(សៀមរាប)៖ យុទ្ធនាការអន្ទាក់សូន្យដំណាក់កាលទី២ លើកទី១០ ដែលប្រារព្ធនៅក្នុងខេត្តសៀម​រាប បានបិទបញ្ចប់ដោយភាពរលូន ដោយភាគីពាក់ព័ន្ធបានចូលរួមផ្សព្វផ្សាយ និងអប់រំដល់ប្រជា ពលរដ្ឋ ដើម្បីឈានទៅដោះអន្ទាក់ចេញពីធម្មជាតិឱ្យអស់។

ក្នុងឳកាសនេះ ឯកឧត្តម​​ នេត្រ ភក្ក្រា រដ្ឋលេខាធិការក្រសួងបរិស្ថានបានលើកឡើងថា៖

“យើងទាំងអស់គ្នា​ត្រូវដឹងថា មនុស្សពឹងផ្អែកលើ​ធម្មជាតិច្រើនជាងធម្មជាតិពឹងផ្អែកលើយើង ដូចនេះ យើងត្រូវរួមគ្នាបញ្ចប់សកម្មភាពទាំងអស់​ដែលមិនមាននិរន្តរភាពទៅលើធម្មជាតិ ហើយ​ចូល​រួមផ្សព្វផ្សាយអំពីជម្រើសជីវភាព ភាពដល់​សហគមន៍​មូលដ្ឋានរស់នៅអាស្រ័យផល​លើការ​ប្រមូលផលអនុផលព្រៃឈើ ការបរបាញ់តាមបែប​ប្រពៃណីសម្រាប់សាច់ និងការជួញដូរ  អំពីគម្រោងកសិកម្មប្រកបដោយនិរន្តរភាព កសិរុក្ខកម្ម និងទេសចរណ៍ធម្មជាតិផ្សេងៗ។”

ទន្ទឹមគ្នានេះដែរ កញ្ញា Christel Griffioen ដែលជានាយិកានៃមជ្ឈមណ្ឌលអង្គរសម្រាប់​ការអភិរក្សជីវៈចម្រុះ (ACCB) បានថ្លែងថា៖

“កម្មវិធីស្ដារចំនួនរបាយ​ប្រជាសា​ស្រ្ដនៃប្រភេទសត្វ​កម្រក្រោមការថែទាំដោយមនុស្ស ជាផ្នែកមួយនៃកម្មវិធីស្តុកទុក​និងបង្កាត់ពូជប្រភេទសត្វកម្រ ដើម្បីការពារកុំឱ្យផុតពូជ ហើយការលែងសត្វទាំងនេះត្រឡប់ចូល​ទៅក្នុងជម្រកធម្មជាតិវិញ​អាចធ្វើទៅបានតែនៅក្នុងតំបន់ការពារដែលមានសុវត្ថិភាព និងតំបន់​ដែលគ្មានការដាក់អន្ទាក់។”

លោក សេង ទៀក ដែលជានាយកអង្គការ WWFកម្ពុជាក៏បានមានប្រសាសន៍ដែរថា៖

“ធនធានសត្វព្រៃគឺជាមោទនភាព និងជាកំណប់​ទ្រព្យដ៏មានតម្លៃ​របស់យើងទាំងអស់គ្នា ដូចនេះ យើងត្រូវការពារធនធានដ៏​កំរនេះពីការបរបាញ់ ការដាក់អន្ទាក់ និងការជួញដូរខុសច្បាប់គ្រប់​ទម្រង់ឲ្យបាន។” ​

លោកបន្តថា៖ អ្នកប្រមាញ់ដោយមធ្យោបាយដាក់អន្ទាក់អាចនឹងទទួលបានអត្ថប្រយោជន៍ក្នុងរយៈ​ពេលខ្លីសម្រាប់ខ្លួនគាត់ ប៉ុន្តែចំពោះអ្នកដទៃទៀតនៅក្នុងសហគមន៍គឺទទួលរងនូវការបាត់បង់ ដូច្នេះ មិនគួរដាក់អន្ទាក់ចូលធម្មជាតិទៀតនោះទេ។

លោក John Willis នាយកប្រចាំប្រទេសនៃអង្គការសម្ព័ន្ធមិត្ត​សត្វព្រៃ ក៏បានចូលរួមមតិផងដែរ​ថា៖

“អន្ទាក់ប្រៀបដូចជាមីនដែលមិនទាន់ផ្ទុះសម្រាប់សត្វព្រៃទាំងឡាយពីព្រោះអន្ទាក់សម្លាប់ មិនរើសមុខនោះឡើយ។ អន្ទាក់ទាំងនេះក៏បានបំផ្លាញការប្រកបរបរអាជីវកម្ម និងឱកាស​សេដ្ឋកិច្ចសម្រាប់គ្រួសារប្រជាពលរដ្ឋស្លូតត្រង់ផងដែរ។”

ស្រដៀងគ្នានេះ លោក ទុយ សេរីវឌ្ឍនា ប្រធានគ្រប់គ្រងកម្មវិធីអង្គការសម្ព័ន្ធសត្វព្រៃនិង​ធម្មជាតិបានលើកឡើងថា៖

“យើងរួមគ្នាការពារធនធានជីវ:ចម្រុះដ៏អស្ចារ្យ ការបង្កើនជីវភាព​សហគមន៍ នឹងសុខភាពសាធារណះ​តាមរយ:កាលើកស្ទួយ កាផ្លាស់ប្ដូឥរិយាបថជាវិជ្ជមានក្នុង​គោលដៅ​ឆ្ពោះទៅរក “អន្ទាក់សូន្យ“ នាពេលអនាគត។”

នាយកមូលនិធិម៉ាដក្សចូលីភីត លោក គង់ មុន្នីច័ន្ធ បានមានប្រសាសន៍ថា៖

“ពេលនេះ គឺជាពេលដែលយើងគ្រប់គ្នាត្រូវ​ត្រឡប់ទៅអនុវត្តបន្ត នូវបញ្ញាញាណដ៏ត្រឹមត្រូវ ដែលបានបន្សល់​ទុក​​ដោយបុព្វបុរសខ្មែរ ដែលនឹង​ជួយ​យើងឲ្យរក្សបាននូវសត្វព្រៃកម្រដ៏មានតម្លៃទាំងឡាយ និងពង្រីកឳកាសរកចំណូល​តាមរយៈ​វិស័យ​អេកូទេសចរណ៍។”

សម្រាប់កម្មវិធីអភិរក្សដីគោក នៃអង្គការ សត្វព្រៃ & រុក្ខជាតិ ប្រចាំប្រទេសកម្ពុជា លោក លូ វន្នី ដែលជាប្រធានកម្មវិធីបានបន្ថែមដែរថា៖ ភពផែនដីយើងកំពុងមានការប្រែប្រួល ហើយប្រព័ន្ធ​​​អេកូឡូស៊ី​ដែលយើងកំពុងពឹងផ្អែកលើក៏មានបម្រែបម្រួលដូចគ្នាដែរ ដោយសកម្មភាពមនុស្ស​ត្រូវបានចាត់​ទុក​ជាកត្តាចម្បងដែលជំរុញឱ្យមានការបម្រែបម្រួលនេះ។

ជាចុងក្រោយ លោក ប៊ូ វរសក្ស នាយកអង្គការជិវិតធម្មជាតិកម្ពុជា បានមានប្រសាសន៍ថា៖

“សាធារណជន អជ្ញាធរមូលដ្ឋាន អង្គការ និងស្ថាប័នមានសមត្ថកិច្ចត្រូវរួមដៃគ្នាទប់ស្តាត់ការ​ដាក់អន្ទាក់​ក្នុងព្រៃ​និងការជួញដូរសាច់សត្វព្រៃគ្រប់រូបភាព។”

លើសពីនេះផងដែរ អង្គការជីវិតធម្មជាតិនៅកម្ពុជាក៏បានលើកទឹកចិត្ត​ដល់ប្រជាពលរដ្ឋ​រាយការណ៍ពីទីតាំង​លក់សាច់សត្វ​ព្រៃដល់អជ្ញាធរមានសមត្ថកិច្ចតាមទូរស័ព្ទ 012500094។​

គួរបញ្ជាក់ថា ព្រឹត្តិការណ៍យុទ្ធនាការអន្ទាក់សូន្យតាមខេត្តដែលនឹងប្រព្រឹត្តទៅបន្តទៀតនៅ​ពេលក្រោយនៅចុងខែនេះ នៅខេត្តបាត់ដំបង និងខេត្តប៉ៃលិន បន្ទាប់មកនឹងមានការបិទបញ្ចប់​យុទ្ធនា​ការ​អន្ទាក់សូន្យដំណាក់កាលទី ២ នៅរាជធានីភ្នំពេញនាចុងខែកក្កដា៕