ភ្នំពេញ ៖ បច្ចុប្បន្ននេះ បច្ចេកវិទ្យាហិរញ្ញវត្ថុ (Fintech) បាន និងកំពុងដើរតួនាទីយ៉ាងសំខាន់សម្រាប់ជីវភាពប្រចាំថ្ងៃរបស់ប្រជាជនលើពិភពលោក ក្នុងនោះដែរប្រជាជនកម្ពុជា ក៏បាន និងកំពុងទទួលយកនូវការប្រើប្រាស់បច្ចេកវិទ្យាហិរញ្ញវត្ថុ ជាពិសេសការប្រើកម្មវិធីធនាគារចល័តក្នុងការធ្វើប្រតិបត្តិការសាច់ប្រាក់គ្រប់ពេលវេលា និងគ្រប់ទីកន្លែង។

ឃើញដូច្នេះ ធនាគារ ហត្ថា បាននាំមកនូវបច្ចេកវិទ្យាឌីជីថលចុងក្រោយបំផុតក្នុងការរចនាកម្មវិធីធនាគារចល័ត ឬកម្មវិធី Hattha Mobile ដែលអភិវឌ្ឍន៍ដោយស្នាដៃកូនខ្មែរ ដោយផ្តោតបទពិសោធន៍របស់អតិថិជន បង្កើនភាពងាយស្រួលជូនដល់អតិថិជនជាចម្បង និងអាចឱ្យអតិថិជនធ្វើប្រតិបត្តិការសាច់ប្រាក់ គ្រប់ពេលវេលា និងគ្រប់ទីកន្លែង តាមរយៈការប្រើប្រាស់ទូរសព្ទស្មាតហ្វូនរបស់ពួកគេ ។

លោក ឡេង វ៉ាន់ឌី នាយក នាយកដ្ឋានឌីជីថលប៊ែងឃីង នៃធនាគារ ហត្ថា បានឱ្យដឹងថា បច្ចុប្បន្ន កម្មវិធី Hattha Mobile ត្រូវបានអភិវឌ្ឍន៍ដល់ជំនាន់ ៣.០ បន្ទាប់ពី ធនាគារ ហត្ថា បានអភិវឌ្ឍន៍ជំនាន់ទី ១ និងទី ២ កន្លងមក ដោយ Hattha Mobile ជំនាន់មុនៗ ត្រូវបានអភិវឌ្ឍន៍ដោយធនធានក្រៅប្រទេស ខណៈ Hattha Mobile ជំនាន់ចុងក្រោយនេះ ត្រូវបានអភិវឌ្ឍន៍ដោយកូនខែ្មរក្នុងស្រុកផ្ទាល់តែម្តង។

លោកបានថ្លែងបន្តថា ៖

“Hattha Mobile ជំនាន់ចុងក្រោយនេះ ឬ ជំនាន់ ៣.០ នេះ យើងទើបតែបញ្ចេញឱ្យប្រើប្រាស់នៅដើមខែមករា ឆ្នាំ២០២៣ នេះ ហើយ Hattha Mobile ជំនាន់ចុងក្រោយនេះ យើងងាយស្រួលគ្រប់គ្រង ដោយសារយើងអភិវឌ្ឍន៍វាដោយខ្លួនឯង”

ក្នុងន័យនេះ លោកចង់បង្ហាញថា ការប្រើប្រាស់ Hattha Mobile ក្នុងប្រព័ន្ធប្រត្តិការទូទាត់ មានភាពងាយស្រួល និងសុវត្ថិភាពខ្ពស់ ដោយសារតែកូនខ្មែរអភិវឌ្ឍន៍កម្មពិធីនេះដោយផ្ទាល់ ហើយអភិវឌ្ឍន៍ស្គាល់ច្បាស់ពីតម្រូវការប្រើប្រាស់របស់អតិថិជន។

តាមពិតទៅ ធនាគារ ហត្ថា បានចាប់យកបច្ចេកវិទ្យាហិរញ្ញវត្ថុចាប់តាំងពីឆ្នាំ ២០១២ ដែលពេលនោះ ខ្លួននៅជាគ្រឹះស្ថានមីក្រូហិរញ្ញវត្ថុនៅឡើយ ហើយនៅពេលគ្រឹះស្ថានបានប្រែក្លាយខ្លួនទៅជាធនាគារនៅឆ្នាំ២០២០ ធនាគារ ហត្ថា បានធ្វើបច្ចុប្បន្នភាពលើ Hattha Mobile របស់ខ្លួន មកជំនាន់ចុងក្រោយ ដែលហៅថា ជំនាន់ ៣.០ អាចធ្វើឱ្យអតិថិជនកាន់តែមានភាពជិតស្និទ្ធជាមួយធនាគារ។

លោក ឡេង វ៉ាន់ឌី បានបញ្ជាក់ថា ៖

“នៅក្នុងសម័យកាលនេះ គឺសម័យកាលឌីជីថល យើងចង់ឱ្យអតិថិជនកាន់តែមានភាពជិតស្និទ្ធជាមួយធនាគារ ព្រោះនៅពេលគាត់មកកាន់សាខា គាត់ត្រូវចំណាយពេលច្រើន ប៉ុន្តែនៅពេលមានកម្មវិធី Hattha Mobile អតិថិជននឹងទទួលបានសេវាកម្មជាច្រើននៅកម្មវិធីផ្ទាល់ រាប់ចាប់តាំងពីការទូទាត់ និងការស្កែន KH QR Code ជាដើម។”

លោកបានថ្លែងបន្តថា កម្មវិធី Hattha Mobile ជំនាន់ចុងក្រោយនេះ គឺត្រូវបានអភិវឌ្ឍន៍ និងធ្វើបច្ចុប្បន្នភាពដោយផ្តោតលើសុវត្ថិភាព និងឯកជនភាពសម្រាប់អតិថិជន។

ជាមួយគ្នានេះ ដើម្បីសម្រួលដល់ការរស់នៅរបស់ប្រជាជនកម្ពុជាក្នុងការធ្វើប្រតិបត្តិការសាច់ប្រាក់ និងអាចសន្សំសំចៃពេលវេលា មានភាពកាន់តែងាយស្រួល ហើយរហ័សក្នុងយុគសម័យបច្ចេកវិទ្យាជឿនលឿន ធនាគារ ហត្ថា បាននាំមកនូវបច្ចេកវិទ្យាឌីជីថលចុងក្រោយបំផុត គឺកម្មវិធី Hattha Mobile ដែលអាចឱ្យអតិថិជនធ្វើប្រតិបត្តិការសាច់ប្រាក់បានគ្រប់ពេលវេលា គ្រប់ទីកន្លែង លឿនរហ័ស តាមរយៈទូរសព្ទស្មាតហ្វូនតែម្ដង។

លោក ឡេង វ៉ាន់ឌី បានថ្លែងថា បច្ចុប្បន្ន Hattha Mobile App ជំនាន់ក្រោយនេះ ត្រូវបានអភិវឌ្ឍន៍ឡើងដោយផ្តោតបទពិសោធន៍របស់អតិថិជន ហើយនឹងបង្កើនភាពងាយស្រួលជូនដល់អតិថិជនជាចម្បង។

លោកបានថ្លែងបន្តថា ៖

“បន្ទាប់ពីធនាគារ ហត្ថា បានអភិវឌ្ឍន៍កម្មវិធី Hattha Mobile ដែលប្រើប្រាស់បច្ចេកវិទ្យាឌីជីថលចុងក្រោយបំផុតក្នុងការរចនាកម្មវិធីធនាគារចល័តនេះរួចមក គ្រប់អតិថិជនរបស់យើងបានផ្តល់មតិយល់ឃើញ (Feedback) ល្អៗ និងពេញចិត្តជាមួយភាពងាយស្រួលក្នុងការប្រើប្រាស់ កម្មវិធី Hattha Mobile។”

លោកបន្តថា ៖

“អតិថិជនអាចប្រើប្រាស់សេវាធនាគារសំខាន់ៗតាមរយៈកម្មវិធី Hattha Mobile ដូចជា ត្រួតពិនិត្យសមតុល្យគណនី ទាញយក និងព្រីនរបាយការណ៍គណនី ផ្ទេរប្រាក់ (ទៅកាន់គណនីធនាគារ ហត្ថា ដូចគ្នា ឬ ធនាគារដទៃ) ផ្ទេរប្រាក់ទៅកាន់ម៉ាស៊ីនអេធីអឹម បញ្ចូលលុយទូរសព្ទ បង់វិក្កយបត្រ ទូទាត់ចំណាយតាម KHQR មុខងារ KHQR ID និងមុខងារសំខាន់ៗជាច្រើនទៀត។”

សូមបញ្ជាក់ផងដែរថា ធនាគារ ហត្ថា ប្រើប្រាស់បច្ចេកវិទ្យាឌីជីថលចុងក្រោយបំផុតក្នុងការរចនាកម្មវិធីធនាគារចល័ត ដែលអាចឱ្យអតិថិជនធ្វើប្រតិបត្តិការសាច់ប្រាក់គ្រប់ពេលវេលា និងគ្រប់ទីកន្លែង តាមរយៈទូរសព្ទស្មាតហ្វូនរបស់ពួកគេ។ កម្មវិធី Hattha Mobile នាំមកនូវបទពិសោធនៃការប្រើប្រាស់ដ៏ងាយស្រួលដែលអនុញ្ញាតឱ្យអតិថិជនកំណត់មុខងារកម្មវិធីតាមតម្រូវការផ្ទាល់ខ្លួន ហើយថែមទាំងផ្ដល់ជូនមុខងារយ៉ាងសម្បូរបែបសម្រាប់ការគ្រប់គ្រងសាច់ប្រាក់ប្រកបដោយប្រសិទ្ធភាព និងសុវត្ថិភាពកម្រិតខ្ពស់ ដែលនាំមកនូវសុវត្ថិភាពផ្លូវចិត្ត និងភាពរីករាយក្នុងការប្រើប្រាស់មុខងារទាំងអស់នោះដោយឥតគិតថ្លៃ។

សូមចាប់ផ្តើមប្រើប្រាស់ Hattha Mobile ដោយអនុវត្តតាមជំហានងាយៗដូចជា ៖ · បើកគណនីសន្សំជាមួយ ធនាគារ ហត្ថា ហើយភ្ជាប់គណនីនោះជាមួយលេខទូរសព្ទរបស់អ្នក · ទាញយក Hattha Mobile តាម App Store ឬ Play Store · បើក Hattha Mobile រួចអនុវត្តតាមជំហានងាយៗដើម្បីចុះឈ្មោះ · ការចុះឈ្មោះរបស់អ្នករួចរាល់ត្រឹមតែប៉ុន្មាននាទីប៉ុណ្ណោះ៕