សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្រុមហ៊ុន MinebeaMitsumi Co.,Ltd ដែលជាក្រុមហ៊ុនរបស់ប្រទេសជប៉ុន បានចាប់ផ្ដើមធ្វើសកម្មភាពវិនិយោគនៅក្នុងប្រទេសកម្ពុជាចាប់ពីឆ្នាំ២០១១ ហើយរហូតមកដល់បច្ចុប្បន្ននេះ ក្រុមហ៊ុន មួយនេះបានបណ្ដាក់ទុនវិនិយោគនៅកម្ពុជាសរុបជាទឹកប្រាក់ចំនួន ៧២៥លានដុល្លារអាម៉េរិក ។ នេះបើតាមការបញ្ជាក់របស់លោក Yoshihisa KAINUMA អគ្គនាយកក្រុមហ៊ុន MinebeaMitsumi Co.,Ltd ។
នៅក្នុងជំនួបជាមួយឯកឧត្តម ជា វុទ្ធី អគ្គលេខាធិការគណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា កាលពីចុងសប្ដាហ៍កន្លងទៅនេះ លោក Yoshihisa KAINUMA បានឱ្យដឹងថា ក្រុមហ៊ុន MinebeaMitsumi Co., Ltd បានបណ្តាក់ទុនវិនិយោគនៅកម្ពុជាចាប់តាំងពីឆ្នាំ២០១១មក និងបានពង្រីកសកម្មភាពវិនិយោគរបស់ខ្លួនជាបន្តបន្ទាប់ ពោលគឺពីរោងចក្រទី១ ដល់រោងចក្រទី៣ ក្នុងតំបន់សេដ្ឋកិច្ចពិសេស រ៉ូយ៉ាល់ គ្រុប ភ្នំពេញ ជាមួយទុនវិនិយោគសរុបប្រមាណ ៧២៥ លានដុល្លារអាម៉េរិក ហើយនាពេលនេះ រោងចក្រទី៤ ដែលស្ថិតក្នុងគម្រោងទី២ នៅក្នុងតំបន់សេដ្ឋកិច្ចពិសេស ពោធិ៍សាត់ បាននិងកំពុងបញ្ចប់ការសាងសង់អគាររោងចក្រ ហើយក៏កំពុងបំពាក់គ្រឿងម៉ាស៊ីន សម្ភារៈបរិក្ខារផលិតកម្ម ហើយគ្រោងនឹងចាប់ផ្តើមដំណើរការផលិតកម្មនៅក្នុងខែតុលា ខាងមុខនេះ។
លោកបានបន្តថា ទោះស្ថិតក្នុងបរិការណ៍នៃភាពមិនច្បាស់លាស់នៃសេដ្ឋកិច្ចសាកល និងបញ្ហាប្រឈមនានា ក៏ដំណើរការវិនិយោគរបស់ក្រុមហ៊ុននៅកម្ពុជានៅតែបន្តដំណើរទៅមុខឥតងាករេ ហើយជាមួយគ្នានេះ បងប្អូនកម្មករនិយោជិតរបស់ក្រុមហ៊ុនប្រមាណជិត ៩ពាន់នាក់ បាន និងកំពុងអភិវឌ្ឍជំនាញរបស់ខ្លួនលើការផលិតសម្ភារៈបរិក្ខារអេឡេចត្រូនិក បរិក្ខារអគ្គិសនី និងគ្រឿងបង្គុំរថយន្ត ។
ឯកឧត្តម ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា បានវាយតម្លៃខ្ពស់ចំពោះក្រុមហ៊ុន MinebeaMitsumi Co., Ltd ដែលបានពង្រីកប្រតិបត្តិការនៅកម្ពុជាជាបន្តបន្ទាប់ ព្រមទាំងបានផ្តល់ការបណ្តុះបណ្តាលជំនាញដល់បងប្អូនកូនក្មួយកម្មករនិយោជិតកម្ពុជា និងបានកោតសរសើរចំពោះវឌ្ឍនភាពនៃការសាងសង់រោងចក្រទី៤របស់ក្រុមហ៊ុន។ ជាមួយគ្នានេះ ឯកឧត្តម ក៏បានអះអាងសាជាថ្មីអំពីការគាំទ្ររបស់ក្រុមប្រឹក្សាអភិវឌ្ឍន៍កម្ពុជាចំពោះគម្រោងវិនិយោគរបស់ក្រុមហ៊ុន និងបានជូនពរឱ្យអាជីវកម្មរបស់ក្រុមហ៊ុនទទួលបានជោគជ័យ។
គួររម្លឹកថា ជប៉ុន គឺជាវិនិយោគិនដែលមានភាពស្មោះត្រង់ ហើយប្រទេសនានានៅលើពិភពលោកតែងតែចង់បានវិនិយោគិនជប៉ុនចូលទៅបណ្ដាក់ទុនវិនិយោគនៅក្នុងប្រទេសរបស់គេ ។ សម្រាប់កម្ពុជា ការវិនិយោគរបស់ជប៉ុនក៏តែងតែទទួលបានការគាំទ្រពីពលរដ្ឋកម្ពុជាផងដែរ ជាក់ស្ដែងគម្រោងផ្សារទំនើបអ៊ីអន គឺមានការគាំទ្រពីពលរដ្ឋកម្ពុជាយ៉ាងកុះកររហូតដល់មានការបង្កើតផ្សារទំនើបនេះ រហូតដល់៣កន្លែងនៅរាជធានីភ្នំពេញ ។
ក្រៅពីនេះ ក៏មានគម្រោងវិនិយោគធំៗរបស់ប្រទេសជប៉ុនកំពុងរីកដុះដាលនៅកម្ពុជា ដូចជាគម្រោងអភិវឌ្ឍន៍អគារខ្ពស់ៗ អគារពាណិជ្ជកម្ម ខុនដូ និងការិយាល័យ មន្ទីរពេទ្យ ជាដើម ដែលបានចូលរួមចំណែកដល់ការទាក់ទាញគម្រោងវិនិយោគបរទេសផ្សេងទៀតចូលមកក្នុងប្រទេសកម្ពុជា ។
ដោយឡែក សម្រាប់ក្រុមហ៊ុនជប៉ុន Minebea សម្ដេចតេជោ ហ៊ុន សែន ប្រធានព្រឹទ្ធសភាកម្ពុជា ធ្លាប់បានលើកឡើងថា ក្រុមហ៊ុននេះនឹងបន្តដាក់ទុននៅកម្ពុជា ហើយជាក្រុមហ៊ុនដៃគូវិនិយោគយូរអង្វែង ដែលនឹងបង្កើតការងារជាច្រើនទៀតដល់ពលរដ្ឋកម្ពុជា ជាមួយការទទួលបានប្រាក់ចំណូល និងជំនាញបន្ថែម៕
Account
Security
Favourite Content