ភ្នំពេញ ៖ ខ្លឹមសារនៃសេចក្តីថ្លែងការណ៍រួមរវាងធនាគារជាតិនៃកម្ពុជា និងអង្គការសហប្រជាជាតិប្រចាំនៅកម្ពុជា កាលពីពេលថ្មីៗនេះឱ្យដឹងថា ភាគីទាំងពីរបានប្រកាសហាមឃាត់ការប្រើប្រាស់បណ្ណកម្មសិទ្ធិដីធ្លីរបស់សហគមន៍ជនជាតិដើមភាគតិច ធ្វើជាទ្រព្យធានា និងការទប់ស្កាត់ការលក់ដោយបង្ខំនូវបណ្ណកម្មសិទ្ធិទាំងនោះ។ បច្ចុប្បន្នគ្រឹះស្ថានធនាគារ និងហិរញ្ញវត្ថុ អាចពិនិត្យមើលតាមប្រព័ន្ធអនឡាញនូវព័ត៌មានលើបណ្ណកម្មសិទ្ធិ ដែលត្រូវបានចុះបញ្ជីជាបណ្ណកម្មសិទ្ធិដីធ្លី របស់សហគមន៍ជនជាតិដើមភាគតិច និងដីជាកម្មសិទ្ធិរដ្ឋ ដែលត្រូវបានហាមឃាត់ដោយច្បាប់ក្នុងការប្រើប្រាស់ជាទ្រព្យធានា។

លោក សុខ ចាន់ នាយកបរិយាបន្នហិរញ្ញវត្ថុ និងទំនាក់ទំនងសាធារណៈ នៃសមា​គមធនាគារនៅកម្ពុជាបានឱ្យដឹងថា ដីសហគមន៍ជនជាតិដើមភាគតិច គឺជាកម្មសិទ្ធិសមូលហភាព ហើយសហគមន៍នោះគ្មានសិទ្ធិចាត់ចែងនូវចំណែកណាមួយនៃកម្មសិទ្ធិសមូហភាពដែលជាទ្រព្យសម្បត្តិសាធារណៈរបស់រដ្ឋទៅឱ្យបុគ្គល ឬក្រុមណាមួយបានឡើយ។ ហេតុដូច្នេះ ការទទួលយកដីសហគមន៍ជនជាតិដើមភាគតិច ជាទ្រព្យធានាគឺផ្ទុយនឹងបញ្ញត្តិនៃច្បាប់ភូមិបាល។ ជាក់ស្តែងរាល់កម្ចីតែងតែមានមានទ្រព្យធានា ជាពិសេសអចលនវត្ថុ​ ប្រសិនជាការយកដីសមូហភាពមកធ្វើជាទ្រព្យធានាឥណទាន ក្នុងករណីមានបញ្ហា ឬជម្លោះកើតឡើងជាយថាហេតុរវាងគ្រឹះស្ថានហិរញ្ញវត្ថុផ្តល់សេវា និងកូនបំណុល ការដោះស្រាយបំណុលទៅលើទ្រព្យធានាដែលជាដីសហគមន៍ជនជាតិដើមភាគតិចនឹងជួបការលំបាក។

ក្នុងយន្តការនៃកិច្ចសន្ទនាកម្រិតខ្ពស់រវាងពហុភាគីពាក់ព័ន្ធស្តីពីមីក្រូហិរញ្ញវត្ថុនៅកម្ពុជា ដែលដឹកនាំដោយអង្គការសហប្រជាជាតិប្រចាំកម្ពុជា និងធនាគារជាតិនៃកម្ពុជា បានឯកភាព និងដាក់ចេញនូវការពង្រឹងការផ្តល់កម្ចីប្រកបដោយការទទួលខុសត្រូវ ដោយក្នុងនោះ​ការមិនទទួលយកបណ្ណកម្មសិទ្ធិដីធ្លីរបស់សហគមន៍ជន​ជាតិដើមភាគតិចជា​ទ្រព្យ​ធានា និងទប់​ស្កាត់​ការលក់ដោយ​បង្ខំនូវបណ្ណកម្មសិទិ្ធទាំងនោះ។ ការណីនេះ គឺដើម្បីធានាឱ្យវិស័យធនាគារ និងហិរញ្ញវត្ថុ មានភាពរឹងមាំ និរន្តរភាព ការទទួលខុសត្រូវខ្ពស់ និងកិច្ចការពារអតិថិជន។

លោក សុខ ចាន់ បញ្ជាក់បន្ថែមថា ស្របតាមយុទ្ធសាស្រ្តជាតិស្តីពីបរិយាបន្នហិរញ្ញវត្ថុឆ្នាំ ២០១៩-២០២៥ ដើម្បីលើកកម្ពស់ការទទួលបានសេវាហិរញ្ញវត្ថុផ្លូវការ គ្រឹះស្ថានធនាគារ និងហិរញ្ញវត្ថុ បានពង្រីកប្រតិបត្តិការខ្លួន និងគ្របដណ្តប់ស្ទើរតែគ្រប់ឃុំ ក្រុង ស្រុក ខេត្តនិងតំបន់ និងខេត្តដាច់ស្រយាល ជាពិសេសខេត្តនៅភាគឦសាននៃប្រទេសកម្ពុជា ដោយទទួលស្គាល់ថា មានការឆកល្វែងមួយចំនួនចំពោះការផ្តល់សេវាហិរញ្ញវត្ថុ។ ជាក់ស្តែងនៅខេត្តភូមិភាគឦសាននៃប្រទេសកម្ពុជា ដូចជាខេត្តរតនគិរី ជាដើម។

យោងតាមតួលេខពីក្រុមហ៊ុន ក្រេឌីត ប្យូរ៉ូ ខេមបូឌា ការសងត្រឡប់មិនទាន់ពេលរយៈពេល ៣០​ថ្ងៃនៅខេត្តរតនគិរីមានមានប្រមាណជា ៥%នៅឆ្នាំ២០២៣។ ប៉ុន្តែអាត្រានេះនៅមានគុណភាពល្អ និងអាចគ្រប់គ្រងបាន។ ជាធម្មតាការជួបផលលំបាកក្នុងការសងត្រឡប់ឥណទានតែងតែកើតមានឡើង ប្រសិនបើអតិថិជនមានការប្រឈមនូវការប្រែប្រួលប្រាក់ចំណូល ឬប្រាក់ចំណូលធ្លាក់ចុះ ឬចំណូលមិនទៀងទាត់ ដោយសារការជួបប្រទះនូវប្រធានស័ក្តិ ដូចជា កត្តាអាកាសធាតុ រួមមាន គ្រោះរាំងស្ងួត គ្រោះទឹកជំនន់ និងជំងឺកូវីដ-១៩ជាដើម។ យ៉ាងណាក្តី ស្របតាមយុទ្ធសាស្រ្តជាតិស្តីពីបរិយាបន្នហិរញ្ញវត្ថុ និងមានការគាំទ្រពីអាជ្ញាធរខេត្ត គ្រឹះស្ថានធនាគារអាចពង្រីកប្រតិបត្តិការទូលំទំលាយទៅដល់ទីជនបទ ហើយគ្រឹះស្ថានធនាគារមួយចំនួន ក៍បានពង្រីកប្រតិបត្តិការរបស់ខ្លួន និងជាពិសេសបម្រើសេវាដល់បងប្អូនជនជាតិភាគតិចខ្លះៗដែរ។

បន្ថែមពីនេះ ដើម្បីជំរុញបរិយាបន្នហិរញ្ញវត្ថុ លើកកម្ពស់ការទទួលបានសេវាហិរញ្ញវត្ថុផ្លូវការពីសំណាក់បងប្អូនជនជាតិដើមភាគតិច សមាគមធនាគារ ក៏បានដាក់ចេញនូវសកម្មភាពមួយចំនួនក្នុងកាលើកកម្ពស់អក្ខរកម្មហិរញ្ញវត្ថុដល់ប្រជាពលរដ្ឋនៅខេត្តរតនគិរី ជាពិសេសបងប្អូនជនជាតិភាគតិចផងដែរ ដើម្បីឱ្យពួកគាត់ប្រើប្រាស់សេវាធនាគារ និងហិរញ្ញវត្ថុប្រកបដោយប្រសិទ្ធភាពនិងរីកចម្រើន៕ វិន ឈុនហ៊ាត