស់​សហរដ្ឋ​អាមេរិក​កំពុង​ជួញ​ដូរ​ក្នុង​ចន្លោះ​ពី ៧១ ទៅ ៨០ ដុល្លារ​ក្នុង​មួយ​បារ៉ែលនៅ ​ដោយសារភូមិសាស្ត្រនយោបាយនៅមជ្ឈិមបូព៌ាបាន​រំខាន​ដល់​ការ​ផ្គត់ផ្គង់។ លើសពីនេះ ការធ្លាក់តម្រូវការធ្លាក់ចុះនៅក្នុងប្រទេសចិនដោយសារតែការកើនឡើងនៃការលក់រថយន្តអគ្គិសនី និងសេដ្ឋកិច្ចដ៏ក្តៅគគុក ក៏បានប៉ះពាល់ដល់ទីផ្សារប្រេងសកលផងដែរ៕