សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងតាមប្រភពព័ត៌មានពីរ៉យទ័របានរាយការណ៍ថា តម្លៃប្រេងម៉ាស៊ូតពិភពលោកបានឡើងថ្លៃដល់កម្រិតខ្ពស់ក្នុងរយៈពេលជិត ៣ ខែ ខណៈពេលដែលមានការរំខានដល់ការដឹកជញ្ជូនកំពុងគំរាមកំហែងដល់សេដ្ឋកិច្ចសហភាពអឺរ៉ុប។
ពាណិជ្ជករកំពុងព្រួយបារម្ភថា ភាពចលាចលនៅសមុទ្រក្រហមនឹងធ្វើឱ្យតម្លៃប្រេងឥន្ធនៈថ្លៃសម្រាប់អ្នកប្រើប្រាស់ និងបង្កភាពរំខានដល់ការផ្គត់ផ្គង់សំខាន់ៗពីអាស៊ីទៅកាន់សហភាពអឺរ៉ុប ដែលជាអ្នកនាំចូលផលិតផលប្រេងចម្រាញ់ដ៏ធំបំផុតមួយរបស់ពិភពលោក។ ទន្ទឹមនឹងនេះ តម្លៃប្រេងម៉ាស៊ូតនៅលើទីផ្សារបានកើនឡើង ១៥ ភាគរយ ឬ ៨៤៥ ដុល្លារក្នុងមួយតោន។ ចាប់តាំងពីការដាក់ទណ្ឌកម្មរបស់លោកខាងលិចលើផលិតផលប្រេងឆៅ និងចម្រាញ់របស់រុស្ស៊ីចូលជាធរមានក្នុងឆ្នាំ២០២២ មក សហភាពអឺរ៉ុបបានពឹងផ្អែកយ៉ាងខ្លាំងលើការនាំចូលពីអាស៊ី និងសហរដ្ឋអាមេរិក។ ឥឡូវនេះ កប៉ាល់ដឹកប្រេងជាច្រើនបានគេចពីផ្លូវសមុទ្រក្រហម ដែលធ្វើឲ្យការដឹកជញ្ជូនប្រេងម៉ាស៊ូតពីអាស៊ីទៅកាន់សហភាពអឺរ៉ុបពីមានតម្លៃថ្លៃជាងមុន។ ការឡើងថ្លៃជំរុញដោយកត្តាជាច្រើនដូចជា ការឡើងថ្លៃតម្លៃទំនិញ តម្លៃនៃការធានារ៉ាប់រងកើនឡើង ហើយការធ្វើដំណើររបស់កប៉ាល់នៅជុំវិញ Cape of Good Hope នៅអាហ្វ្រិកមានរយៈពេលយូរជាងធម្មតា។
ទន្ទឹមនឹងនោះ ការថែទាំរោងចក្រចម្រាញ់ប្រេងនៅសហរដ្ឋអាមេរិកនឹងកាត់បន្ថយការផ្គត់ផ្គង់នៅទូទាំងមហាសមុទ្រអាត្លង់ទិក ដែលនឹងជំរុញឱ្យតម្លៃលក់រាយឡើងថ្លៃបន្ថែមទៀត។ Natalia Losada អ្នកវិភាគផលិតផលប្រេងនៅ Energy Aspects បាននិយាយថា បញ្ហានេះនឹងធ្វើឱ្យអឺរ៉ុបកាន់តែពឹងផ្អែកទៅលើប្រេងនៅភាគខាងកើតនៃស៊ុយអេ ហើយនោះជាមូលហេតុដែលការរំខានដល់ការដឹកជញ្ជូននៅក្នុងសមុទ្រក្រហមនឹងមានឥទ្ធិពលយ៉ាងខ្លាំង។ គេមើលឃើញថា សមតុល្យប្រេងម៉ាស៊ូតនៅអឺរ៉ុបកាន់តែតឹងរ៉ឹងនៅក្នុងពេលខាងមុខនេះ ដែលជំរុញតម្លៃលក់រាយឡើងថ្លៃ។
គួរឲ្យបញ្ជាក់ដែរថា បណ្តាប្រទេសសហភាពអឺរ៉ុបបានប្រើប្រាស់ប្រេងម៉ាស៊ូតយ៉ាងទូលំទូលាយសម្រាប់ការដឹកជញ្ជូនទំនិញ អាកាសចរណ៍ និងសម្រាប់កំដៅក្នុងផ្ទះផងដែរ។ ការកើនឡើងយ៉ាងខ្លាំងនៃតម្លៃនឹងបន្ថែមសម្ពាធដល់សេដ្ឋកិច្ចដែលកំពុងជួបការលំបាករបស់ប្លុកនេះ ដែលពីមុនពឹងផ្អែកលើការនាំចូលប្រេងម៉ាស៊ូតរបស់រុស្ស៊ី។
លោក James Noel-Beswick អ្នកវិភាគប្រចាំក្រុមហ៊ុន Sparta Commodities បាននិយាយថា បញ្ហានៅក្នុងវិស័យថាមពលនឹងធ្វើឱ្យអឹរ៉ុបមានបញ្ហាប្រឈមសេដ្ឋកិច្ចកាន់តែធ្ងន់ធ្ងរឡើង ដែលរួមចំណែកដល់ការចំណាយដ៏ច្រើនឡើងនៃវិបត្តិរស់នៅ។ មុនពេលផ្ទុះសង្រ្គាមនៅហ្គាហ្សា មជ្ឈិមបូព៌ាមានចំណែកប្រហែល ៦០ ភាគរយនៃការផ្គត់ផ្គង់ប្រេងម៉ាស៊ូតសរុបរបស់សហភាពអឺរ៉ុប ដែលឥឡូវនេះបានធ្លាក់ចុះមកត្រឹមប្រហែលមួយភាគបីប៉ុណ្ណោះ។ ទន្ទឹមនឹងនេះ ជម្លោះសមុទ្រក្រហមបានកើតឡើងស្របពេលមានការធ្លាក់ចុះនៃស្តុកប្រេងម៉ាស៊ូតនៅក្នុងតំបន់ស្តុកទុក Amsterdam-Rotterdam-Antwerp (ARA) ដែលធ្វើឱ្យអឺរ៉ុបកាន់តែប្រឈមមុខនឹងការរំខានដល់ការផ្គត់ផ្គង់៕
Account
Security
Favourite Content