សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ការចូលជាធរមាននូវកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP) និងគំនិតផ្តួចផ្តើមខ្សែក្រវាត់-ផ្លូវ (BRI) ត្រូវបានអ្នកសិក្សាស្រាវជ្រាវសេដ្ឋកិច្ចធ្វើការកត់សម្គាល់ថា គឺជាអ្នករួមចំណែកយ៉ាងសំខាន់ដល់កិច្ចខិតខំប្រឹងប្រែងស្តារសេដ្ឋកិច្ចក្នុងតំបន់ និងសកល។
ថ្លែងក្នុងសន្និសីទអន្តរជាតិប្រចាំឆ្នាំលើកទី១៧ ស្តីពី «សណ្តាប់ធ្នាប់ពិភពលោកថ្មី៖ ការប្រកួតប្រជែង សមាហរណកម្ម និងពហុប៉ូឡា» សេដ្ឋវិទូជាន់ខ្ពស់ លោកបណ្ឌិត គី សេរីវឌ្ឍន៍ ប្រធានវិទ្យាស្ថានសិក្សាចិននៃរាជបណ្ឌិត្យសភាកម្ពុជា បានថ្លែងអំពីការរួមចំណែករបស់ RCEP និង BRI ថាបានរួមចំណែកយ៉ាងខ្លាំងដល់កិច្ចខិតខំប្រឹងប្រែងស្តារសេដ្ឋកិច្ចក្នុងតំបន់ និងសកល ដោយការផ្តល់លទ្ធភាពទទួលបានទីផ្សារកាន់តែធំ សម្រាប់ប្រទេសចូលរួមទាំងអស់ជាមួយការអនុគ្រោះពន្ធ។
លោកបណ្ឌិតបានមានប្រសាសន៍ថា ៖
“កិច្ចព្រមព្រៀងពាណិជ្ជកម្មក្នុងតំបន់នេះរក្សាទីផ្សារបើកចំហ ពង្រឹងសមាហរណកម្មសេដ្ឋកិច្ចក្នុងតំបន់ គាំទ្រដល់ប្រព័ន្ធពាណិជ្ជកម្មដោយបើកចំហ ដោយសេរី យុត្តិធម៌ និងបរិយាប័ន្ន ហើយចុងក្រោយ រួមចំណែកដល់កិច្ចខិតខំប្រឹងប្រែងស្តារឡើងវិញជាសកល”
លោកបណ្ឌិតបានថ្លែងបន្ថែមថា RCEP បានលើកកម្ពស់កិច្ចសហប្រតិបត្តិការក្នុងតំបន់កាន់តែខ្លាំងនៅក្នុងវិស័យពាណិជ្ជកម្ម និងការវិនិយោគ រួមជាមួយនឹងការបន្ធូរបន្ថយចលនាឆ្លងព្រំដែន។ មិនតែប៉ុណ្ណោះ វាបានជួយបង្កើតឱកាសអាជីវកម្ម និងការងារថ្មីៗ ពង្រឹងខ្សែច្រវាក់ផ្គត់ផ្គង់ក្នុងតំបន់ និងលើកកម្ពស់ការចូលរួមរបស់សហគ្រាសធុនមីក្រូតូច និងមធ្យម នៅក្នុងខ្សែច្រវាក់តម្លៃក្នុងតំបន់ និងមជ្ឈមណ្ឌលផលិតកម្ម។ សូមបញ្ជាក់ថា ការចូលជាធរមាននៅដើមឆ្នាំនេះ កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP) មានបណ្តាប្រទេសអាស៊ីប៉ាស៊ីហ្វិកចំនួន ១៥ រួមទាំងរដ្ឋសមាជិកអាស៊ានចំនួន ១០ និងដៃគូពាណិជ្ជកម្មចំនួន ៥ គឺប្រទេសចិន ជប៉ុន កូរ៉េខាងត្បូង អូស្ត្រាលី និងនូវែលសេឡង់។
យោងតាមធនាគារពិភពលោក RCEP គ្របដណ្តប់លើប្រជាជន ២.៣ ពាន់លាននាក់ ឬ ៣០ភាគរយនៃចំនួនប្រជាជនពិភពលោក រួមចំណែក ២៥.៨ ពាន់ពាន់លានដុល្លារអាមេរិកប្រហែល ៣០ភាគរយនៃផលិតផលក្នុងស្រុកសរុបពិភពលោក និងមានចំនួន ១២.៧ ពាន់ពាន់លានដុល្លារ ជាងមួយភាគបួននៃពាណិជ្ជកម្មពិភពលោកលើទំនិញ និងសេវាកម្ម។
លោក Joseph Matthews សាស្ត្រាចារ្យជាន់ខ្ពស់នៅសាកលវិទ្យាល័យ ប៊ែលធី អន្តរជាតិ នៅទីក្រុងភ្នំពេញ បានថ្លែងថា ប្លុកពាណិជ្ជកម្មដ៏ធំបំផុតរបស់ពិភពលោកបានផ្តល់ផលប្រយោជន៍ទៅវិញទៅមក និងកិច្ចសហប្រតិបត្តិការឈ្នះ-ឈ្នះ សម្រាប់ប្រទេសដែលចូលរួមទាំងអស់។ RCEP មិនត្រឹមតែបានលើកកម្ពស់ការធ្វើសមាហរណកម្មសេដ្ឋកិច្ចក្នុងតំបន់កាន់តែធំប៉ុណ្ណោះទេ ប៉ុន្តែថែមទាំងបានគូសបញ្ជាក់ពីការប្តេជ្ញាចិត្តឥតងាករេរបស់ប្រទេសសមាជិកទាំងអស់ចំពោះពាណិជ្ជកម្មសេរី និងពហុភាគីនិយម។ លោក Matthews ក៏បានលើកឡើងថា BRI បានដើរតួនាទីយ៉ាងសំខាន់ក្នុងការជួយប្រទេសនានាក្នុងការទប់ទល់នឹងការធ្លាក់ចុះសេដ្ឋកិច្ច។ BRI នឹងក្លាយជាក្បាលម៉ាស៊ីនថ្មីនៃកំណើនសេដ្ឋកិច្ចពិភពលោក។ វានឹងបន្តជំរុញកិច្ចសហប្រតិបត្តិការក្នុងតំបន់ និងសកលទាក់ទងនឹងហេដ្ឋារចនាសម្ព័ន្ធរឹង និងទន់ សេដ្ឋកិច្ច ពាណិជ្ជកម្ម ឱកាសវិនិយោគ ការផ្លាស់ប្តូរវប្បធម៌ និងការតភ្ជាប់រវាងប្រជាជន និងប្រជាជន៕
Account
Security
Favourite Content