សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្រុមហ៊ុនផ្លូវល្បឿលឿនភ្នំពេញ-ក្រុងព្រះសីហនុ និងសមាគមដឹកជញ្ជូនអ្នកដំណើរផ្លូវគោកកម្ពុជា បានចុះហត្ថលេខាលើកិច្ចសហប្រតិបត្តិការក្នុងសម្រួលតម្លៃសេវាផ្លូវល្បឿនលឿនដល់បណ្ដាក្រុមហ៊ុនដឹកអ្នកដំណើរកម្ពុជាដែលធ្វើដំណើរឆ្លងកាត់ផ្លូវល្បឿនលឿន ។
លោក ឆឹម ចំណាន ប្រធានសមាគមដឹកជញ្ជូនអ្នកដំណើរ ថ្លែងនៅក្នុងពិធីចុះហត្ថលេខាកាលពីថ្ងៃចុងសប្ដាហ៍កន្លងទៅនេះបានលើកឡើងថា កិច្ចសហការរវាងសមាគមដឹកជញ្ជូនអ្នកដំណើរផ្លូវគោកកម្ពុជា និងក្រុមហ៊ុនផ្លូវល្បឿនលឿនភ្នំពេញ-ក្រុងព្រះសីហនុ គឺជាការចាប់ផ្ដើមដំបូង ដើម្បីធ្វើយ៉ាងណាឱ្យរថយន្តដឹកអ្នកដំណើរភ្នំពេញ-ក្រុងព្រះសីហនុឆ្លងកាត់ ឬប្រើប្រាស់ផ្លូវល្បឿនលឿនឱ្យបានច្រើន ។
លោកបន្តថា ៖
“កិច្ចសហការជាលើកដំបូងនេះ ក្រុមហ៊ុនផ្លូវល្បឿនលឿននឹងសម្របសម្រួលទៅលើសេវាមួយចំនួន ដូចជាការខូចខាតរថយន្តនៅលើផ្លូវល្បឿនលឿនជាដើម ហើយបន្តបន្ទាប់ក្រុមហ៊ុននឹងធ្វើការជាមួយសមាគមដឹកជញ្ជូនអ្នកដំណើរផ្លូវគោកកម្ពុជាឱ្យកាន់តែស៊ីជម្រៅក្នុងការបញ្ចុះតម្លៃដល់ក្រុមហ៊ុនដឹកអ្នកដំណើរនានាដែលជាសមាជិករបស់សមាគម”
តំណាងក្រុមហ៊ុនផ្លូវល្បឿនលឿនភ្នំពេញ-ក្រុងព្រះសីហនុ បានឱ្យដឹងថា ក្រុមហ៊ុនផ្លូវល្បឿនលឿនភ្នំពេញ-ក្រុងព្រះសីហនុនឹងបញ្ចុះតម្លៃ ២៥ភាគរយដល់ក្រុមហ៊ុនដឹកអ្នកដំណើរដែលជាសមាជិករបស់សមាគមដឹកជញ្ជូនអ្នកដំណើរផ្លូវគោកកម្ពុជាដែលមានរថយន្តឆ្លងកាត់ចាប់ពី៣០គ្រឿងដល់១០០គ្រឿង ហើយចាប់ពី១០១គ្រឿងក្នុងមួយថ្ងៃឡើងទៅ ក្រុមហ៊ុនផ្លូវល្បឿនលឿននឹងបញ្ចុះតម្លៃ ៣០ភាគរយនៃតម្លៃសេវាសរុប ។
តំណាងក្រុមហ៊ុនផ្លូវល្បឿនលឿនភ្នំពេញ-ក្រុងព្រះសីហនុរូបនេះបានបន្តថា ៖
“កិច្ចសហការរវាងក្រុមហ៊ុននិងសមាគមនឹងអាចជួយជំរុញឱ្យផ្លូវល្បឿនលឿនភ្នំពេញ ក្រុងព្រះសីហនុមានយានយន្តឆ្លងកាត់កាន់តែច្រើនឡើងបន្ថែមទៀត ហើយវាក៏បានជួយដល់សេដ្ឋកិច្ចរបស់ប្រទេសកម្ពុជាមានសន្ទុះមួយកម្រិតទៀតផងដែរ ដោយក្រុមហ៊ុនដឹកអ្នកដំណើរអាចដឹកភ្ញៀវរបស់ខ្លួនទៅកាន់គោលដៅបានទាន់ពេលវេលា”
ឯកឧត្តម ស៊ុន ចាន់ថុល ទេសរដ្ឋមន្ត្រី និងជារដ្ឋមន្ត្រីក្រសួងសាធារណការ និងដឹកជញ្ជូនបានមានប្រសាសន៍កោតសរសើរដល់ក្រុមហ៊ុនផ្លូវល្បឿនលឿន និងសមាគមដែលបានរកដំណោះស្រាយក្នុងការជួយគ្នាទៅវិញទៅមកដោយក្នុងនោះគឺភាគីទាំងត្រូវរកដំណោះស្រាយឈ្នះឈ្នះទាំងសងខាង ។
ឯកឧត្តមបន្តថា ៖
“កិច្ចសហការនេះនឹងអាចជួយដល់ក្រុមហ៊ុនដឹកអ្នកដំណើរនិងការសន្សំប្រាក់កម្រៃបានមួយកម្រិតទៀត ពីព្រោះថាបើសិនជាក្រុមហ៊ុនផ្លូវល្បឿនលឿនយកថ្លៃពេកធ្វើឱ្យក្រុមហ៊ុនដឹកអ្នកដំណើរមិនអាចរកប្រាក់ចំណេញបាន ឬក៏រត់មិនរួច តែបើសិនជាក្រុមហ៊ុនផ្លូវល្បឿនលឿនយកកម្រៃសេវាទាបពេកក៏នឹងមិនធ្វើឱ្យក្រុមហ៊ុនផ្លូវល្បឿនលឿនរកប្រាក់ចំណេញ ឬក៏រត់មិនរួចដូចគ្នា”
ឯកឧត្តមបានបញ្ជាក់ថា ក្រៅពីផ្លូវល្បឿនលឿនភ្នំពេញ-ក្រុងព្រះសីហនុ កម្ពុជាគ្រោងនឹងសាងសង់ផ្លូវល្បឿនលឿនមួយទៀតតភ្ជាប់ពីភ្នំពេញទៅបាវិត និងកំពុងជំរុញឱ្យមានការសិក្សាផ្លូវល្បឿនលឿនភ្នំពេញសៀមរាបផងដែរ ។ ក្រៅពីនេះ កម្ពុជាក៏កំពុងស្វែងរកដៃគូវិនិយោគ លើគម្រោងផ្លូវដែកល្បឿនលឿនភ្នំពេញ ប៉ោយប៉ែតដែលគ្រោងនឹងចំណាយថវិកាប្រមាណ៤ពាន់លានដុល្លារអាមេរិក ៕
Account
Security
Favourite Content